Read Pochuri Naga TSESHUKÜWA 32 Bible Online

TSESHUKÜWA 32 - Pochuri Naga bible

TSESHUKÜWA 32

¹ Jüti küsa vü Mosa tü aküzhi vünüh turu münüm ünü Israel nyiri tü mari mpa Aron vü ru sezhuh nü ma vü, “Eh türi vü hiri siewa na küsa kenüh shiti nyiazari sa vü hiri tsüluo; küpakenühnyunü Egypt zhih vünüh hiri siezhuküru Mosa hama thuoüji ma vü mowa samthuoh ünüh hiri nü müthsüthuoh ünüh,” ti küza.

²Jüti küsa vü Aron nüh mari vü, “Noh vüvühri, noh atsa nyimpari thi noh atsavühra khüna vü suna narü thorüri vi hi vü raluo,” ti khuo.

³Thinü mari tü mari khüna vü athorü thorüküvehri vi Aron vü ru.

⁴ Jüti küsa vü Aron nüh mari ake vünüh suna vi nü kütohkulovü nüh toh nü mieshüzah küsü satsü; thinü mari nüh, “O Israel, hari tü Egypt zhih vünüh nohri siezhuküru nyiaza thuoh ünüh,” ti küza.

⁵Aron nüh hama küngu vü jümawa tüvü kükhurüpe küsü sanü zie taji, “Thuotü VÜWA vü akhu sanaveh ünüh,” ti küza.

⁶ Jüti küsa vü jüma nyiehrüne vü mari tü rüne kümto süra nü kütso kükhurü sanü kütsathuo kükhurü vi nü ru; jüti sanü mari tü shupeh nü tsa thi zhu, thi süra nü saküzhie ti sa.

⁷Jüti saküveh vü VÜWA nüh Mosa vü, “Kütake vü tsuo luo, küpakenühnyunü Egypt zhih vünüh noh nüh siezhuküru nyiri tü müküleh samthuo ünüh,

⁸mari tü hi nüh lehkhuji küjoküütsawa vünüh shita kürele tewathuoh, mari tü mari mpa nüh mieshüzah lü nü jüma khurü thi jümawa vü küsahthuo sanü, O Israel hari tü nohri nyiaza thuoh, Egypt zhih vünüh nohri siezhuküruwa,” ti küza.

⁹Thinü VÜWA nüh Mosa vü, “Hi nüh anyi hamari nguthuoh, tinü halie, mari tü kükuoti nyiri wiethuoh;

¹⁰tinü hi mükhe tümluo, hi nüh eh rükümtho juzhuru nü mari tsoküüra sa wie naveh; thitü noh vünüh thuoüji akuoh küji küüsanaveh ünüh,” ti küza.

¹¹Thitü Mosa nüh wurie VÜWA ma Saküüwuowa vü khuo taji, “O VÜWA, noh tü mokenüh noh mpa noh kükhra küji thi noh ke kükrü vünüh Egypt zhih vünüh küvizhu noh nyiri vü noh tsoküüsa rükümtho kükeke nti saveh lo?

¹²Noh tü noh nyiri aküzhi vünüh zothe kheh nta müshe nü Egypt vünüh siezhuwa savehthuoh ta küsa Egyptri nüh küüphrahtera küsa nti sa veh ülo? Müküpetera noh rüküshuwa vünüh kürele luo, thi noh nyiri vü kümsü sa nti saküvehwa vünüh khaphrüm luo.

¹³Noh siepe Abraham, Isaac thi Israel vü, hi nüh noh küshukürari tü atülü vü awutsiri kümjie saküzhitsü naveh, thi azhih hamari aveh vi noh küshukürari tsü naveh, thi küsuokürho mari nüh küürho naveh ta phrahteke nü noh mpa nüh küshie küsa müsheluo,” ti küza.

¹⁴Thinü VÜWA tü ma nyiri vü kümsü sa nta müshe küvehwa vünüh ma müshe khaphrüm le.

¹⁵Jüti sanü Mosa tü pohvüzhü lokhiewa künyi vi nü kürele taji aküzhi vünüh tsuo, lokhie künyikhürü rügivü nga rhüke kheh.

¹⁶Lokhie künyi khürü nga Saküüwuowa küüroh thi ma mpa nüh jümasü rügivü kürhüke kheh wie.

¹⁷Jüti küsa vü Israelri nüh küzie jikhi Joshua nüh küünara vü ma nüh Mosa vü, “Kürünape vü arie küsa khi savehthuoh” ti küza.

