Read Pochuri Naga TSESHUKÜWA 34 Bible Online

TSESHUKÜWA 34 - Pochuri Naga bible

TSESHUKÜWA 34

¹Jüsevü VÜWA nüh Mosa vü, “Tükhuwa kümjie lokhie loh künyia savi le luo. Jüti sanü tükhuwa loh künyi noh nüh zokhuo kümwa vü kürhüke kümjie hi nüh rhüketsü le naveh ünüh.

²Arüne vü küche nü aküzhi rügi vünüh noh mpa nüh hi mütu na küsa kenüh Sinai küzhi vü ru luo.

³Nyi küsü nga noh sie müru tümluo, aküzhi müri küru vü aletsa vü nyi küsü nga nüh noh müküüngu tüm, thi küzhijih vü nyihzhü, ase-ashuh küsü nga ashie müküümrhuo tümluo,” ti küza.

⁴Jüti küüza vü Mosa tü lokhie loh künyi savi nü rüne kümto süra nü VÜWA nüh ma vü azhükütsü kümjie lokhie loh künyi ma ke vü vi nü Sinai küzhi vü müriwa.

⁵Thinü VÜWA tü akülu vünüh turu ma kütuoh vü ma sie tsie nü VÜWA nyo küzaküthsütsü.

⁶ VÜWA nüh ma tüvü tsekewa nü, hi, “VÜWA, noküümzeshewa thi külozhi Saküüwuowa, arü shita mküshuwa, mükhaphrükhale wiethuoh nüh külo shehwa, künyitsazhütsawa,

⁷anyi anyienyie kenüh kümze küpehwa, kümsü küsa, müküleh küsa thi kükhiemuo noküjawa, thitü müküleh küsari thuoüji müküjarawa, apara müküleh kümlie atsari vü thi atsa atsari wuhle küche müzü küju nga sakütsüwa,” ti küza.

⁸Thinü Mosa tü prelepreza azhih vü ma lü vü küngie tsuo nü khurü.

⁹Thi ma nüh, “O VÜWA, hi khinyi noh notha vü küütso pehtsavehthuoüji, hi nüh noh vü khuoveh nü, ma mpa nüh Israel nyiri tü luoveh kükhori wie ketünga VÜWA mpa nüh eh zhieri vü nyiküwa saluo, thi hiri kümsü küsa thi kükhiemuo küsa nojatsü nü hiri vi nü noh ka küviri küsaluo,” ti küza.

¹⁰Thinü ma nüh Mosa vü, “Halie, hi nüh Israel nyiri sie kütsathuozhü sanaveh. Jüma thuoüji azhih aveh vü thi akuoh küsü azhievü nga müjie küsa küükrükükra hi nüh noh nyiri aveh tüvü sanaveh; thi anyiri nohri azavü küpehri nüh VÜWA küüroh ngu naveh; küpakenühnyunü hi nüh nohri vü küükrükükra satsü naküveh kenüh.

¹¹“Hi nüh nosü mowa zhü tsüveh ünüh müzhe luo. Halie, hi nüh nohri tüvü nüh Amorri, Kananri, Hitri, Perizri, Hivri, thi Jebusri zhejam naveh.

¹²Noh nüh azhie wa na saküvehri vü kütsathuozhü müsanüh sana küsa kenüh thi nohri azavü küjurü müpeh nüh sana küsa kenüh noh mpa nüh azhüzhüluo.

¹³ Mari kükhurüpe zoriejamtüluo, mari tovühri ferie mtüluo thi mari kükhurü thsoh rechiem luo.

¹⁴Küpakenühnyunü noh tü nyiaza[3] küpa kükhurüwa nyu, VÜWA nyo tü noküüjizhi, ma tü noküüjizhi Saküüwuowa küsa kenüh,

¹⁵ma nüh krü küveh thuoüji noh azhih jüla rho küvehri vü kütsathuozhü sam üsü ta küsa kenüh, mari nyiaza vünüh küüphroküphrie sa, mari nyiaza vü küsahthuo sa, nyi küsü nüh noh ji nü mari kütsüna sa tsa,

¹⁶noh tsari tü ma tsavühri küüvi, jüti sanü ma tsavühri nüh mari sie nü mari nyiaza vünüh küüphroküphrie sa, thi noh tsari nüh mari nyiaza vünüh küüphroküphrie sa, ti sa üsü ti küsa kenüh.

