Read Pochuri Naga TSESHUKÜWA 39 Bible Online

TSESHUKÜWA 39 - Pochuri Naga bible

TSESHUKÜWA 39

¹VÜWA nüh Mosa vü azhükütsü kümjie kümtsepe vü küüroh sana küsa kenüh mari tü Aron kenüh kümtse thsümnyi akhehm, küsümo, thi kümruphieke nüh thi mürilo nüh saküzü sheh nü tsü.

²Jüsevü nga ma nüh suna nüh, athsü akhehm nüh, küsümo nüh, kümruphieke nüh thi mürilo nüh navükruzhu kürü nü tsü.

³Jüti sanü suna kütsüh kürüpah nü müjie külozü taji akhehm lo, küsümo, kümruphieke thi mürilo lovü toke nü akesie küzü vünüh asarie küpapa to.

⁴Thi navükruzhuwa kenüh asafü vü arorieh saküüso nü ashu künyi shohwa jüla müzhurüke.

⁵Jüti sanü VÜWA nüh Mosa vü azhükütsü kümjie asie zhüsheh nü alori nga thi küürohri nga jümari mpa nüh suna, akhehm, küsümo, kümruphieke thi mürilo nüh kütsekevüh to nü tsekete.

⁶Thi kütsüke kümjie sitheloh kükhrüpuo künyi rügivü Israel atsa nyimpari anyo rhüke nü suna tsoküüperü nü fekekheh.

⁷Jüti sanü VÜWA nüh Mosa vü azhükütsü kümjie Israel atsari kenüh müshe na küsa alohri sanü navükruzhuwa arorieh kümjie küsawa vü thse.

⁸Navükruzhu kümjie tüso kühietewa nga ma nüh mütsa sheh nü sa, jüma tü suna, khehmlo, küsümo, kümruphieke thi mürilo vi nü sa.

⁹Jümatü küvehjie sa, shehkhrie nü aveh wuovü nga thi achuwuovü nga kha küsüsü.

¹⁰Jüti sanü mari nüh aloh küri müzü sanü hieke: aküri pokhuwa thuoüji sitheloh kürüwuowa, sitheloh awazhiwa, sitheloh kümruwa;

¹¹küüri akünyiawa thuoüji sitheloh kümzhiwa, sitheloh akhehmwa, asakhuwa;

¹²küri kücheawa thuoüji sitheloh kümru küwiethiewa, sitheloh kümjie aloh kükhrawa thi sitheloh kümru thi akhehm kütünyie;

¹³thi aküri müzüawa thuoüji sitheloh kümzhi küwiethie, sitheloh kükhrüpuo, thi sitheloh asarie küpapa kütüwa ti hieke kheh, hamari aveh suna nüh lüte kheh.

¹⁴Israel atsara nyo müzhe nü aloh türakünyi vü mari nyo rhüke kheh; jümari tü kütsükie kümjie mari akuoh türakünyira nyo tüke kheh.

¹⁵Jüti sanü mari nüh tüso kühietewa kenüh suna latha vi nü külohvüh vünüh mülah;

¹⁶thi mari nüh suna nahrü thorü künyi thi suna akieveh künyi sanü tüso kühiete ashu künyi vü thse;

¹⁷thi suna küphri künyi vi nü suna kie künyi vü tüso kühiete ashu vü thse.

¹⁸Jüti sanü küphrirü künyi ashu viwa nü nahrü thorü künyi ashu vü küpeke; jütisanü mari nüh jümawatü viwa akruzhu küsuowa atüvü asafü wuovü küpeke.

¹⁹Thi mari nüh suna akieveh künyi sanü tüso kühietewa ashu künyi vü navükruzhu kükhu vü thse.

²⁰Jüsevü nga mari nüh suna nüh akieveh künyi sa lehü nü viwa atüvü navükruzhu safü künyi vü ali küüsohwa asaji vü thsenü navükruzhu kütsekevüh asie küzhü vünüh toküsawa vü müshuke.

²¹Thi VÜWA nüh Mosa vü azhükütsü kümjie tüso kühietewa arorieh tü riehzhu müküze nüh kütsekevüh nyiehvü peh na küsa kenüh mari nüh tüso kühietewa akieveh tü viwa nü navükruzhuwa akieveh vü akhehm kümlah nüh kürite.

