Read Pochuri Naga TSESHUKÜWA 29 Bible Online

TSESHUKÜWA 29 - Pochuri Naga bible

TSESHUKÜWA 29

¹“Mari tü navü sanü eh küüroh küsana küsa kenüh hakümjie vünüh mari sakümtse luo. Shüvotsa zah küsü thi nyihzhüvo künyi mükünyiena,

²thi ahzhi müküthse lohse, ahzhi müküthse vüjuh nüh küünya tieshu thi amüsa vüjuh nüh küwi nü küveh lohse kürüpah vi luo, thi hamari aveh hiemtha ahie nüh sanaveh.

³Thi jümari aveh amülo lovü thse thi shüvotsa wa thi nyihzhüvo künyi ti vi nü ru luo.

⁴Jüti sanü Aron thi ma tsa nyimpari sie nü kümhupe juhthsüzheh lehpie vü ru nü ajuh nüh mari khrüm luo;

⁵Jüti sanü makeri nüh thsümnyi kücheküsa aveh vi Aron vü thsetsüluo;

⁶thi alüwewa tü Aron lü vü thsetsü nü jüma rügivü kümtse kajilüwe saluo.

⁷Jüti sanü aküthse vüjuh vi nü ma lü vü küshoke nü ma thse tsüluo.

⁸Thi ma tsari sieru nü mari vü küsazhekruzhuwa thsetsüluo,

⁹thi mari küshih vü kütsekevüh tseketsü nü mari lüvü alüwe küvü luo; jüti sanü navü küsa zhühkhe vünüh mari nüh küüsa peh huo naveh. Hakümjie vünüh Aron thi ma tsari vü shiatsü naveh.

¹⁰“Jüti küsa sevü juhthsü kümhuwazheh tüvü shüvotsawa viru nü Aron thi ma tsari nüh makeri shüvotsawa lü rügivü thse naveh,

¹¹thi juhthsü nazizhehwa lehpie kütuovü VÜWA tüvü nüh shüvotsawa fethe naveh,

¹²thi azüh pike tie nü kükhurüzheh rütsüri atüjü nüh pathse naveh, thi küpari thuoüji kükhurüpe tovühri vü küshokem naveh.

¹³Jüti sanü aküthü amüwi küüzhutewa aveh, amüthsekuoh aveh, amükreh künyi thi maküüzhute küthü aveh vi nü kükhurüpe vünüh tso luo.

¹⁴Thitü shüvotsa sazhü, ma sahu, thi ma sü thuoüji kürünape alievü VÜWA nü anyih nüh tsom naveh; hamatü kükhiemuo kükhurü küsa kenüh.

¹⁵“Jüsevü nga nyihzhüvo küsü vi nü Aron thi ma tsari tü makeri jümawa alü rügivü thse luo,

¹⁶thi jüma fethe nü ma züh vi nü kükhurüpewa zü mükieleluo.

¹⁷Jüti sanü nyihzhüvowa tü tehthuonyahm luo, thi ma votsasa thi ma jihri phrüm nü jümari thi ma lü vi nü ma satsa tehthuonyah küsawa sanyie nü;

¹⁸nyihzhüvo satsa aveh kükhurüpe rügi vünüh tso naveh; hamatü VÜWA vü kütso kükhurü kütsü; arhe küüngu azhi küsü; thi anyih vünüh VÜWA vü kükhurü kütsü azhi küsü.

¹⁹“Jüsevü nga nyihzhüvo küpa küsü vile hü nü Aron thi ma tsari ake vi nyihzhüvowa lü rügivü thse naveh,

²⁰thi jüma fethe nü jümawa vünüh azüh vi nü Aron thi ma tsara zhie wuovü akhüna künyi thsopo vü thi mari zhie wuovü ake tüjü küjiwa thsopo thi azhie wuovü ajih tüjü küjiwa thse naveh, thi azüh kümnyie aveh thuoüji kükhurüpewa zümkiele naveh.

²¹Thi kükhurüpe rügivü azüh küjo küveh thi aküthse vüjuh vi nü Aron thi ma thsümnyi vü thi ma tsari thi ma tsari vü thi ma tsara thsümnyi rügivü ma sie nü kajake naveh; jüti sanü ma thi ma thsümnyi thi ma tsari thi ma tsara thsümnyi tü kümtse naveh.

²²“Jüti sanü nyihzhüvo jümawa küthü, anürü zhupo amüwi küüzhute küthü athsüwa, amüthse kuoh, amükreh künyi masü vü aküthü küüpekenyie thi athüchi azhie wuovü (küpakenühnyunü hamatü saküümtse nyihzhüvo küsa kenüh),

²³thi VÜWA tüvü saküveh amülowa vünüh tiehshuwa, tiehshu vüjuh küthse amüsanüh küveh lohse thi ahzhi müküthse;

²⁴vi nü noh nüh hamari aveh Aron thi ma tsara ke vü thse naveh, thi hamatü VÜWA tüvü kükhurü küsü sanaveh.

