Read Pochuri Naga TSESHUKÜWA 22 Bible Online

TSESHUKÜWA 22 - Pochuri Naga bible

TSESHUKÜWA 22

¹“Mütüküzü nyi küsü nüh nyura shüvotsa nyutü anyihzhü rühu nü fethem nyutü zhum thuoüji shüvotsa küsü kenüh münga thuo naveh, thi nyihzhü küsü vü nyihzhü müzü thuo naveh. Ma nüh kürühuwa ame sa wie naveh. Azhüazhü ma nüh vithuole na küsa zanyoküsü nga münyie thuoüji tükhari kümjie ma mpa ma zhu nü ma nüh kürühu amewa thuo naveh.

²Mükükütüzü kürühuri küsü nüh nyura zheh phietula nü ma fe taji süm thuoüji ma kenüh azüküthüküm müküleh münyiethuoh;

³thitü rünyi shu kümsevü nüh thuoüji ma vü müküleh pehm naveh.

⁴Mükütüküzü nyura seshu kürühu zhi rholewie thuoüji, shüvotsa saluo, rawuküzawa saluo, nyihzhü saluo, künyi küütsa thuota.

⁵Mükütüküzü nyi küsü ase-ashuh nüh wa nyura zhuh nyutü rhelirhu mürhuom nyutü mühute nüh küzem nü nyura zhuh mürhuom thuoüji ma zhuh kümphahtsawa nyutü ma rhelivi zhuhkümphahtsawa vünüh küthuo le sanaveh.

⁶Azhüazhü nyi küsü nüh ma zhuh anyih tso nü ajuohsü zhukewa taji nyura zhuh vü tsotewa nü nyura luoshü mthuoküsa nga satü müjie kümthuo nga satü tsom thuoüji thawa nüh tsoküze nüh jüma nüh aveh küthuo sanaveh.

⁷“Mükütüküzü nyi küsü nüh ma zhephruri vü vila üta sanü ma me nyutü atsokrü vi nyi küsü vü tsü thi kürühuri nüh rühu nü rera thuoüji kürühuwa nüh jüzake künyi thuo naveh.

⁸Thitü mükütüküzü kürühuwa mürera nüh sam thuoüji zanyo küsa zheh vüwa nüh zanyo jüma nyiehvü ma ke thse ünü müthsetsanüh ta küsa thsü na küsa kenüh ma sie nü Saküüwuowa tüvü ru naveh.

⁹“Zanyo vi küsü nüh küsü kütsotü vürieküm, ma mpa nüh shüvotsa kenüh nga, rawuh kenüh nga, anyihnyih kenüh nga, thsümnyi kenüh nga nyutü zanyo küsüküsü kümie kümsaluo, nyi küsü nüh, hamatü jüüta wiethuoh ta thuoüji masükhürü nga Saküüwuowa tüvü ru naveh; thi Saküüwuowa nüh thawa müshemsü naveh ünüh jüma nüh jüzake künyi mazhephruwa thuo naveh.

¹⁰“Nyi küsü rawuh nyutü shüvotsa nyutü anyihnyih nyutü ase-ashuh muomuo wie nga küjela üta nyi küsü vü tsü nü süm, nyutü müsamnam, nyutü zhejam, thi jüma nyi küsü nga nüh müngu nüh sam,

¹¹ti thuoüji ma nüh jümawa seshuhvü ma ke thse, nyutü müthsetsa ta küsa thsü na küsa kenüh VÜWA tüvü nüh küüshietsanaveh, thi jüma müthoh thuoüji küthuolewa nyuthuoh.

¹²Thitü jüma tü ma vünüh rühutewa thuoüji ma nüh avü jümawa vü thuo naveh.

¹³Mükütüküzü jüma tü rezasa samwari nüh retsam thuoüji azhütsa ta küsa thsütoh na küsa kenüh ma nüh kütsatu viru kütsanaveh, thi jüta thuoüji küthuo le küsawa nyuthuoh.

¹⁴“Nyi küsü nüh ma zhephruwa seshuh muomuo wie nga nyi küsü vünüh viru nü küje naveh, thi ma mükünyie vünüh jüma tü müsamnam nyutü süm thuoüji aveh ame ma nüh thuo naveh.

¹⁵Thitü ma vüwa küpeh vünüh jüta sam thuoüji küthuowa nyuthuoh, küpakenühnyunü ma nüh jüma tü kümsa kenüh kümsa vünüh küzem naveh.

¹⁶“Nyi küsü nüh mükürüsavüh nyuri nüh za nta künamüküsa müzhie nü siezeh taji samsüm thuoüji ma nüh alahme thuo nü ma nüh za naveh.

¹⁷Thitü ma pa nüh tsomta müküza nta mamthuoüji mükürüsawa ame zake ma nüh thuo naveh.

¹⁸“Nohri piketü tsuore küjülevühri küürhowa nyu.

¹⁹ “Samwa sieküzehri küsüm naveh.

²⁰ “Hi vü mpa wie küchie nüh nyiaza küpa vü küsahthuo küsathuoüji zorie khehm wie nathuoh.

²¹ “Anyitheri vü mükünyu nyutü müküchie müsa tüm; küpakenühnyunü nohri nga Egypt vü anyitheri sanü kürho kenüh.

²²Nohri tü tünyivüh nyutü mürari vü kümnomna mütsüra.

²³Mükütüküzü nohri nüh mari sakümnomna thi mari nüh hi vü mari jikhi zieküze thuoüji hi nüh mari jikhi künatü wie naveh;

²⁴thi hi nüh eh rü shuzhuru nü anyuchuwa vi nohri zahthejam nü noh vüvühri tü saküütünyi tsü thi noh tsari tü apa mükünyieri küüsam naveh.

²⁵ “Nohri nüh eh nyi kümkhuori vü ame küüna nü akünari kümjie vünüh küsawa nyu, thi azahkütsa nga küviwa nyu.

²⁶Mükütüküzü noh nüh anyi wuora thsümnyi küshiete vünüh vi thuoüji rünyi müjie kütu atüvü noh jüma vishelewa tsüm naveh;

²⁷küpakenühnyunü ma tü kümphie jü mpa küsa kenüh, jüma tü ma satsa küüzhu kenüh; ma tü mowa hiezeh na lo? Ma nüh moma müphie nüh hi vü zie thuoüji hi nüh künatü wie naveh, küpakenühnyunü hi tü küümzewa küsa kenüh.

²⁸ “Noh Saküüwuowa vü azhü kümsü müphrara, nyutü noh nyira takrü küsü nga mümzüra.

²⁹“Noh zhuh nenü kümahwie vünüh thi noh rhelivizhuh vünüh rhelivijuh kütsüzhu vünüh müküzhike wiethuoh nüh hi vü tsü naveh. Noh tsa küwuokhuwa vi hi tsü naveh.

³⁰Jükümjie noh shüvotsa thi anyihnyih nga kütsa khuwa hi tsü naveh: rülo türü ma vühwa vü nyi küüpeh naveh, thi rülo tüze vü thuoüji vi hi tsü naveh.

³¹ Noh tü hi vü kümtseri müsaji mümhie, jükenüh amiese kütsawa nyu; vi ashuh kütsam naveh.