Read Pochuri Naga TSESHUKÜWA 8 Bible Online

TSESHUKÜWA 8 - Pochuri Naga bible

TSESHUKÜWA 8

¹Jüsevü VÜWA nüh Mosa vü, “Wa nü Faroah vü, ‘Hakümjie VÜWA nüh küzaveh: Eh nyiri küze luo, mari tü eh kütsü sanaküveh kenüh.

²Thitü noh nüh mari müküze nta thuoüji, halie hi nüh noh nyu aveh awuh vi nü küümnomna naveh;

³Nile rühgu tü awuh mpa nüh pro naveh, thi jümari tü noh zhehlori vü, noh nyiri vü, noh nyithüri vü thi noh lohse künehkuri aveh lovü;

⁴jü mpa mükünyu nohri rügivü noh nyiri rügi vü thi noh sieperi rügivü joke naveh,’” ti küza üti küza.

⁵Jüsevü nga VÜWA nüh Mosa vü, “Aron vü küza luo, Noh ke vü noh kütsüh vi nü arühguri vü, ajuhleri vü, thi ajuh tieküzhuperi vü awuhri tü shuru nü Egypt azhih küüpro luo,” ti küza üti küza.

⁶Jüti küüza vü Aron nüh ma ke thsuo nü Egyptra juh rügivü thse; thinü awuhri tü shuru nü Egypt azhih aveh protewa.

⁷Thi kümahtsari nga mari küüzhe aro vi nü jükümjie sathuoh, thi Egypt zhih vü awuhri vizhuthuoh.

⁸Thinü Faroah nüh Mosa thi Aron ji taji, “Awuhri hi thi eh nyiri vünüh vitewa üti VÜWA vü khuo luo, jüta thuoüji hi nüh mari küze nü VÜWA vü küsahthuo küüsanavehthuoh ünüh,” ti küza.

⁹Jüti küüza vü Mosa nüh Faroah vü, “Noh kenüh, noh sieperi kenüh thi noh nyiri kenüh küsie khuo üti nüh azhütsüluo, jüti sanü Nile vü küchie nüh noh vü thi noh zhehri vü thuoüji awuhri zothe khehm tü naveh,” ti rületsü.

¹⁰Thinü Mosa nüh ma vü, “Thuotü,” ti küza. Jüti küüza vü Mosa nüh shele, “Hi nüh noh nüh küüza kümjie sanaveh, thi küsü nga VÜWA hiri Saküüwuowa kümjie münyie taküsa noh küüthsü naveh.

¹¹Awuhri tü noh vünüh, noh zheh vünüh, noh sieperi vünüh thi noh nyiri vünüh kietuotewa kheh nü Nile vü mpa sanaveh,” ti küza.

¹²Jüti küzam nü Mosa thi Aron tü Faroah vünüh tsezhutewa thi Mosa tü Faroah masü küjülethuo kümjie wa nü awuh kenüh VÜWA vü zie.

¹³Thinü Mosa zhü kümjie vünüh VÜWA nüh satsü; awuhri tü azhehri vünüh, anyula vünüh thi azhuh vünüh ti sükhehm.

¹⁴Thi mari nüh khieloti chizhuh kümprohke nü azhie aveh pri nü müne kheh.

¹⁵Thitü Faroah tü tsotho pike zohm ta kütsatso küthsü sevü ma luoveh tü khotewa le nü VÜWA nüh küüza kümjie vünüh müküna nüh sa le hü.

¹⁶Thinü VÜWA nüh Mosa vü, “Aron vü küza luo, Egypt zhih aveh vü wiezü küüpro na küsa kenüh noh kütsüh khake nü azhitho kürhie luo,” ti küza üti küza.

¹⁷Jüta küüza müzhe nü masü tü sa; Aron nüh ma kütsüh khake nü azhitho kürhie ünü Egypt zhih aveh azhitho tü wiezü jetewa nü wiezü jümari tü anyiri vü thi samwa vü wa ka kheh.