²²Jüsevü nga ma nüh navükruzhu kruzhu küühawa akhehm kümtsüh nüh to;

²³thi kruzhu küühawa tü mükükrih nüh sana küsa kenüh alü kümrike wuovü apote kürüki kheh.

²⁴Nyirükruzhu küühawa küüleh wuovü mari tü alo akhehm, küsümo, kümruphieke thi mürilo nüh katoh rheke.

²⁵Jüsevü nga mari nüh suna latha nüh akhrizah sanü akatori azhiezhievü kruzhu küühawa küülehwa ashuvü huke kheh;

²⁶VÜWA nüh Mosa vü azhükütsü kümjie kükhurüzheh vü küüroh sana küsa kenüh kruzhu küühawa küüleh ashuvü khrizah küsü thi akatoh küsü ti sanü khrienyie nü huke kheh.

²⁷Jüsevü nga mari tü Aron thi ma tsari kenüh mürilo nüh küsazhekruzhu kürütsü,

²⁸thi mürilowa nüh alüwe külüwephokewa totsü, thi mürilo kümhietsawa nüh kümkhemnyi totsü,

²⁹mürilo, akhehm, küsümo thi kümruphieke nüh arüje nüh kheküto küüroh vünüh kütsekevüh totsü. VÜWA nüh Mosa vü azhükütsü kümjie hamari aveh satsü kheh.

³⁰Jüti sanü ma nüh suna latha nüh kümtse kajilüwe akhu sanü “Lasikhuh tsükie küsa kümjie vünüh VÜWA vü Mütsekütsü” ti rhüke.

³¹Thi mari nüh jümawa vi nü akhehm nüh ali sanü alüwe külüwephokewa vü küri nü huke. VÜWA nüh Mosa vü azhükütsü kümjie vünüh mari nüh sa.

³²Hakümjie vünüh müza kümhu juhthsü kükhurüzheh küüroh aveh jura; VÜWA nüh Mosa vü azhükütsü kümjie Israel nyiri tü aveh sajura; jüti küsa vünüh mari tü küsajura sa.

³³Jüti sanü mari tü juhthsü-kükhurüzhehwa, kümhupewa thi ma huo-khuri, ma sühari; ma zieri, arüperi, athsohri, atovühri thi kütoperi vi nü Mosa vü ru;

³⁴nyihzhüvo sahu thi nyihsü sahu saküükhrori küthuotethsüwa;

³⁵pohvü kütsathuozhü küthseku thi ma tsühkhieri, noküümze pewa;

³⁶toküsapewa thi ma küfüküjuri, alohse Küpehuowa;

³⁷suna latha nüh küsa latipewa, ma latiri thi ma tsokrü aveh thi ma küfüküjuri, anyihkuwa kenüh avüjuh;

³⁸suna kükhurüpewa, aküthse kenüh vüjuh, sierhe küünguwa, kümhupewa lehpie küzietethsü;

³⁹asahwuo kükhurüpe, ma sahwuo tsühkhie küüzhute, atsühkhie künyi, ma küfüküjuri; juhküüzükuwa thi ma kütokepe;

⁴⁰juhthsü kükhurüzheh thi müza nazizhehwa kenüh anyulavü küthuotethsü, atovühri, ma kütoperi, anyulavü akheriwa küziete, akuliri, ma küzetevühri, thi küfüküjuri aveh;

⁴¹kümtse pe vü küroh na küsa kenüh thsümnyi kümhie ta küürohri, Aron navüwa kümtse thsümnyiri, thi ma tsari navü sanü vü na küsa thsümnyiri aveh Mosa vü viru kheh.

⁴²VÜWA nüh Mosa vü azhükütsü aveh Israel nyiri nüh küüroh jümari aveh sakheh.

⁴³Jüti küsa vü Mosa nüh jümari aveh no kheh, thinü halie, jümari saju sala kheh, VÜWA nüh azhükütsü kümjie jümari aveh sakheh. Jüti küsa vü Mosa nüh tsia jümari tsü.