Read Pochuri Naga TSESHUKÜWA 23 Bible Online

TSESHUKÜWA 23 - Pochuri Naga bible

TSESHUKÜWA 23

¹ Noh akürie zhü küphravüh nyu. Nyuri vü kümsü sana küsa pohvü kenüh arokümsüri sie mütsarü tüm.

²Mükülehwie ketünga anyi küzhi vünüh katovehthuoh nü ti sanü zanyo kümsü müsa tüm; thi mükülehwa phrakükato temwa tümluo; jüti sanü kümshowa samkürele tümluo;

³ nyutü kümkhuorithuoh nü ti sanü ma kükato kenüh ma po vi mküpa tüm.

⁴ “Mükütüküzü noh mükünongüwa shüvotsa nyutü ma rawuh lehkhuji mükünyu vü kuotewa üji sieru ma vü tsüluo.

⁵“Mükütüküzü noh kümrhüwa rawuh khuo vünü müsührara nüh saveh üji mükükra nüh leküm müsa tümluo, müle nüh jüma khake nü müküsühraji mümhie.

⁶“Noh ma kenüh mükükato kenüh ma vü kümshowa mükhaphrütüm.

⁷Müküleh vünüh phra küümsü vünüh mükiehtuo üji mümhie, müküleh mükünyieri müfe tümluo, küpakenühnyunü piketü hi nüh müküleh küsawa tü nomküjara kenüh.

⁸Thi nohri athe müvi tümluo, küpakenühnyunü athe tü küjira notha saküjuveh thi kümshori khamlele küveh kenüh.

⁹ “Nohri küzehri vü kümnomna mütsü tümluo; nohri nüh anyitheri luoveh küthsü kenüh, küpakenühnyunü Egypt zhih vü nohri nga anyitheri sanü küpeh kenüh.

¹⁰ “Mahvi türo nohri tü nohri zhuh vü mahtsü zhuh nü wievi naveh;

¹¹thitü mahvi türüawa thuoüji mümahwie nüh jüüta küwuozah sanü noh nyi kümkhuori küütsaluo, thi mari nüh küjari rezasari küütsaluo. Jükümjie nohri rhelivi zhuh nga thi Olive phari vü nga sanaveh.

¹² “Rülo türo nohri tü nohri küüroh sanaveh, thitü rülo türüawa rülo thuoüji nohri münyie naveh; nohri shüvotsa thi rawuh nga kümnyie naveh, thi nohri tü nohri tükhavühratsa thi alienyiri tü küsiehra naveh.

¹³Hi nüh noh vü küüzari aveh kümhieti künaluo, thi nyiaza küpa nyo küphrahte müsa tüm, nyutü jükümjie küsa nohri apo vünüh phrahte nü küünara müsa tümluo.

¹⁴“Mahvi küsü vü nohri akhu küche sa hi vü tsü naveh.

¹⁵ Hi nüh noh vü azhükütsü kümjie nohri ahzhi müküthse lohse akhu sanaveh, Abib asa vü tsotho sakütsü kümjie rülo türü nohri ahzhi müküthse lohse tsanaveh, küpakenühnyunü nohri tü jüma asa vü Egypt vünüh shuküru kenüh. Nohri nyi küsü nga eh tüvü ake kürütso mürura.

¹⁶ “Noh zhuh vü mahtsü küzhuh noh küüroh avi küpe pokhuwa kümahwie akhuwa sanaveh. Mahvi sehkhe vü noh küüroh azhuh vünüh avi küpe vizhuhküsawa akhu sanaveh.

¹⁷Mahvi küsü vü küchekeri noh nyimpari aveh ru VÜWA Saküüwuowa tüvü kütsanaveh.

¹⁸“Azüh vi kükhurü vü ahzhi küthse lohse vi nü eh küsahthuo müsara, nyutü eh khu vü aküthüwa arüne küju müsa tümluo.

¹⁹ “Noh zhuh vü avi küpe apowa vi VÜWA noh Saküüwuowa zheh vü viru luo. “Nyihnyihzah asa küshu vü ma vühwa tünüjuh vünüh müshu tümluo.

²⁰“Halie, hi nüh kücheküsa azhievü sieruna küsa kenüh lehkhuji vü noh kühuo nti rügizhüleri noh tüvü küzeveh.

²¹Ma mükule tüm nü ma zhü kümhieti künaluo, ma mükülo müsa tümluo, noh nüh ma mükülo sathuoh üji noh müküleh noküjawa nyu, küpakenühnyunü eh nyo tü ma vü pehküveh kenüh.

²²“Thitü noh nüh luoveh thse nü ma nüh küüza küna taji hi nüh küüzari aveh sa thuoüji noh mükünongüri vü hi nüh mari mükünongüwa sanaveh, thi noh sie küsaluori sie küsaluowa sa tü naveh.

²³“Eh zhülewa noh tüvü wa nü noh sie Amorri, Hitri, Perizri, Kananri, Hivri thi Jebusri vü ru thuoüji hi nüh mari vizhujam naveh,

²⁴nohri tü ma nyiazari vü küngie kütsuowa nyu, nyutü mari kütsü nga küsawa nyu, thi mari küüroh kümjie küsawa nyu, tü noh tü jümari aveh khaja kheh naveh thi mari tovühri aveh feriem naveh.

²⁵Jüti sanü noh tü VÜWA noh Saküüwuowa kütsü sanaveh, thi hi nüh noh lohse noh juh tsiatsü naveh; thi nohri zhievü nüh hi nüh küsaküna vijamtü naveh.

²⁶Noh zhih vü nyimzari küsü nga atsa küüzhuowa nyu, nyutü atsa vükre küm küsawa nyu, hi nüh nohri kürho rülo saküsuo tsünaveh.

²⁷Hi nüh eh kükrü noh tüvü küze naveh, anyiri noh vü küruri aveh sakürüza tsü naveh, thi noh mükünongüri aveh mari seru noh vü küüprüke naveh.

²⁸Hi nüh thuozütsari noh tüvü küze naveh, jümari nüh Hivri, Kananri, thi Hitri noh tüvü nüh zheküüja naveh.

²⁹Hi nüh noh müjieküru mahvi küsü atüvü nüh mari zheküjawa nyu, küpakenühnyunü azhiewa tü kürezam nü samwa nüh pro nü thama noh saküüsüro kenüh.

³⁰Nohri anyi zhi nü azhih jüla müjie wa küpeh küju nü hi nüh pipi nüh nohri tüvü nüh mari zheja naveh.

³¹Thi hi nüh noh zhih arühri thsetsü naveh, Kümru Juhküji vünüh Filistinri Juhküji küju, thi reza vünüh Eufrates küju; küpakenühnyunü azhih jüla kürhori vi nohkeri vü thse naküveh kenüh, thi noh nüh nohtüri vü nüh mari zheja naveh.

³²Thi noh tü mari vü nyutü nyiaza küsü vü nga kütsathuo müsara.

³³Hi vü nohri sa mkükhiemuo nüh sana küsa kenüh mari tü noh zhihri vü müküürhora; küpakenühnyunü nohri nüh mari nyiaza kütsü sa thuoüji jüma tü nohkeri nüh aphiejü küsü sakümthuoh kenüh,” ti küza.