Read Pochuri Naga TSESHUKÜWA 28 Bible Online

TSESHUKÜWA 28 - Pochuri Naga bible

TSESHUKÜWA 28

¹“Jüti sanü Israel nyiri azavü nüh noh jie Aron thi ma tsari: Nadab thi Abihu, Eleazar thi Ithamar, anyi hamari siezhuru nü anavüri küsanü eh kütsü küüsaluo.

²Thi noh jie Aron kenüh kümtse thsümnyi kütholathovü thi aküzü satsü naveh.

³Aron tü sakümtse nü eh navü küüsanaveh, tinü ma thsümnyiri küüsatsüna küsa kenüh küsara küpeh, hi nüh küsara mari luoveh lovü thseküsari vü küza luo.

⁴Thsümnyi hamari zanyoküsara rükaküsari nüh küsanaveh: Tüso kühiete küsü, navükruzhu küsü, kruzhu küühawa küsü, küsazhekruzhu ake nüh kükhe sarie küsa küsü, alüwe, thi kütsekevüh küsü, mari tü noh jie Aron kenüh thsümnyi kümtse satsü naveh thi ma tsari tü anavüri sanü hi vü küroh tsü naveh.

⁵Mari tü suna, akhehm, küsümo, kümruphieke, thi mürilo külarü ti vi naveh.

⁶Thi mari tü asiezhü sheh nü suna, khehm, küsümo, kümruphieke, mürilo ti vi nü navükruzhu to nü tsü naveh.

⁷Asafü rügivü thuoüji athsü künyi sanü apote vü masü küüperü naveh.

⁸Jüma tseketena küsa kenüh jüma rügivü asiezhüsheh nü toküüpeke naveh, thi jüma tü kesie zarike vünüh thi tsokrü zarike vünüh sanaveh, suna, akhehm, küsümo, kümruphieke, thi mürilo nüh vi sanaveh.

⁹Thi noh tü sitheloh kükhrüpuo künyi vi nü jümasü rügivü Israel atsara nyo rhüke naveh.

¹⁰Mari küwuo rünguokükhruo vünüh müzhe nü aloh küsü rügi vü mari türo anyo rhüke thi küpa küsü rügivü mari küpari türo anyo rhüke ti sanaveh.

¹¹Sithe vü lasikie külüke kümjie Israel atsara nyo aloh ajü künyi rügivü khrüke naveh; thi suna narü nüh mülüke naveh.

¹²Thi aloh jümasü tü navükruzhu safüthsü rügivü thse naveh, Israel tsari kenüh kümshe lohküsü küsanaveh; müshe peh huo na küsa kenüh Aron nüh VÜWA tüvü mari nyo ma safürügivü nüh vü wa naveh.

¹³Thi narü thorü lüküüperü künyi sanaveh,

¹⁴thi suna nüh ali külahrü kümjie narü li künyi sanü jümasü tü narü lüküüperü künyi vü küperüke naveh.

¹⁵Jüsevü nga asiezhüsheh nü navükruzhu lesawa tüso kühiete küsü sanaveh; thi jüma tü suna, akhehm, küsümo, kümruphieke thi mürilo nüh sanaveh.

¹⁶Aveh nga thi achu nga küvehjie sanü künyi shekhrie naveh.

¹⁷Thi jüla aloh küri müzü thse naveh. Küri pokhuwa thuoüji sitheloh kürüwuowa, sitheloh awazhiwa thi sitheloh kümruwa ti nüh aküri pokhu sanaveh.

¹⁸Aküri künyiawa thuoüji sitheloh kümzhiwa, sitheloh khehmwa thi asakhu ti nüh küri künyiawa;

¹⁹aküri kücheawa thuoüji sitheloh kümru küwiethiewa, thi sitheloh kümjie küsa aloh kükhrawa, thi sitheloh kümru thi khehm kütünyie;

²⁰thi küri müzüawa thuoüji sitheloh kümzhi küwiethiewa, sitheloh kükhrüpuo thi sitheloh amürü nyutü anyisa kütünyiewa; hamari aveh suna narü vü küpeke naveh.

²¹Thi aloh türakünyi rügivü Israel atsa nyimpari türakünyiawa nyo rünguokükhruo vünüh rhü nü kütsüke kümjie akuoh türakünyi tü rhüke naveh.

²²Thi suna alatha nüh ali sataji anarü sanü tüso kühiete sanaveh,

²³jüti sanü tüso kühietewa kenüh suna nüh akie künyi sanü ajükeh künyi vü thse naveh.

