Read Pochuri Naga TSESHUKÜWA 26 Bible Online

TSESHUKÜWA 26 - Pochuri Naga bible

TSESHUKÜWA 26

¹“Jümpa mükünyu küziete türake khehmülo, küsümo thi kümruphieke, mürilo nüh to nü juhthsü kükhurüzheh küsü saluo: thi kürhosari rügi vü rhe küzü sheh ke luo.

²Küzietethsü aveh nga achu akha mükeke nü tüze, thi aveh thuoüji aveh kha müzü.

³Küzietethsü münga kürürhie, thi küpa müngari kürürhie ti sanaveh.

⁴Thi küürürhie pokhuwa potetsawa vü akhehm nüh akie sanaveh; jükümjie küürürhie künyiawa nga potetsawa vü akhehm nüh akie sanaveh.

⁵Küzietethsü küsü vü akie tünyieke thi küzietethsü künyiawa nga akie tünyieke ti sanü masü küwiejieluo naveh.

⁶Thi noh nüh küükheluo suna sanaveh, juhthsü kükhurüzhehwa tü küsü sana küsa kenüh küzietethsüri tü küükhekeri nüh shohrü naveh.

⁷“Jüsevü nga noh tü juhthsüzheh nyiehvü hietena küsa kenüh nyihsü küneh nüh küzietethsü türaluoke sanaveh.

⁸Thi küzietethsü jümari aveh achu kha cherake thi ma veh thuoüji kha müzü; türaluoke jümari aveh nga achu aveh zarike wie naveh.

⁹Thi küzietethsü müngari küharü naveh, thi türori küharü naveh, thi juhthsüzheh atüvü küzietethsü türori tü jüma nyieh vünüh zie naveh.

¹⁰Küzietethsü apowa potetsawa vü akie tünyieke thi künyiawa potewa vü akie tünyieke ti sanaveh.

¹¹“Jüsevü nga asahwuo khu tünyieke sanaveh, thi asahwuo khu jümari tü akie lovü thse nü athsü künyi tü küüharü nü küsü küüsaluo.

¹²Thi küzietethsü küzhila kümnyiehwa thuoüji juhthsü kükhurüzheh tüku wuovü thuote luo.

¹³Achu wuovü küzietethsü kha küsüsü kümnyiehwa thuoüji tuwuovü thi hawuovü awuowuo ziete naveh.

¹⁴Jüsevü nga nyihzhüvo sahu thi nyihsüvo sahu saküükhro kümru nü anyiehvü kühiete sanaveh.

¹⁵“Thi jüsevü nga azhü nüh awieh sanü azhepovü fete naveh.

¹⁶Azhepo azie wiehwa achu kha türake, thi ma veh aveh kha küsü nü küzhila.

¹⁷Khemta küüferü na küsa kenüh awieh küsü vü apienyo künyinyi küüpe naveh, jükümjie vünüh juhthsü kükhurüzheh kenüh awieh aveh sakheh naveh.

¹⁸Juhthsü kükhurüzheh lahwuovü awieh mükeke sanaveh;

¹⁹awieh mükeke khujih vü rakasa nüh khujih zürake sanaveh, awieh küsü vü apienyo künyi kenüh rakasa khujih mükeke sanü pieküsa lovü küzheke nü khekeluo na küsa kenüh,

²⁰thi jüma sevü nga juhthsü kükhuhrüzheh wieh wuovü awieh mükeke,

²¹thi awieh mükeke vü rakasa khujih zürake, awieh küsü vü rakasa khujih künyinyi, thi rakasa khujih künyinyi awieh küpari vü;

²²atüku vü zhietu wuovü thuoüji awieh türo thse naveh.

²³Atüku zhietu wuovü jükeh künyi vü awieh künyi thse naveh;

²⁴awieh hamasü tü ajih vü thuoüji küütsarüwa nyu, thitü alüvü thuoüji masükhürü akie lovü küzheke naveh, masükhürü jükümjie sanü jükeh künyi saküüshu naveh.

²⁵Jüti sanü awieh tüze sanü rakasa nüh khujih sanü khujih türatüro sanaveh; awieh küsü vü khujih künyi thi awieh küpawa vü nga khujih künyi ti sanaveh.

²⁶“Thi jüsevü nga müsethso münga vi nü rüpethsoh sanaveh, münga juhthsü kükhurüzheh wuochuh wuovü,

²⁷münga küpa wuochuh wuovü, thi küpa müngari zhietu tüku wuovü, ti shie naveh.

²⁸Rüpe tovüh zhilawa thuoüji khiehluo nü azhuvü nü küüshu taji küütsüluo naveh.

²⁹Thi aküpe thsohri thuoüji suna nüh küzhu thi suna nüh akieveh sanü jülovü küzheke nü küükhehluo naveh.

³⁰Aküzhi rügivü nüh kükhurüzheh tsowa mokümjie vünüh sa üta kütsanüh jükümjie vünüh saluo.

³¹Alo khehm, küsümo, kümruphieke thi mürilo nüh azhüküzhü ti küzietethsü küsü sanü jüma rügivü kürhosari rheke naveh;

³²thi jüma tü suna nüh küüzhu amüse tovüh müzü rügivü thuo naveh; ma narüri tü suna nüh sanü atovühri tü raka sanüh küsa müzü rügivü toke naveh.

³³Küzietethsüwa tü kükhetewa vünüh küüha nü povü talowa tü küzietethsüwa lovü sataji küzietethsüwa nüh kümtse thi kümtsetsawa masü azhievü thuote nü saküpa naveh.

³⁴Jüti sanü noküümze pewa tü kümtsetsawa küshothuo lovü thseküsa povü kuwa rügivü sanaveh.

³⁵Thi tokepewa tü küzietethsüwa alievü sanü latipewa tü juhthsü kükhurüzheh lah wuovü toküsapewa sie wiejieluo nü sanaveh; thi toküsapewa thuoüji wieh wuo sanaveh.

³⁶Jüti sanü lehpie küziete kenüh akhehm, küsümo, kümruphieke thi mürilo nüh kükheto küüroh sanü sanaveh.

³⁷Thi lehpie küzietethsüwa kenüh amüse nüh tovüh münga sanü suna nüh küzhute naveh; lehpie küzietethsü kühate kenüh anashu suna nüh sanü tovüh hamari kenüh sahwuo khujih münga sanaveh.