Read Pochuri Naga TSESHUKÜWA 38 Bible Online

TSESHUKÜWA 38 - Pochuri Naga bible

TSESHUKÜWA 38

¹Jüsevü nga ma nüh müsethsoh vi nü kütso kükhurüpe nga sa. Achu nga thi aveh nga kha münganga sanü küvehjierüji; thi ma kümsie thuoüji kha küche.

²Ma nüh jüma kenüh ajühke müzü vü arütsü sake thi arütsüri aveh zarike vünüh jüma rügivü sake nü sahwuo nüh küzhute kheh.

³Thi ma nüh kükhurüpewa ahuo-khuri sa kheh, aküfüri, küüzhievühri, ketsokuri, akhatsi kühavühwari, atathsüri: hamari aveh nga ma nüh asahwuo nüh sa kheh.

⁴Jüsevü nga ma nüh kükhurüpe kenüh sahwuo nüh nyihkütsope sanü kükhurüpe kükhu vü thse nü azhievü küüpeke.

⁵Atsükhie thse na küsa kenüh sahwuo nüh nyihkütsope saküsawa jükeh müzü vü akieveh müzü sake;

⁶atsükhiewa tü amüse nüh sanü sahwuo nüh küzhute.

⁷Kükhurüpewa tü ma nüh awieh nüh küsa kenüh awu küpie, thi hama kha na küsa kenüh ajühke müzü vü akieveh saküsa vü atsükhie künyi mürike.

⁸ Jüsevü nga ma nüh ketsoku nga thi ma khujih nga sahwuo nüh sa, jüma tü müzakümhu juhthsüzheh lehpie vü anasa nyimzari nyikünovühwa vünüh vi nü sa.

⁹VÜWA küpeh juhthsü-kükhurüzheh nyula ma nüh sa, zhiese wuovü thuoüji mürilothsüwa kha müzake nüh sa;

¹⁰atovüh nga mükeke thi kütokepe nga sahwuo nüh küsa mükeke, thitü atovühra kühatevüh thi kükhete thuoüji rakasa nüh sa.

¹¹Thi zhietü wuovü kha müzake, atovüh nga thi kütokeperi nga sahwuo nüh küsa mükeke.

¹²Zhietu wuovü athsü küziete kha tünyieke, tovüh türake thi ma nyo nga türake, thi ma kühatevüh thi kükhete thuoüji rakasa nüh sa.

¹³Atüvü zhieshu wuovü thuoüji kha tünyieke.

¹⁴Küzietethsü wuochu wuovü kenüh kha türamnga, atovüh küche thi kütokepe küche.

¹⁵Jüti sanü küpa wuochuh wuovü, anyula kheri küzietethsü ake hawuovü thi tuwuovü ti kha türamnga, atovüh küche thi kütope nga küche.

¹⁶Anyula vü küziete kümkielethsü aveh mürilo nüh kütokheh.

¹⁷Thi atovüh kenüh kütope aveh sahwuo nüh sakheh, thitü atovüh vü kühakeri thi kükheteri thuoüji rakasa nüh sa; jümara khujih nga rakasa nüh küzhute, thi anyulavü tovüh aveh rakasa nüh kükhete sakheh.

¹⁸Thi anyulavü akheriwa küthuotethsüwa tü athsü akhehm, küsümo, kümruphieke, thi arüje nüh kheküto küüroh khe; ma veh vü aküsuo kha mükeke thi ma kümsie kha münga, anyulavü küzietethsüwa kümjie.

¹⁹Ma tovühri tü müzü; kütope müzüri tü sahwuo nüh sa, thi ma kühatevühri tü rakasa nüh küzhute.

²⁰Jüti sanü juhthsü-kükhurüzhehwa thi anyulavü zete küüzüleri tü sahwuo nüh sakheh.

²¹Juhthsü kükhurüzhewa, pohvüwa juhthsü kükhurüzhehwa kenüh Aron navüwa atsa Ithamar nüh küjokütsü vünüh Levira küüroh kenüh Mosa nüh azhükütsü vünüh künyirhie viküm mari nüh küürüh hamari.

²²Judah kuoh vünüh Hur atsa Uri ta küsawa atsa Bezalel nüh VÜWA nüh Mosa vü azhükütsü aveh sakheh;

²³thi ma sie zanyo küsawa Dan kuoh vünüh Ahisamak atsa Oholiab tü akhehm vü nga, küsümo vü nga, kümruphieke vü nga thi mürilothsü vü nga asie thi asarie thi atsorhe küzhüthsü küsü sa.

²⁴Kümtsezhehwa küüroh aveh küsa vü suna viru küthse vünüh viküm küüto anyie küsü, hama küüte tü kümtsezhehwa vü küüte vünüh küüte.

²⁵ Thi rakasa thuoüji nyito küchie vünüh küüte küüto anyie küche müza müzü nü cherake, hama küüte tü kümtsezhehwa vü küüte vünüh küüte:

²⁶ Nyito küchie nyimpari mpa mahvi mükeke nüh wiehvü küsajianyie müza türo nü küche müza münga tünyieke nüh küüto küzhilala viruthse, hama küüte tü kümtsezhehwa vü küüte vünüh küüte.

²⁷Rakasa küüto anyie küche nü müza müzü thuoüji kümtsezhehwa kütokepewa thi küzietethsüwa kütokepe kenüh kütokepe müzake vü rakasa kete. Anyie küche nü müzamzü, kütokepe küsü vü küüto cherake nü müzü.

²⁸Thi kümnyie rakasa küüto cherake thuoüji Bezalel nüh atovühri kenüh kühakevüh sa, thi akhujihri küzhute thi jümari kenüh kükhetevüh sa.

²⁹Thi sahwuo viru küthse thuoüji küüto anyie künyi müza müzü mükeke nü münga;

³⁰Bezalel nüh hamari vi nü juhthsü kükhurüzhehwa tovüh kütope, kükhurüpe sahwuowa, tahthsü sahwuouwa thi kükhurüpewa kenüh ahuo-khuri sakheh;

³¹anyulavü rüpe kümkiele tovüh akhujih aveh, anyulavü akheri tovüh khujih aveh, juhthsü kükhurüzheh küzetevüh aveh thi anyula vü arüpe kümkiele tovüh küzevüh aveh sakheh.