²⁴Thi suna li künyi tü tüso kühiete jükeh künyi akieveh lovühse naveh;

²⁵thi suna li wuochuwuovü ashu künyi tü viwa narü thorü künyi vü müzhuke nü navükruzhuwa safü künyi vü huke naveh.

²⁶Jüsevü nga suna nüh akieveh künyi sanü alovü ajükeh vü navükruzhu ase wuovü tüso kühiete pote künyi vü thsenaveh.

²⁷Thi jüsevü nga suna nüh akieveh künyi sahü nü navükruzhu safü künyi kükhu atüvü küpeke naveh, asiezhü sheh nü navükruzhu ali toküsawa vü huke naveh.

²⁸Thi akieveh vünüh tüso kühietewa kürite nü khehmli nüh navükruzhuwa akieveh vü huke naveh, jüti sanü jümawatü asiezhü sheh nü toküsawa li nyieh vü khahke naveh, jüta thuoüji tüsokühietewa tü navükruzhuwa vünüh riehzhu temwa rathuoh.

²⁹Jüti sanü Aron nüh VÜWA tüvü mükütuo nüh kümshekena küsa kenüh kümtse azhie vü kütu kürüzhu ma luoveh vü aleküsa tüso kühiete rügivü Israel tsari nyimpara nyo vü naveh.

³⁰ Thi aleküsa tüsokühiete vü VÜWA müshe Küthsüra thi Kümshira thse naveh, azhühnyo hamasü tü Aron nüh alovü VÜWA tüvü kütu kürüzhu ma luoveh rügivü vü naveh, hakümjie vünüh Aron nüh Israel nyiri aleküsawa ma luoveh rügivü vü nü VÜWA tüvü tse peh huo naveh.

³¹“Thi jüsevü nga khehm nüh navükruzhu küühawa kürü naveh.

³²Thi alü mürike küüze küpie nü müküükrih na küsa kenüh aküpie jüma ashu khete naveh.

³³Navükruzhu ajihvü alo khehm, küsümo thi kümruphieke nüh katohvi samkiele nü jümari azhievü suna khrizah humkiele naveh,

³⁴kruzhu küühawa ajih vü suna jirü thi katoh khrienyie nü huke mükiele naveh.

³⁵Thi jüma tü Aron nüh küüroh küsa vü thse naveh, ma tü masü nüh sana küsa kenüh kümtsepe lovü VÜWA tüvü kütu küshu aveh vü thse naveh.

³⁶“Jüsevü nga noh tü suna latha nüh akhu küsü sanü lasikie khrüke naveh, ‘lasikie kütsüke kümjie, VÜWA vü Kümtse,’ ta khrüke naveh.

³⁷Thi noh nüh khehmlo nüh ali küsawatü alüwewa atüvü huke naveh.

³⁸Jümatü Aron tie rügivü küüvü naveh, thi Israel nyiri nüh zanyo kütsü kümtse sanü kütsüri müküleh pehmwie ketünga jümari aveh tü Aron anyie rügivü peh huo nü jümari tü VÜWA tüvü küvikütse küüsanaveh.

³⁹“Thi mürilowa nüh küsazhekruzhu to nü jüma rügivü awa kükheke küüroh sanaveh, thi alüwe nga mürilo nüh to naveh, jüsevü nga asarie küsa kütsekevüh kümzhukhe vünüh sanaveh.

⁴⁰“Thi Aron tsa nyimpari kenüh thuoüji küsazhekruzhu, kütsekevüh thi alüwe satsü naveh; jümari tü no nü küsiakera thi aküzü vünüh müsaji mümhie.

⁴¹Jüti sanü ma tsa nyimpari tü Aron sie nü jümari küvüluo, thi vüjuh vi mari thsetsüluo, mari shiatsü nü mari sakümtsetsü thi jüti sanü mari tü navü küsanü ehküüroh küsaluo.

⁴²Mari küzükrüsatsa hiete na küsa kenüh mürilo nüh kümkhemnyi mari küshih vünüh thüchi küju kühiete totsüluo,

⁴³mari tü müküüsü nüh sana küsa kenüh kümtupe juhthsüzheh lovü kütuvü nga nyutü kümtsepe vü küüroh sa nta kükhurüpe kütuoh vü küru vü Aron thi ma tsari tü jümari vü naveh. Hamatü ma kenüh thi ma sevü küruri ma küshukürari küju küpeh huo zhühkhe sanaveh.