Read Pochuri Naga TSESHUKÜWA 27 Bible Online

TSESHUKÜWA 27 - Pochuri Naga bible

TSESHUKÜWA 27

¹Jüti sanü kükhurüpewa tü amüse nüh sanaveh, achu kha münga thi aveh kha münga, kükhurüpewa tü küvehjie sanaveh; ma kümsie kha küche.

²Thi jühke müzü vü zarike vünüh sahwuowa nüh küüzhu arütsü müzü sanaveh.

³Jüsevü nga kükhurüpewa weji nyuozhuh na küsa kenüh aküfü sanaveh, thi küüzhievüh, ketsoku, kühavüh thi anyih tahthsü sanaveh; hamari aveh sahwuo nüh sa kheh naveh.

⁴Jümpa mükünyu asahwuo nüh ahetsa to nü nyitsope sanaveh, nahro müzü vü sahwuo nüh afüthsü sanaveh.

⁵Thi jüma tü azhievü thse nü kükhurüpe kuru müküju saluo.

⁶Jüti sanü kükhurüpewa kükha kenüh amüse nüh atsükhie sanü asahwuo nüh küzhute luo;

⁷thi atsükhie künyi tü jükeh müzü vü sahwuo nüh akie sathse küsa lovü mürike nü kha na küsa kenüh saluo.

⁸Kükhurüpe jüma tü awieh kürüpah nüh sanü awu küüpie luo, thi jüma tü aküzhi vünüh noh vü küütsa kümjie vünüh sanaveh.

⁹“Jüsevü nga juhthsü kükhurüzheh nyula sanaveh. Anyula lah wuovü kha müzake mürilothsü nüh wuochuwuovü thuote naveh;

¹⁰atovüh mükeke thi kütokepe nga mükeke ti sahwuowa nüh sanaveh, thitü tovüh kenüh anarü thi kükhete thuoüji rakasa nüh sanaveh.

¹¹Thi jükümjie ma chuwa kenüh anyula lah wuovü nga mürilothsü kha müzake thuote naveh, jüma kenüh tovüh mükeke thi kütokepe nga mükeke ti sahwuo nüh sanaveh; thitü tovüh kenüh anarü thi kükhete thuoüji rakasa nüh sanaveh.

¹²Anyula zhietu wuovü aveh wa kenüh tovüh türake thi kütokepe türake ti thse nü mürilothsü kha tünyieke thuote naveh.

¹³Anyula atüvü zhieshu wuovü aveh thuoüji kha tünyieke.

¹⁴Akheri wuochuwuovü athsü küziete thuoüji atovüh küche thi ma kütokepe küche ti sanü kha türamnga sanaveh.

¹⁵Thi küpa wuovü nga küzietethsü kha türamnga, tovüh küche thi ma kütokepe küche.

¹⁶Anyulawa kheri küthuotethsü ma küsuo kha mükeke, arüje nüh kheküto thsü akhehm, küsümo, kümruphieke thi mürilothsü nüh sanaveh; thi jüma kenüh tovüh müzü thi ma kütokepe müzü ti sanaveh.

¹⁷Anyula vü atovüh aveh rakasa nüh kükhete sanaveh; ma narü nga rakasa thi ma kütokeperi thuoüji asahwuo nüh sanaveh.

¹⁸Anyula achu thuoüji nü kha tünyieke, kümsie thuoüji kha münga, mürilothsü nüh küziete sanü kütokepe thuoüji asahwuo nüh sanaveh.

¹⁹Juhthsü kükhurüzheh vü ahuo akhu müvi üji mükümhie aveh ma küze aveh thi anyulavü aküze aveh sahwuowa nüh vi ze kheh naveh.

²⁰“Latiwa küju peh huo na küsa kenüh Olive vüjuh kütsüzhu alatha noh vü viru ti Israelra tsari vü azhütsüluo.

²¹Juhthsü kükhurüzheh kümhupe vü, jüma tü povüzhüwa tü küthuotethsü alievü Aron thi ma tsari nüh münüleh vünüh rüne küju huopeh naveh. Thi hamatü Israel nyiri nüh awuhle küju khonyo sanü küsuokürho müzhewa naveh.