Read Pochuri Naga TSESHUKÜWA 36 Bible Online

TSESHUKÜWA 36 - Pochuri Naga bible

TSESHUKÜWA 36

¹Bezalel, Oholiab thi küsarari thathari vü VÜWA nüh küsara thi kümahtsa thsetsü nü küüroh küsüküsü nga mokümjie kümtse kükhurüzhehwa sa üta azhütsü saveh ünüh jüüta vünüh sanaveh, ti küza.

²Mosa nüh Bezalel thi Oholiab thi küsarari aveh, VÜWA nüh mari luoveh lovü küsara thsetsü küsa thara luoveh küchü nü ru küüroh sa üta küza saveh ünüh aveh ji kheh;

³jüti sanü mari tü Israel nyiri nüh lozhe nü kümtsezhehwa küüroh kenüh zanyo viru küthseri vi kheh. Thi rüne kürüzhu anyiri tü zanyo viru thsepeh huo wie,

⁴jüüta küsa vünüh anyiri zanyo küsarari tü papa küsa küüroh rügivü nüh kümtsezhehwa vü ru,

⁵thi Mosa vü, VÜWA nüh “Hiri sa üta azhükütsü anyiehvü nüh zanyo khielota küüroh kenüh anyiri nüh viru thsevehthuoh,” ti küza.

⁶Jükenüh Mosa nüh azhütsü, thi kürünape aveh vü azhüwa zhüchüh taji, “Nyimpari nga thi nyimzari nga kümtsezhehwa kenüh zanyoküthse müsale tümluo,” ti küza. Thinü nyiri tü zanyo viru küthse letewa;

⁷küüroh kenüh mari nüh zanyo viküruri tü waleküm sa, thi küüluoh nga sa.

⁸Jüti sanü küüroh küsari azhievü küsarari nüh küzietethsü türake nüh juhthsü-kükhurüzheh mürilo nüh, akhehm nüh, küsümo nüh, thi kümruphieke nüh kürhosawa mütsa sheh nü rheke nü sa.

⁹Küzietethsü aveh ma chu thuoüji kha mükeke nü tüze, thi aveh thuoüji kha müzü, thi küzietethsü aveh küüte zarike vünüh sakheh.

¹⁰Jüti sanü münganga künyi kürürhieke.

¹¹Thi kürürhie küsa pokhuwa apotetsari thuoüji akhehm nüh athsühu sa, thi küürü rhiekünyiawa nga jükümjie vünüh sa;

¹²küürü künyikhürü vü athsühu tünyienyie sa, jüti sanü athsühuri tü küwiejieluo.

¹³Thi suna nüh kühakeluovüh tünyieke sanü küzietethsüri tü harü nü juhthsü-kükhurüzhehwa tü kheti ziete sa.

¹⁴Jüsevü nga juhthsü-kükhurüzhehwa hiete na küsa kenüh ma nüh nyihsü küneh nüh küzietethsü türaluoke sa.

¹⁵Küzietethsü aveh nga achu kha cherara, thi ma veh thuoüji kha müzüzü, ti sanü küzietethsü aveh achu nga aveh nga zarike kheh.

¹⁶Küzietethsü müngari kürü rhie kheh, thi küpa türori kürü rhie küpa ti sa.

¹⁷Jüti sanü kürü rhie küsa pokhuwa potewa vü athsühu tünyieke küpe, thi küpawa vü nga athsühu tünyieke küpe, ti sa.

¹⁸Hamasü harüluo nü küsü sana küsa kenüh küharüluovüh tünyieke asahwuowa nüh sa.

¹⁹Thi juhthsüzheh nyiehvü küzhutena küsa kenüh nyihzhüvo sahu thi nyihsü sahu saküükhro.

²⁰Jüsevü nga azie kümtoküfeke kenüh amüsezhü nüh sa.

²¹Thi azieri tü achu kha türake thi aveh kha küsü nü küzhila.

²²Azie aveh fekerüna küsa kenüh awieh küsü vü phiehnyo künyinyi küüpe.

²³Hakümjie vünüh ma nüh juhthsü kükhurüzhehwa azie sanü lah wuovü kenüh awieh mükeke sa;

²⁴awieh mükeke kükhu vü kütokepe zürake rakasa nüh sa, kühakepe künyi vü awieh küsü kenüh kütokepe künyinyi sa, thi awieh küpawa kenüh nga kütokepe künyinyi sanü kühakepe nga künyinyi sa.

²⁵Thi Juhthsükükhurüzheh küpa wuovü, wieh wuovü nga awieh mükeke sa,

²⁶jüti sanü rakasa nüh kütokepe küsa zürake, azie küsü akhujih kütokepe künyi thi awieh küpa küsüwa khujih vü kütokepe künyi, ti sanaveh.

²⁷Jüti sanü juhthsü-kükhurüzheh tüku zhietu wuovü awieh türo sa.

²⁸Thi atüku jühke wuovü awieh künyi sa.

²⁹Asaji vü thuoüji mükütsarü nüh alüvü akie pokhuwa vünüh kütsarü nü jühke künyi jükümjie vünüh sa.

³⁰Rakasanüh khuhji küsa azie tüze: azie küsü vü kütokepe künyinyi thi aveh thuoüji türatüro.

³¹Jüti sanü ma nüh arüpe tovüh amüse nüh sa, thi juhthsü kükhurüzheh wuochuhwuovü azie münga,

³²thi wuochuhwuovü azieri kenüh arüpe tovüh münga, atüku vü zhietu wuovü azie kenüh arüpe tovüh münga.

³³Jüti sanü ma nüh tovüh azhilawa küzhila vünüh ziehluo nü athsopo thsopo künyi tü wa azievü tsüke.

³⁴Jüti sanü azieri tü ma nüh suna nüh zhete, thi suna akieri tü atovühri vüte nü atovühri tü suna nüh zhete.

³⁵Jüti sanü athsü küzietewa tü akhehm, küsümo, kümruphieke thi mürilo nüh ziete nü jüma nyiehvü asiezhü sheh nü kürhosawa rheke.

³⁶Jüma kenüh ma nüh müsethsoh vi nü tovüh müzü sataji suna nüh zhete, thi kühakeluori tü suna nüh sanü jümari kütokepe tü rakasa nüh müzü sa.

³⁷Jü mpa mükünyu ma nüh lehpie küthuotethsü akhehm, küsümo, kümruphieke thi mürilo nüh khe küto nüh thuote;

³⁸thi jüma tovüh müngari tü kühakevüh küpe kheh. Thi tovüh jü müngari alü vü thi ma kükhetevühri thuoüji suna nüh küzhute thi kütokepe müngari thuoüji sahwuowa nüh küzhute.