¹⁷ “Thi nohri mpa nohkeri nüh amürü nyiazari küsawa nyu.

¹⁸ “Ahzhi müküthse lohse khuwa sawie naveh. Hi nüh noh vü azhükütsü kümjie, kürühke küsawa Abib asa vü rülo türü ahzhi müküthse lohse tsanaveh; küpakenühnyunü nohri tü Egypt vünüh Abib asa vü tseshu küru kenüh.

¹⁹ “Kütsa khuwa eh zhi, noh seshuh avo aveh, mieshü nga satünyihzhü nga satü kütsa khuwa thuoüji eh zhi.

²⁰ Rawuh küzahwa atsa thuoüji nyihzhüzah küsü nüh rhehsa vi naveh, thitü noh nüh jüma mürhehsara thuoüji ma ku küreshimtü naveh. Atsa nyimpa pokhuri aveh thuoüji noh tü rhesanaveh. Thi nyi küsü nga eh tüvü kürütso mürura.

²¹ “Rülo türo thuoüji noh tü küroh naveh, thitü azhuh kükhahu vü nga satü thi kümahwie vü nga satü rülo türüawa thuoüji münyie wie naveh.

²² Thi noh tü zhie akhuri müzhe naveh, hiemtha kümahwie pokhuwa thi mahvi sehkhe vü luoshü aveh kümthuo khu nga sanaveh.

²³“Mahvi küsü vü küchekeri nohri atsa nyimpari aveh VÜWA, Saküüwuowa, Israel Saküüwuowa tüvü ru kütsa naveh.

²⁴Hi nüh noh tüvü nüh akuoküjiri vijam nü noh zhih natonahuori saküjitsü naveh; thi mahvi küsü vü küchekeri noh VÜWA Saküüwuowa tüvü wa wie ketünga nyi küsü nga nüh noh zhih kümnguwa nyu.

²⁵ “Noh nüh azüh vi nü hi vü küsahthuo kükhurü küsa vü ahzhi küthse lohse vi nü müsa tümluo; jü mpa mükünyu tsekükari akhu küsahthuowa rüne küju tsatu müsa tümluo.

²⁶ “Mahvi kürüzhu noh nüh kümahwie avi pokhuwa vi VÜWA noh Saküüwuowa zheh vü viru naveh. Thi nyihnyihzah asa vi ma vühwa tünüjuh vünüh müshu tümluo,” ti küza.

²⁷Jüsevü nga VÜWA nüh Mosa vü, “Noh tü azhü hamari rhü luo, küpakenühnyunü hi nüh noh thi Israel sie kütsathuozhü küsatü hama müzhe nü küsa kenüh,” ti küza.

²⁸Jüti sanü Mosa tü mütsa müzhu wiethuoh nüh jüla VÜWA sie nü rülo zürake thi rüza zürake peh. Thi jüti sanü lokhie rügi vü kütsathuozhü, azhükütsü türakewa rhü.

²⁹ Mosa tü pohvü kürhü lokhie loh künyi ma ke vü vi Sinai Küzhi vünüh turu ünü ma nüh Saküüwuowa sie jüle nü küturu kenüh ma nyieh tü wierake nü turu tü ma tü müthsü nüh sam.

³⁰Jüti küsa vü Aron thi Israel nyiri tü Mosa küngu vü, halie, ma nyieh asahu tü wierakeküm kenüh mari tü ma vü shehnyi küru krütewa.

³¹Thitü Mosa nüh mari küji vü, Aron thi ashiejiwa sierhüri tü ma vü sheleru nü Mosa nüh mari sie jüle.

³²Asevü thuoüji Israel nyiri aveh ma vü shehnyi ru, thi Sinai Küzhi vünüh VÜWA nüh ma vü azhükütsü aveh mari vü tsü kheh.

³³Jüti sanü ma nüh mari sie jüleju kümsevü ma tü athsü nüh ma nyieh tiehtem;

³⁴thitü ma nüh juhthsü-kükhurüzheh lovü VÜWA tüvü tu nü ma sie jüle nta küwa vü ma nyieh kühietewa tü ma nüh alievü müjie shele küshuru küju nü fomü müti sa,

³⁵Israel nyiri tü Mosa nyieh sahu tü küwierake küngu kenüh ma shele wa VÜWA müjie küjüle küju nü ma nyieh hietemümü tisa.