²⁵Jüti sanü Aron thi ma tsari ake vünüh jümari vim nü VÜWA tüvü arheküüngu na küsa kenüh kütso kükhurü küsü sanaveh, thi hamatü VÜWA vü anyih vünüh kükhurü küsü küsanaveh.

²⁶“Jüti sanü Aron vü sakümtsekütsüwa nyihzhüvo akhuwa vi nü VÜWA tüvü kükhurü küsü saluo, thi hamatü noh suope sanaveh.

²⁷Atüso thi athüchi navüwa suope, thi nyihzhüvo shiakümwa vünüh kükhurü sakümwa vi nü sakümtse naveh; küpakenühnyunü hamatü Aron thi makeri’a nüh küsa kenüh.

²⁸Hamatü Israel nyiri vünüh Aron thi ma tsari kenüh müja nüh müzhe küpeh huo sanaveh. Küpakenühnyunü hamatü Israel nyiri nüh mari kütsathuo kükhurü vünüh anavüra müthoh vünüh kükhurü küsa kenüh.

²⁹“Aron thsümnyi kümtsewa tü ma süküm sevü küzhiluo nü ma tsari vü tsü naveh, mari vü thsetsü thi mari vü sakümtsetsü na küsa kenüh.

³⁰Ma tsa thawa nüh ma müthoh sanü navü sanaveh ünüh ma nüh kümtsepe vünüh küüroh sa nta juhthsü kükhurüpe lovü tu naveh ünüh jüma nüh Aron thsümnyiri rülo türü vü naveh.

³¹“Aron thi ma tsari vü shiakütsü nyihzhüvo sawa vi nü kümtse azhie küsü vünüh shu naveh;

³²thi juhthsü nazizheh mükhie vünüh Aron thi ma tsari ti nyihzhüvo asa shuküsawa thi lohse amülo lovü tüküvehwa ti tsanaveh.

³³Jüti sanü mari vü shiakütsü thi saküümtsewa kürhehsa zanyori mari nüh tsanaveh, thitü alienyiri thuoüji kütsawanyu, küpakenühnyunü jümari tü kümtse zanyo küsa kenüh.

³⁴Thi shiakütsü sawa nyutü lohsewa mütsakhehra thuoüji kütsatuwa arüne küju müsa tüm nü anyih vünüh tsom luo, jüma tü mütseküm kenüh ma kütsavüh nyu.

³⁵“Hi nüh noh vü mowa zhü tsü nüh jükümjie vünüh sanü Aron thi ma tsari vü rülo türü mari vü shiatsü naveh,

³⁶thi kükhiemuo vünüh kürhehsa kenüh noh tü rülo küsü vü shüvotsa küsüsü fethe nü kükhurü sanaveh. Jüsevü nga noh nüh jüma kenüh kürhehsa küüroh küsa vü kükhurüpewa vünüh kükhiemuo kenüh kükhurü küsü sanaveh, thi jüma sakümtse na küsa kenüh avüjuh nüh jüma thse naveh.

³⁷Rülo türü noh tü kükhurüpewa kenüh kürhehsa küüroh sanü sakümtse naveh, jüti sanü kükhurüpewa tü kümtsetsawa sanaveh, thi küsüküsü nga satü nyutü momowa nga satü jümawa küpari aveh thuoüji mütseteru naveh.

³⁸“Jüsevü nga noh nüh kükhurüpe vü küru kürüzhu rülorülo nyihzhü zah mahvi küsü kükhruo künyi viru kükhurüpe vünüh kükhurü sanaveh.

³⁹Küsü arüne vü thi küpa küsüwa vi münüleh vü ti khurü naveh;

⁴⁰nyihzhü azah apowa vü ahie shüthü küsü thi Olive vüjuh ahuo küsü ti künyarü thi akhah ahuo küsü ti vi nü khurü luo.

⁴¹Thi nyihzhüzah küpawa münüleh vü vi kükhurüwa nga arüne vü kükhurü kümjie asa nga thi akhah nga VÜWA vü anyih nüh tso nü arheküüngu kükhurü sanaveh.

⁴²Jükümjie mükütuo wiethuoh nüh noh wuhleri küju juhthsü kükhurüzheh lehpie vünüh VÜWA vü kütsokükhurü sa peh huo naveh, thi hi nüh jüla nüh noh siemtu nü noh siejüle naveh.

⁴³Jüti sanü hi nüh jüla nüh Israel nyiri siemtu thi eh kütholathovüwa nüh juhthsü kükhurüzheh sakümtsetsü naveh;

⁴⁴thi hi nüh juhthsü nazizhehwa nga, thi kükhurüpewa nga sakümtse tsünaveh, thi eh navü sanü eh küüroh küsana küsa kenüh Aron thi ma tsa nyimpari nga hi nüh sakümtse naveh.

⁴⁵Jüti sanü hi nüh Israel nyiri azhievü peh nü hi tü mari Saküüwuowa sanaveh.

⁴⁶Thi hi tü VÜWA mari Saküüwuowa, hi nüh mari azhievü peh na küsa kenüh Egypt azhih vünüh mari siezhuru ta küsa mari tüthsü naveh; hi tü VÜWA mari Saküüwuowa.