Read Pochuri Naga TSESHUKÜWA 2 Bible Online

TSESHUKÜWA 2 - Pochuri Naga bible

TSESHUKÜWA 2

¹Hakümjie küsa tsotho vü Levi zhehlo vü nyi küsü nüh Levi tsavühri küsü za.

² Thinü ma tü atsa moh nü nyimpari küsü wuo, thi ma nüh atsa jüma tü mhie shehm ta künguvü sa küche ma vi küthi.

³Thitü ma zah nüh ma vi müküthira nüh sakümvü aküjie nüh küto aloka küsü ma kenüh viru nü phanyinyi nüh zhete nü sotem, thi atsawa jüma lovü thse nü khawa rühgu nato azheza vü sa.

⁴Jüti sanü moti sanave ünüh ti ma jie vühwa tü kületsuozah vünüh no peveh.

⁵Thinü Faroah atsa rülawa tü ajuh küzü nti rühgu vü ru, thi ma siepevühri tü rühgu nato vü tsewatseru ti saküveh vü ma tü atsa jüma küthseku lokawa azheza vü ngukera, thi ma nüh siepevüh küsü küze nü jüma küüvi.

⁶Jüti sanü ma nüh lokawa sa no ünü atsawa ngukera, thinü halie, atsawa tü krietewa. Faroah atsa tü no nü kümze taji, “Hatü Ebriri küsü atsa wiethuoh,” ti sa.

⁷Jüti küsa vü Mosa tsehvüwa nüh Faroah tsavühwa vü, “Atsa hama noh kenüh kürohza na küsa kenüh hi nüh wa nü Ebrivühri vünüh kürohza vüh küsü jiru üti ülo?” ti küna.

⁸Jüti küünavü Faroah tsavühwa nüh ma vü, “Nyia luo,” ti küza. Thinü ma nüh wa nü atsawa zah jiru.

⁹Thinü Faroah atsavühwa nüh ma vü, “Atsa hama siewaluo thi eh kenüh rohzatsüluo, thi hi nüh noh keme satsü naveh ünüh,” ti küza. Jüti küüzavü ma nüh atsawa siewa nü rohza.

¹⁰ Jüti sanü atsawa tü khruom ünü siewa nü Faroah atsavühwa tsü, thi ma nüh ma nyo Mosa, Ebri vünüh Moshe, ti thohtsü. Küpakenühnyunü ma nüh, “Hi nüh ma tü ajuh vünüh küshohzhu kenüh,” ti sa.

¹¹ Mosa tü viza shefü küm sevü rülo küsü ma tü ma nyiri no nti alievü wa, thinü ma nyiri küüroh akhuo küzho küveh ngu.

¹²Thi Mosa tü wuovü no wuovü no ti sanü nyi küsü nga ma ngumküveh kenüh Egyptri küsü fethem nü shünyi lovü chohwum.

¹³Jüti sanü rülo jüma nyieh Mosa tü alievü wa le hü, thinü halie, Ebriri künyi tü saluola nü ngu. Jüti küsa vü ma nüh müküleh küsawa vü, “Mokenüh noh tü noh mpa noh nyi feveh lo?” ti küza.

¹⁴Thinü anyi jüma nüh ma vü, “Thawa nüh noh tü hiri nyiehvü kaji thi lesawa küüsa saveh lo? Thi noh nüh Egyptwa küfethe kümjie noh tü hi nga fethe nti saveh ülo?” ti küza. Jüti küsa vü Mosa tü krü nü ma mpa nüh, “Hi nüh mowa sathuoh ünüh nyiri nüh jüma thsütewathuoh,” ti sa.

¹⁵ Faroah nüh jüma küthsüra vü Mosa fethe nti phah. Thitü Mosa tü Faroah vünüh zhü tewa nü Midiara zhih vü pehtewa, thi Mosa tü juhkhre küsü kütuoh vü wa shupeh.

¹⁶Jüma tsothovü Midiari navüwa tü atsa rüla türü pehveh, thinü mari tü ra nü ajuh tie, mari apa nyihzhüri ajuh küüzhu na küsa kenüh ajuh tie nü wujeku küpro.

¹⁷Jüti saküveh vü nyihzhü kühuori ru nü mari zhe, thitü Mosa nüh süra nü mari kükra nü ajuh tie ma nyihzhüri küüzhu.

¹⁸Jüti sanü mari tü shele mari apa Reuel vü tehu, thinü mari apa nüh, “Mokümjie sanü nosü nü nohri tü kümto tetse lo?” ti küna.

¹⁹Jüti küüna vü ma nüh, “Egyptri küsü nüh nyihzhü kühuora ke vünüh hiri kükratsü lie, thi jü mpa mükünyu hiri nyihzhüri ajuh zütsü na küsa kenüh ajuh nga tie tsü ti sanü kümto tetse lie,” ti rületsü.

²⁰Mari nüh jüta küüza vü mari apa nüh ma tsavühri vü, “Thinü ma tü khiela pehveh lo? Mokenüh nohri ma jam nü tse lo? Ma ji luo, thi ashie küütsaluo,” ti küza.

²¹Jüti küsa vü Mosa tü mari vü nyi küpeh kümshe satewa, jüti sanü ma nüh Zipporah vi ma tsü nü ma vüvüh küsa.

²²Thinü ma nüh nyimpari küsü wuo nü ma tsü thi ma nüh atsawa nyo Gershom, Ebri vünüh alieri ti thoh; küpakenühnyunü ma nüh, “Hi tü azhih hala küpriri küsa kenüh,” ti sa.

²³Jüti sanü rülo hothake küpeh sevü Egypt kajiwa tü süm. Thi Israel nyiri tü jü tsotho vü nga mari kükhu vü peh nü kümnomna jikhi sanü mari küükra kenüh zie wie. Thi mari nüh nyuri kükhu vü peh nü zie küveh jikhiwa tü Saküüwuowa[2] vü tewaju.

²⁴ Thinü mari nüh külorü jikhi sa küveh Saküüwuowa nüh künatsü, jüti küsa vü Saküüwuowa tü Abraham, Isaac thi Jacob siekütsathuozhü saküsawa müshekera.

²⁵Thi Saküüwuowa nüh Israel nyiri ngura thi mari kürho thsüra.