Read Pochuri Naga TSESHUKÜWA 6 Bible Online

TSESHUKÜWA 6 - Pochuri Naga bible

TSESHUKÜWA 6

¹Jüti küüza vü VÜWA nüh Mosa vü, “Hi nüh khinyi thuoüji Faroah vü mowa sanathuoh ünüh noh nüh ngu naveh, küpakenühnyunü khinyi thuoüji ma tü ma ke müzho sheh nü mari küze nathuoh, ma ke müzho sheh nü azhih hala nüh mari zhezhuja nathuoh,” ti küza.

² Jüsevü Saküüwuowa nüh Mosa vü, hi thuoüji VÜWA.

³Saküüwuowa kükhratsawa, Ebri vü El Shadai, ti küsa hi nüh, Abraham, Isaac thi Jacob vü kütsathuoh, thitü eh nyo VÜWA ti küsa vünüh nü hi mpa hi vi mari müküthsü.

⁴Jüsevü nga Kanan azhih mari nüh priru nü kürhowa vi mari tsü nti mari sie eh kütsathuozhüwa vishumthuo.

⁵Jü mpa mükünyu Israel nyiri nüh Egyptra kükhu vü peh nü lüchi küveh künara nü hi nüh eh kütsathuozhüwa müshekera.

⁶Jükenüh Israel nyiri vü küza luo, “Hi tü VÜWA, Egyptri nüh nohri vü akhuo küüzho tsü küveh kükhu vünüh shohzhu naveh, nohri tü mari nüh kete nü rho küveh vünüh vizhu naveh thi hi nüh eh ke thsuoküze nü mari vü kümnomna tsü sheh nü nohri rhesa naveh,

⁷hi nüh nohri vi eh nyi sana, thi hi tü nohri Saküüwuowa sana; thi nohri nüh hi tü VÜWA nohri Saküüwuowa, Egyptri nüh nohri saküümnomna kükhu vünüh küvizhuwa ta küsa thsü naveh.

⁸Hi nüh Abraham, Isaac thi Jacob vü tsü nta phrahteke küsawa azhih vü siewa naveh, thi jüma tü hi nüh nohzhiri küüsanaveh,” ti küza üti küza.

⁹Mosa nüh jükümjie vünüh Israel nyiri vü küza; thitü mari tü Mosa zhü müküna nüh sa, küpakenühnyunü küüroh kükhole kenüh mari sietse tü thasü tewa, thi mari kükhu vünüh kümnomnale kenüh.

¹⁰Jüti küsa vü VÜWA nüh Mosa vü,

¹¹“Israel nyiri tü ma zhih vünüh küzem luo ti küsa Faroah, Egypt kajiwa vü tu nü küza luo,” ti küza.

¹²Thitü Mosa nüh VÜWA vü, “Halie, Israel nyiri nüh eh zhü müküna nta lie; khiela nüh Faroah nüh ha hi apo müküpokara küsü azhü küna na lo?” ti rületsü.

¹³Thitü VÜWA nüh Mosa thi Aron vü azhütsü taji, “Israel nyiri thi Egypt kajiwa Faroah vü azhü tsü nü Egypt zhih vünüh Israelri vizhu luo,” ti küza.

¹⁴Hamari tü mapara zheh alüri: Reuben tsari, Israel vü küwuo khuwa, Hanok, Palu, Hezron, thi Karmi; hamari tü Reuben tharuo.

¹⁵Simeon tsari: Jemuel, Jamin, Ohad, Jakhin, Zohar thi Shaul Kananvühwa tsa, hamari tü Simeon tharuori.

¹⁶ Awuhle vünüh kümzhe Levi atsara nyori: Gershon, Kohat thi Marari, Levi kürho mahvi tü müzake cherake nü türü küsa kenüh.

¹⁷Gershon atsari: Libni thi Shimei, ma tharuori vünüh kümzhe.

¹⁸Jüsevü Kohat atsari: Amram, Izhar, Hebron thi Uzziel, Kohat kürho mahvi tü müzake cherake nü küche küsa kenüh.

¹⁹Merari atsari: Mali thi Mushi. Awuleh müzhe nü hamari tü Levi atsari.

²⁰Amram tü ma pa tsehvüwa Jokhebed za, thi ma nüh Aron thi Mosa wuo nü ma tsü, Amram kürho mahvi tü müzake cherake nü türü küsa kenüh.

²¹Izhar tsari: Kora, Nefeg thi Zikhri.

²²Thi Uzziel atsari: Mishael, Elzafan thi Sithri.

²³Aron tü Aminadab atsa Nashon tsehvüwa Elisheba za; thi ma nüh Nadab, Abihu, Eleazar thi Ithamar wuo nü ma tsü.

²⁴Kora atsari: Asir, Elkanah thi Abiasaf; hamari tü Korari tharuo.

²⁵Eleazar, Aron atsa tü Puliel tsavüh küsü za nü Finehas wuo nü ma tsü. Hamari tü atharuo vünüh Levira zheh vü apa alüri.

²⁶Hamari tü VÜWA nüh Aron thi Mosa vü küüzari: “Egypt zhih vünüh Israel nyiri mari shieji vünüh siezhu luo,” ti küza.

²⁷Mosa hama thi Aron hama nüh Egypt zhih vünüh Israel nyiri küvizhu zhü viwa Egypt kajiwa Faroah vü küüzari.

²⁸VÜWA nüh Egypt zhih vünüh Mosa vü küüza rülo vü,

²⁹VÜWA nüh Mosa vü, “Hi tü VÜWA; hi nüh noh vü küüza aveh vi Egypt kajiwa Faroah vü küza luo,” ti küza.

³⁰Thitü Mosa nüh VÜWA vü, “Halie, hi tü apo müküpokahrawa; jükenüh mokümjie nüh Faroah nüh eh zhü küna na lo?” ti küza.