¹⁸Thitü Mosa nüh, “Akhi jüma tü küchara khi nga nyu, thi chaküm khi nga nyu thitü azah saküveh hi nüh künaraveh,” ti rületsü.

¹⁹Jüti sanü ma tü kürünape tse shehnyiru ünü mieshüzahwa thi akütsih ngukera, thinü Mosa rükümtho tü küluozhuteru nü müküzhikera wiethuoh nüh alokhie künyi tü vehjaküze nü aküzhijih vünüh külokhuom.

²⁰Thi mieshüzah mari nüh küsawa vi nü anyih lovü nüh tso nü tohnya taji ajuh vü kürhüke nü Israel nyiri küüzhu kheh.

²¹Jüti sanü Mosa nüh Aron vü, “Anyi hamari nüh noh vü mokümjie sanü noh tü kükhiemuo küji mari vü virumthuohlo?” ti küza.

²²Thinü Aron nüh, “Eh vüwa rüküshuwa tü müküsale tümluo; mari nüh kümsü küsa noh nüh thsü nü,

²³küpakenühnyunü eh türi vü küwa kenüh nyiazari sa hiri tsüluo, Mosa, Egypt zhih vünüh hiri vizhuküruwa thuoüji mowa samthuoh ünüh hiri tü müthsüthuoh,” ta küza.

²⁴Jüta küsa vü hi nüh mari vü, “Nohri thari nüh suna pehveh ünüh viru hi tsüluo ti küüza vü mari tü viru hi tsü thi hi nüh jüma anyih lovü thse ünü mieshüzahvo hama shulie,” ti küza.

²⁵Thinü Mosa nüh mari kürho küketera vü peh mküveh künguvü (küpakenühnyunü Aron nüh mari kürho müküüketera satsü nü mari mükünongüra tüvü küzükrü saküm kenüh),

²⁶ma tü kürünape akheri vü tsie taji, “Thari VÜWA vü tsieveh lo? Hi vü raluo,” ti küza. Thinü Levi atsa nyimpari aveh tü ma wuovü tsekewa sezhuh kheh.

²⁷Thinü Mosa nüh mari vü, “Israel VÜWA Saküüwuowa nüh nohri küsüküsü nga anyuchuwa pevü nü kürünape vü akheri küsü vünüh küsü vü tsewatseru ti sanü ma jienü, ma füri thi ma zhephruri zothem üta küzaveh,” ti küza.

²⁸Jüta küüza vü Levi atsa nyimpari tü Mosa zhü küna nü jüma rülovü anyi anyieh küche kümjie zothem.

²⁹Thinü Mosa nüh, “Nosü nohri tü noh tsari thi ajienüri zothe nü VÜWA küüroh kenüh nohri mpa nohri sakümtsemthuoh, jüta küsa vünüh VÜWA nüh tsia nohri rügivü tsüna küveh kenüh,” ti küza.

³⁰Rülo jüma nyieh Mosa nüh mari vü, “Nohri tü kükhiemuo küji küsü samthuoh. Tinü hi tü khinyi thuoüji aküzhi rügivü VÜWA vü müwa le üji mümhiethuoh, eh kümshe vü nohri kükhiemuo kenüh kütsathuora sana tünüh,” ti küza.

³¹Jüti sanü Mosa tü VÜWA vü shele ru taji, “Anyi hamari tü mari mpa nüh suna nüh nyiaza sanü kükhiemuo küji samthuoh.

³²Thitü noh müshe thuoüji mari kükhiemuo nojatsüluo, nyuthuoüji hi nüh noh vü khuoveh, tinü eh nyo noh lasipha lovü rhüke küsawa vünüh vizhujam luo,” ti küza.

³³Thitü VÜWA nüh Mosa vü, “Thari nüh hi vü kükhiemuo samthuoh ünüh hi nüh jümara nyo eh lasipha lovü nüh künejam naveh.

³⁴Tinü waluo, thi anyiri sie nü hi nüh noh vü küüza azhievü sietewaluo; halie, eh zhülewa noh tüvü wa naveh ünüh. Thi hi nüh küru vü mari nüh khiemuo kümwa kenüh hi nüh noh nonaveh ünüh,” ti küza.

³⁵Jüti küsa vü VÜWA nüh mari vü kümnomna tsü, küpakenühnyunü Aron nüh mieshüzah küsawa mari nüh küsa kenüh.