Read Pochuri Naga TSESHUKÜWA 31 Bible Online

TSESHUKÜWA 31 - Pochuri Naga bible

TSESHUKÜWA 31

¹Jüma sevü nga VÜWA nüh Mosa vü,

²“Hi nüh Judah kuoh vünüh Hur azhü kükhruowa, Uri atsa Bezalel chuhmthuoh,

³hi nüh ma tü Saküüwuowa Sietse nüh saküpromthuoh, Küsara, kümahtsa, aküthsü thi asieküzhü vi ma tsümthuoh,

⁴asarie küpapa sana küsa, suna küüroh, rakasa küüroh, sahwuo küüroh,

⁵küloju kenüh aloh küji, athsohküüroh, thi akesie küsüsü nga küsara kümshewa vi ma tsümthuoh.

⁶Thi halie, hi nüh ma sie küüroh kenüh Dan kuoh vünüh Ahisamak atsa Oholiab chuhmthuoh, thi zanyo küsarari aveh vü zanyoküthsü vi nü tsümthuoh, jüti sanü hi nüh noh vü azhütsüküsari aveh masü nüh küüsa nti küsa kenüh.

⁷Juhthsü nazizhehwa nga, povü kütsathuozhü küthseku nga, noküümze pe jüla küpehwa, jüma lovü tsokrüri aveh,

⁸toküsape thi jüma ahuo-khuri, latipe kümtsewa thi ma huo-khuri, sierhe kükhurüpewa,

⁹tso nü kükhurüpe thi ma ahuo-khuri, ketsoku thi ma kütopewa,

¹⁰thsümnyi kümhietsari kürohküsa, navü sanü mari küüroh sana küsa Aron navüwa thi ma tsa nyimpari kümtse thsümnyi,

¹¹kümtse azhiewa kenüh küthse vüjuh thi asierhe küüngu. Hi nüh noh vü momowa sa üta azhütsü nüh jümari aveh mari nüh sanaveh,” ti küza.

¹²Vüwa nüh Mosa vü küza lehü taji,

¹³“Israel nyiri vü, eh kümnyiri saluo, küpakenühnyunü hi thi nohri azhievü noh wuhleri küju thsoshi küsa kenüh, jüüta küsa vü nüh, hi VÜWA nüh nohri sakümtse ta küsa nohri nüh thsüra naveh.

¹⁴Nohri tü kümnyiwa müzhe wie naveh, küpakenühnyunü nohkeri nüh hamatü kümtse kenüh; thawa nüh rülo hama sakümne naveh ünüh müküürhora satsü naveh; thawa nüh hama rülo vü küüroh küsüküsü nga sanaveh ünüh kürholi jüma thuoüji ma nyiri vünüh vijaküm sanaveh.

¹⁵ Rülo tora thuoüji küüroh sanaveh, thitü rülo türüawa thuoüji kümnyi kükheke nü VÜWA vü tsükümtse sheh naveh; thi thawa nüh hama rülo vü küüroh küsüküsü nga sanaveh ünüh ma tü küüsü naveh.

¹⁶Jükenüh Israel nyiri tü kümnyi müzhe naveh, thi kümnyiwa tü mari wuhleri küju müküütuo kütsathuozhü küsü sanü müzhe naveh.

¹⁷ Hamatü hi thi Israel nyiri azhievü küsuokürho thsoshi sanüVÜWA nüh rülo türo atülü thi azhih sanü rülo türüawa thuoüji ma tü münyie nü ma küüsiehra kenüh, ti küza üti” küza.

¹⁸Jüti VÜWA nüh ma sie jüleju küm sevü Sinai Küzhi vünüh Mosa vü Saküüwuowa tüjü nüh kürhü lokhie loh, povü lokhie künyi vi ma tsü.