Read Pochuri Naga TSESHUKÜWA 37 Bible Online

TSESHUKÜWA 37 - Pochuri Naga bible

TSESHUKÜWA 37

¹Jüsevü Bezalel nüh küthsekuwa amüse nüh sa, ma chu thuoüji kha künyi nü küzhila, ma veh nga kha küsü nü küzhila thi kümsie nga kha küsü nü küzhila, ti vünüh sa.

²Thi alovü nga thi alievü nga suna latha nüh küzhute nü suna phrikürülo nü anato aveh lüte kheh.

³Jüti sanü suna nüh akieveh müzü sa: akieveh künyi wuochuh wuovü thi akieveh küpa künyi wuochuh wuovü ti kheke.

⁴Thi athsokhie sanü suna nüh küzhute,

⁵jüti sanü atalowa kha na küsa kenüh athsokhiekünyi tü anato künyi akieveh lovü mürike.

⁶Thi suna latha nüh ma nüh noküümze pe küsü sa; ma chu kha künyi nü küzhila thi ma veh thuoüji kha küsü nü küzhila ti vünüh sa.

⁷Jüti sanü atsüvü nüh suna kütsüh nü noküümze pe nato künyi vü kürhosa sake,

⁸kürhosa küsü wuochu wuovü thi küpawa küsü wuochu wuovü, thi noküümze pe vünüh ma nüh kürhosa künyi sazhu.

⁹Kürhosa künyi aküsa tü noküümze pewa nyiehvü shohküta nü jüma kete, thi masü anyieh tü küprükeluo nü masükhürü nga noküümze apewa vü küprüke kheh.

¹⁰Jüsevü nga ma nüh amüse nüh toküsape küsü sa: ma chu thuoüji kha künyi, aveh thuoüji kha küsü thi ma kümsie thuoüji kha küsü nü küzhila ti vünüh sa;

¹¹jüti sanü ma nüh suna latha nüh vi küzhu nü suna phri kürülo nü nato aveh lüte kheh.

¹²Thi amüza rike nüh apote aveh küzhute nü suna phrikürülo taji anato aveh lüte kheh.

¹³Thi jüma kenüh suna akieveh müzü sanü ajühke vü ajih müzü vünüh jümari kürite.

¹⁴Jüti sanü atsükhie thse nü toküsapewa khana küsa kenüh apotevü akieveh küpe.

¹⁵Atsükhie tü ma nüh amüse nüh hu nü suna nüh küzhute.

¹⁶Thi ahuokhu tü toküsape rügivü küsari tü ma nüh suna latha nüh vi sa: akhuri, aküfü asierhe thsena küsa kenüh, asüzahri thi kükhurü tsotho vü akhah thsena küsa kenüh aleh huori ti ma nüh sakheh.

¹⁷Ma nüh suna latha nüh latipe nga sa. Latiwa thi ma thsohwa tü atsüvü nüh küüroh sa kheh; ma huori, ma lüri thi ma küwuri tü athsoh küsüvü küüpe kheh.

¹⁸Jüti sanü jüma rügivü nüh atsuona türo küüshu; anato wuochu wuovü atsuona küche thi küpa wuochu wuovü küche ti küshu;

¹⁹ahuo küche tü akha kümjie vünüh saluo, jümari aveh nga ma khujih thi ma küwu sanaveh, atsuona küsü vü, thi akha kümjie küsa ahuo küche sanaveh, jümari aveh nga ma khujih thi aküwu küüpe kheh, küpa wuovü nga jükümjie sanü latipe rügivü atsuona türo küüpe naveh.

²⁰Latiwa vü mpa nüh akha kümjie küsa ahuo müzü sanü ma khujih thi ma küwu küüpe,

²¹Akhujih küsü vünüh atsuona künyinyi shu nü khujih türo aveh jükümjie küshu kheh naveh.

²²Ma khujihri nga thi ma tsuonari nga zarike; mari aveh nga suna latha nüh atsüvü nüh kütsüh nü sa.

²³Jüti sanü ma nüh nyihku türü ma kümkoteri, nyaphrükhuri suna latha nüh sa.

²⁴Ma nüh jüma thi ma ahuo-khuri suna latha küüto cherake nü münga nüh vi sa.

²⁵Jüsevü nga ma nüh amüse vi nü sierhe kütso kükhurüpe küsü sa. Thi jüma tü ma chu nga thi ma veh nga kha küsüsü, jüti sanü küvehjie; thi ma kümsie thuoüji kha künyi; thi ma rütsüri aveh vehküsü vünüh küüshu kheh wie.

²⁶Anyiehvü nga, natovü nga thi ma rütsüri aveh suna latha nüh sa kheh; jüti sanü potepote aveh suna nüh lüte kheh,

²⁷thi lüte küsa kükhu vünüh suna akieveh sanü jühke künyi küwiejieluo, atsükhie thse nü jüma kha na küsa kenüh küpeke.

²⁸Jüti sanü amüse nüh atsükhie künyi sanü suna nüh küzhute.

²⁹ Ma nüh kümtse küthse vüjuh thi sierhe arheküngu küsari nüh küsa kümjie masü wurü.