Read Pochuri Naga TSESHUKÜWA 21 Bible Online

TSESHUKÜWA 21 - Pochuri Naga bible

TSESHUKÜWA 21

¹Khonyo hamari noh nüh vi Israel nyiri vü tsüluo:

²Mükütüküzü nohri nüh Ebriri tükha sü thuoüji mahvi türo noh kütsü küsanaveh, thi mahvi türüawa thuoüji ma ke vü zanyo küsü nga mütsü nüh küzem naveh.

³Ma nüh anyiju ru thuoüji anyiju vünüh küzem le naveh, thitü ma nüh ma vüvüh sie nyina ru thuoüji ma vüvüh masü küzem le naveh.

⁴Mükütüküzü ma vüwa nüh ma vüvüh vitsü thi ma nüh atsa nyimpari nyutü nyimzari wuo thuoüji ma küzem na küsa vü ma tsavühri thuoüji ma vüwa tsüm nü ma mpa anyiju küze naveh.

⁵Thitü atükhawa nüh kümsho, hi nü eh vüwa, eh vüvüh thi eh tsari kümze nü hi thuoüji hi mpa anyiju thama wa ta küza thuoüji,

⁶ma vüwa nüh ma sie Saküüwuowa vü ru nü ma tü amükhie vü nyutü mükhietovüh vü küütsie nü ma vüwa nüh ma khüna we naveh thi ma kürhoküju ma tükha sanü rho naveh.

⁷“Mükütüküzü nyi küsü nüh tükha kümjie vünüh ma tsavühwa zhu thuoüji ma nü tükha nyimpari kümjie temwara.

⁸Mütüküzü jüma nüh ma vüwa ma vü küüroh tsüküsawa külo müsathsü nüh sam thuoüji ma pa nüh ma küürhehsam le naveh, jüüta nyu nüh sanü ma müshe sanü anyilieri vü zhu na küsa müsara, küpakenühnyunü ma nüh ma vü münyitsanüh sakümthuoh kenüh.

⁹Thitü ma nüh ma tsa nyimpawa vü küüroh nta thuoüji ma tsavühwa kümjie vünüh sierho naveh.

¹⁰Mükütüküzü ma nüh avüvüh küpa vile wie ketünga ma kütsaküzhu, ma thsümnyi nyutü ma tükhavüh mükünyu zhühnyori sa mküzülara.

¹¹Mükütüküzü nyimpawa nüh azhühnyo ha kücheri ma vü müsa thuoüji zanyo küsü nga nyuthuoh nüh akeme küsü nga müvi nüh küzem naveh.

¹² Wuori nüh anyi fe nü süm thuoüji anyi jüma tü mükürhora.

¹³ Thitü ma nüh künyitoh vünüh ma fethe nta küsa vünüh nyu nüh Saküüwuowa vünüh ma ke vü küüluke kümjie vünüh thuoüji ma azhie khiela küze naveh ünüh hi nüh küzatsü naveh.

¹⁴Thitü ma nüh aroshi nü thsütoh-ngutoh nü zothem thuoüji eh kükhurüpe vünüh shohwa nü zothe wie naveh.

¹⁵Thawa nüh ma pa nyutü ma zah fe naveh ünüh küsü naveh.

¹⁶ Thawa nüh zhu nta küsa vü nga nüh satü nyutü vi ma zhi santa küsa vü nga nüh satü anyi revi thuoüji küürhowa nyu.

¹⁷ “Küsüküsü nga ma pa nyutü ma zah müzü thuoüji küürhowa nyu.

¹⁸“Azhüazhü nyi künyi saluo nü aloh nüh vi ve nyutü ma ke shekürülo nü toh nü müsü nüh sakümsamna nü azevü zehm thuoüji ma küüsüwa nyu,

¹⁹thitü müsamna küsawa ma ze vünüh sührale nü ma kütsüh se nü alievü küzhura thuoüji ma vü zanyoküsü nga küsawa nyuthuoh, thitü ma ze vü zeh nü tsotho pokahkümwa ame thuo naveh thi ma rohza kümhietsüju naveh.