¹⁸Thi Egyptri kümahtsari nga küüzhe aro vünüh wiezü vizhu nti kükhra thse, thitü mari tü müvizhura nüh sam. Jükenüh wiezü jüma tü anyiri vü thi samwa vü kakheh.

¹⁹ Jüti küsa vü kümahtsari nüh Faroah vü, “Hatü Saküüwuowa tüjü wiethuoh,” ti küza. Jütawie ketünga Faroah luoveh tü sakükhomtü le nü VÜWA nüh küüza müküna nüh sa le hü.

²⁰Jüti küsa sevü nga VÜWA nüh Mosa vü, noh tü arüne kümto sühra nü Faroah ajuh vü küwa huo nü ma vü, “Hakümjie VÜWA nüh küzaveh, eh nyiri küzem luo, mari tü eh kütsü sanaküveh kenüh, ta küzaveh.

²¹Noh nüh jüüta eh nyiri müküze nüh sam thuoüji halie, hi nüh wiezü khielota noh vü, noh sieperi vü thi noh nyiri vü ti küze naveh, noh zhelo, Egyptra zhehlo aveh wiezü nüh küüpro naveh, jü mpa mükünyu azhih mari nüh kütsiepe vü nga küpro naveh.

²²Thi jüma rülo vü eh nyiri nüh rhoküveh azhie Goshen thuoüji athuo samtü nü jüla thuoüji wiezü müküüpeh nüh samtü naveh; thi jüvü nüh hi tü azhih azhievü VÜWA ta küsa noh nüh thsünaveh.

²³Jükümjie vünüh eh nyi thi noh nyi azhievü saküpam naveh. Athsoshi hamatü thuotü sanathuoh,” ti küza üti küza.

²⁴Thinü VÜWA nüh Jüti satsanü wiezü tü zhühzhühti Faroah zhehlovü, ma siepera zhehlo vü thi Egypt azhih aveh vü pro nü wiezü rieh nüh azhie aveh zorie khehm.

²⁵Jüti küsa vü Faroah nüh Mosa thi Aron ji nü, “Anyu hala azhie küsü vü wa nü nohri Saküüwuowa vü küsahthuo saluo,” ti küza.

²⁶Thitü Mosa nüh ma vü, “Jünü awuleh nyu nüh sam naveh, küpakenühnyunü hiri nüh hala nüh VÜWA hiri Saküüwuowa vü küsahthuo sa thuoüji Egyptra tüvü akükre samnaküveh kenüh. Hiri nüh Egyptra notha vü küsahthuo kükhurü sanü mari vü akükre sa thuoüji mari tü aloh vi nü hiri müveh tüm naveh ülo?

²⁷Ma nüh hiri vü azhütsünaküveh kümjie hiri tü reza vü rülo küche letse sa wa nü VÜWA hiri Saküüwuowa vü küsahthuo müsaji mümhie,” ti rületsü.

²⁸Thinü Faroah nüh, “Hi nüh nohri küze nü reza vünüh VÜWA nohri Saküüwuowa vü küsahthuo küüsanaveh, thitü nohri kületsuo vü müwa ra. Tinü eh kenüh khuo luo,” ti küza.

²⁹Thinü Mosa nüh ma vü, “Halie, hi nüh alievü wa nü VÜWA vü kükhuo sanü ashieji sanü kütse wiezüri tü Faroah vünüh ma sieperi vünüh thi ma nyiri kenüh thuotü saküüzekhehm nathuoh, thitü hiri mümürathuoh nüh sanü mükhetü küze nü VÜWA vü küsahthuo küüsaluo,” ti küza.

³⁰Jüti küzam nü Mosa tü Faroah vünüh alievü wa nü VÜWA vü khuo.

³¹Thinü VÜWA tü Mosa nüh kükhuo küsa kümjie wiezü zherüke nü küpehri Faroah vünüh, ma sieperi vünüh thi ma nyiri vünüh küsü nga müküpeh wiethuoh nüh zheja khehmtü.

³²Thitü Faroah tü hama lekha vü nga ma luoveh sakükhom hü nü VÜWA nyiri müküze nüh sam.