Read Pochuri Naga TSESHUKÜWA 40 Bible Online

TSESHUKÜWA 40 - Pochuri Naga bible

TSESHUKÜWA 40

¹VÜWA nüh Mosa vü,

²“Asa pokhuwa rülo pokhuwa vü müza juhthsü-kükhurüzhehwa khake luo.

³Thi pohvü kütsathuozhü küthseku azhehlovü vike luo, jüti sanü kütsathuozhü küthseku tü küzietethsüwa nüh zietem luo.

⁴Thi toküsapewa nga azheh lovü vitu sanü zanyo aveh nga ma küsape vü sakhehm luo, thi latiwa nga vitusanü anyihkuwa tokesaluo.

⁵Jüti sanü asierhe tso nü kükhurüpewa tü pohvü kütsathuozhü küthseku tüvü sanü juhthsü-kükhurüzheh lehpiewa küthuotethsüwa nüh thuotem luo.

⁶Thi kütso kükhurüpewa viwa nü müza juhthsü kükhurüzhehwa lehpie tüvü saluo,

⁷jüti sanü ketsokuwa tü müza juhthsü kükhurüzhehwa thi kükhurüpewa masü azhievü sanü ketsoku lovü ajuh thsesaluo.

⁸Thi anyula vü poteposhuri küche nü anyulawa kheri vü küzietethsüwa thuo luo.

⁹Jüsevü nga aküthse vüjuh vi nü juhthsü kükhurüzheh thi ma lovü kütü aveh thse thi ma peze aveh sakümtse luo; jüta küsa vünüh jümari aveh tü mütsera naveh ünüh.

¹⁰Jümpa mükünyu kütso kükhurü kütsü pewa nga thi ma küfüküjuri nga thse luo; jüta küsa vünüh kükhurüpewa tü mütse shehra naveh.

¹¹Jüsevü nga küzetevüh thi ma kütokepe nga thse nü sakümtse naveh.

¹²Jüti sanü Aron thi ma tsari müza juhthsü kümkhuzhehwa lehpie vü sieru nü ajuh nüh mari phrümtü naveh,

¹³Aron tü navü sanü eh küüroh sana küsa kenüh kümtse thsümnyiri ma vü vi küüvü taji ma thsetsü nü ma sakümtse luo.

¹⁴Ma tsari nga sieru nü küsazhekruzhu thsetsüluo,

¹⁵mari apa küthse kümjie mari nga thsetsü nü navü sataji eh küüroh küsanaveh; thi mari küthsewa tü mari wuhle küju müja nüh saküwa vünüh nyieh üta müsaji mümhie,” ti küza.

¹⁶VÜWA nüh Mosa vü azhükütsü kümjie ma tü sa kheh.

¹⁷Mahvi künyiawa, asa pokhuwa rülo pokhuwa vü juhthsü kükhurüzhehwa sajura.

¹⁸Juhthsü kükhurüzhehwa tovüh kütokepe thse, ma zieri, rüpethsohri, thi atovühri khake;

¹⁹thi kükhurüzhehwa rügivü juhthsü kükeke nü ma nyiehvü kühiete thse, VÜWA nüh Mosa vü azhükütsü kümjie vünüh sa kheh.

²⁰Jüti sanü pohvüzhüwa vinü pohvü kütsathuozhü küthseku lovü thse taji atsükhie künyi vi mürike nü noküümze pewa jüma rügivü sa;

²¹jüti sanü pohvü kütsathuozhü küthseku kharu juhthsü kükhurüzheh lovü thse nü küzietethsüwa viru taji pohvü kütsathuozhü küthseku ziete; jüti VÜWAnüh Mosa vü azhükütsü kümjie vünüh sa kheh.

²²Thi toküsapewa viru juhthsü kükhurüzheh lovü juhthsü kükhurüzheh zhietü wuovü küzietethsü alievü sa,

²³jüti sanü VÜWA nüh Mosa vü azhükütsü kümjie lohsewa vi tokepe rügivü kümhieti sa.

²⁴Thi ma nüh latipewa tü müza juhthsü nazizhehwa kütope küwiejie kümtsezheh zhiese wuovü sa,

²⁵jüti sanü VÜWA nüh Mosa vü küüza kümjie anyihkuri tü VÜWA tüvü toke kheh.

²⁶Thi ma nüh suna kükhurüpewa tü müza juhthsü kükhurüzheh küzietethsü atüvü sa,

²⁷jüti sanü VÜWA nüh Mosa vü azhükütsü kümjie asierhe küüngu jüma rügivü sa.

²⁸Thi ma nüh kümtsezheh mükhie küzietethsüwa thse.

²⁹Jüsevü ma nüh kütso kükhurüpewa tü müzajuhthsü-kükhurüzhehwa kümtse pe mükhie atüvü sanü kütso kükhurü thi atha kükhurüwa tü jüma rügivü sa; jüma tü VÜWA nüh Mosa vü küüza kümjie vünüh sa.

³⁰Thi ma nüh ajuhke küsa kenüh ajuhküüzükuwa tü müza juhthsü kümhu zhehwa thi kükhurüpewa masü azhievü sa,

³¹jüla nüh Mosa, Aron thi ma tsari tü mari ajihke khrükhrüti;

³²VÜWA nüh Mosa vü azhükütsü kümjie vünüh mari tü müza juhthsü künazizhehwa lovü kütuvü nga thi kükhurüpewa vü küwavü nga ajihke khrükhrüti.

³³Hakümjie vünüh ma nüh juhthsü kükhurüzhehwa nyula, kükhurüpewa thi anyulawa kheri küziete sa. Hakümjie sanü Mosa tü küürohwa sajura.

³⁴ Jüti küsa vü akülu nüh Juhthsüzhehwa külüwute tewa, thi VÜWA kütholathovü nüh kümtsezhehwa tü protewa.

³⁵Hama kenüh Mosa tü Juhthsüzheh lovü mütura nüh sam.

³⁶Israelri tü aküluwa vitekükuo sevü nüh mari kürünape kütsele küpa vü küwa sasati.

³⁷Thitü aküluwa küpeh küju nü mari kürünapewa mükütsele nüh pehpehti.

³⁸Thi mari nüh azetse sakütse Juhthsüzheh nyiehvü arülovü thuoüji akülu ngu thi arüzavü thuoüji jüma nyiehvü anyih küju ngunguti sa.