²⁰“Nyi küsü nüh ma siepepa nyutü siepevüh akütsüh nüh fe nü ma ke vünüh süm thuoüji ma vü kümnomna tsüwie naveh.

²¹Thitü rülo küsü nyutü künyi sevü nüh rhora le thuoüji siepewa tü ma pesa küsa kenüh ma vü kümnomna kütsüwa nyu.

²²“Mükütüküzü anyi wuori nü atsa kümovühwa sake nü avühwa nü zanyo küsü nga müsake tü atsa avo lovü tüküvehwa sake nü küzhuam thuoüji küsakewa vü ma vüpa nüh küzake khuo naveh ünüh alesara zhü vünüh ameküla sanaveh.

²³Thitü azhüazhü sakesakhrim thuoüji kürholi viluo wie nathuoh,

²⁴ notha küsü nüh notha küsü, aha küsü nüh aha küsü, ake küsü nüh ake küsü, ampha küsü nüh ampha küsü,

²⁵akütso nüh akütso, kümsamna nüh kümsamna thi aküfe nüh aküfe.

²⁶Mükütüküzü nyi küsü nüh ma tükha notha kürhie, ma mpa nüh tükhapa satü nyutü tükhavüh satü, thi fephumtü thuoüji ma nothawa kenüh ma tü zanyoküsü nga nyuthuoh nüh tewa naveh.

²⁷Mütüküzü ma nüh aha feshimtü thuoüji ma ha kenüh ma tükha küsa vünüh tewa mhieveh.

²⁸Mükütüküzü nyi küsü shüvotsanüh nyimpari nyutü nyimzari khrüthem thuoüji shüvotsawa tü aloh nüh vehthem naveh, tü ma sa kütsawa nyu thi ma vüwa vü thuoüji zanyoküsü nga küsawa nyu.

²⁹Mükütüküzü shüvotsa küsü nüh khanavü nga nyiri khrüpeh huom thi jüma vüwa vü küza wiethuoh tü müküna nüh sanü kürüpeke lovü müthse nüh sam nü nyiri nyimpari nyutü nyimzari khrüthem thuoüji shüvotsawa nga aloh nüh vehthem naveh thi jüma vüwa nga küürhowa nyu.

³⁰Mükütüküzü ma nüh jüma kenüh ame thuotsü nta thuoüji küzake khuo naveh ünüh jüzake aveh thuo nü ma kürholi rhehsa naveh.

³¹Mükütüküzü nyi küsü atsa nyimpari nyutü nyimzari khrüm thuoüji awuleh jüma zarike vünüh sanaveh.

³²Mükütüküzü shüvotsa küsü nüh anyi küsü tükha nyimpari nyutü nyimzari khrü thuoüji jüma vüwa vü rakasa cherake thuo naveh, thi shüvotsawa aloh vi nü vehthem naveh.

³³Nyi küsü nüh azhikrie müsote nüh sa, nyutü azhikrie phie nü müsote nüh sanü shüvotsa nyutü rawuh jülovü küluke tetu,

³⁴ti thuoüji azhikrie vüwa nüh jüma sakümhie naveh, azhikrie lovü külukeküm asawa nü ma nüh vi nü ame thuo naveh.

³⁵Mükütüküzü nyi küsü shüvotsanüh küpara shüvotsa khrüthem thuoüji ma shüvotsa kürho zhu nü ame küsuo naveh, thi sükümwa asa nga masü rha küsuo naveh.

³⁶Nyutü mükütüküzü shüvotsawa tü khanavü nüh khrüm thi ma vüwa nüh kürüpeke lovü müthse nüh sam thuoüji shüvotsa küsü nüh shüvotsa küsü müthoh sanaveh, thi sükümwa thuoüji ma zhi samnathuoh.