Read Pochuri Naga TSESHUKÜWA 35 Bible Online

TSESHUKÜWA 35 - Pochuri Naga bible

TSESHUKÜWA 35

¹Jüsevü Mosa nüh Israel anyi ashieji aveh jizhuh nü mari vü, VÜWA nüh “Hamari tü nohri nüh sa üta kütsü.

² Rülo türo thuoüji küüroh sanaveh, thitü rülo türüawa thuoüji kümtse kümnyi sanü VÜWA vü vikümtse sheh nü münyie naveh; thawa nüh hama rülo vü küüroh küsüküsü nga sanaveh ünüh zothe wie naveh,” ti küza.

³Kümnyi rülo vü thuoüji nohri kürhope aveh vü anyih küsawanyu.

⁴Mosa nüh Israel anyi ashieji aveh vü, “Zanyo hamatü VÜWA nüh azhükütsü.

⁵Nohri azhievü nüh VÜWA vü zanyoküthse saluo; lozhe nü VÜWA vü zanyoküthse pehveh üji: suna, rakasa, sahwuowa;

⁶alo khehm, küsümo, kümruphieke, mürilo küphri, nyihsü küneh,

⁷nyihzhüvo sahu saküükhro, nyihsü sahu, amüse,

⁸latiwa kenüh vüjuh, viküthsewa vüjuh kenüh sierhe küüngu,

⁹aloh kükhrüpuo, aloh küloju kenüh, navükruzhu thi tüso kühietewa kenüh.

¹⁰“Jüti sanü VÜWA nüh azhükütsü kümjie nohri azhievü küsarari aveh thuoüji ra nü juthsü kükhurüzhehwa saluo:

¹¹juhthsüzhehwa thi ma kühietewa, ma kühateri thi awiehri, arüpe tovüri, azheh tovühri; kütokeperi;

¹²kütsathuo talowa thi ma tsükhie, noküümze pewa, küzietethsüwa;

¹³toküsapewa thi ma tsükhie; ma huokhu aveh, küütsa lohse;

¹⁴latiku kenüh latipewa, ma huo-khuri thi ma nyihkuwa; thi akütso kenüh vüjuh;

¹⁵asierhewa kükhurüpe, thi ma tsükhieri, aküthse vüjuh thi asierhe küüngu, juhthsü kükhurüzhehwa kenüh küzietethsü;

¹⁶kütso kükhurüpe thi ma tahthsü sahwuo nüh küsa, ma tsükhieri, ma huo-khuri aveh, ketsoku thi ma kütokepe;

¹⁷anyulavü küzietethsüri, rüpethsohri thi kütokeperi, anyula kheriwa küzietethsüwa;

¹⁸jühthsü kükhurüzheh küzetevüh thi anyula vü küzetevüh, aliri;

¹⁹kümtsepe vü küüroh küsa kenüh thsümnyi kümhieri, Aron thi ma tsari nüh navü sanü küüroh küsa vü kümtse thsümnyiri sakhe luo,” ti küza.

²⁰Jüsevü Israel nyiri müzawa tü Mosa tüvü nüh porietewa.

²¹Jüti sanü mari thara luoveh tsotsü nüh thi thawa müshe küngah tsü nüh juhthsü nazizheh vü küvi VÜWA vü zanyoküthse, jüla küüroh aveh kenüh thi kümtse thsümnyiri.

²²Mari aveh nga, nyimpariluo thi nyimzariluo küüteh tsokrü, athorüri, tüjükhe tsükieri, akhih, suna sitheri, aveh vi VÜWA vü sakümtse nü tsü.

²³Nyimpari thari nüh alo khehm, küsümo, nyutü kümruphieke, mürilo, nyihsü küneh, nyihzhüvo sahu saküükhro thi nyihzhüsahu küpehri thuoüji viru kheh.

²⁴Thari nüh rakasa thi sahwuo vi VÜWA vü kütsüra pehveh ünüh viru VÜWA vü kütsü saluo; thari nüh amüse peh nü küüroh küsüküsü kenüh nga küsara pehveh ünüh kütsü sa.

²⁵Thi nyimzari thari nüh ake vünüh alo küshüra pehveh ünüh akhehm, küsümo, kümruphieke thi mürilo shü nü viru thse;

²⁶nyimzari thara luoveh nüh küchü tsü nü küsara vü pehveh ünüh nyihsü küneh shü nü viru thse.

²⁷Thi sierhüri nüh kükhrüpuo lohri thi küloju kenüh aloh viru thse kheh, thi navükruzhu kenüh, tüso kühiete kenüh,

²⁸asierhe, alati kenüh avüjuh, aküthse kenüh avüjuh, asierhe rheküüngu.

²⁹Nyimpari nga nyimzari nga Israel nyiri aveh VÜWA küüroh kenüh Mosa vü sa üta azhükütsüri sana küsa kenüh mari luoveh kütsori aveh thuoüji apasheküthse VÜWA vü kütsüzanyo küsüküsü nga viru kheh.

³⁰Jüsevü Mosa nüh Israel nyiri vü, halie, VÜWA nüh anyo müjü wie taji Judah kuoh vünüh Hur azhü kükhruowa, Uri atsa Bazalel jimthuoh;

³¹thi Saküüwuowa Sietse nüh ma saküpromthuoh, küsara, kümahtsa, aküthsü thi akesieküsathsü,

³²asürie küpapa küsa arori: suna küsa, rakasa küsa, sahwuo küsa,

³³aloh küloju kenüh aloh küji, athsoh küüroh thi kümahtsa küüroh aveh ma vü tsümthuoh.

³⁴VÜWA nüh küsara vi ma vü thi Dan kuoh vünüh, Ahisamak atsa Oholiab vü tsü nü küpari nga küsosiera tsümthuoh.

³⁵Asie küsari nüh akesie aveh küsara kümahtsa: asie küsari, sarie küsari, athsükütori nüh küsa: akhehm küüroh, küsümo küüroh, kümruphieke küto, mürilo nüh küüroh, athsükütori nüh akesie aveh thi asarie aveh küsara kümahtsa vi masü tsümthuoh.