Read Pochuri Naga TSESHUKÜWA 9 Bible Online

TSESHUKÜWA 9 - Pochuri Naga bible

TSESHUKÜWA 9

¹Jüsevü VÜWA nüh Mosa vü, Faroah vü tu nü ma vü, VÜWA, Ebriri Saküüwuowa nüh hakümjie küzaveh, “Eh nyiri küze luo, jüti sanü mari tü eh kütsü sana küveh kenüh.

²Thi noh nüh mari müküze nüh khete peh huo nta thuoüji,

³halie, VÜWA ke tü kümnomna kükho vi nohri mieshümiesa ato vü küpehri vü, rawuhri vü, rawuh ariküzahwa vü, utri vü, nyihzhüri vü thi nyihsüri vü thse naveh.

⁴Thi VÜWA nüh Israelra seshuh thi Egyptra seshuh saküpam tü naveh, jüti sanü Israelra zhi thuoüji küsü nga küüsüwa nyu,” ti küza üti küza.

⁵Thi VÜWA nüh rülo chietsü nü, “Thuotü VÜWA nüh jüma azhih hala sanaveh,” ti küza.

⁶Thinü rülo jüma nyieh VÜWA nüh hama sanü Egyptra seshuh aveh sükhehm, thitü Israelra seshuh thuoüji küsü nga müsü.

⁷Thi Faroah nüh anyiwuori küze, thinü halie, Israelri thuoüji nyi küsüa mieshümiesa nga müsü. Thitü jütawie ketünga Faroah luoveh tü sakükhom wie thi Israel nyiri tü müküze nüh sa wie.

⁸Jüsevü nga VÜWA nüh Mosa thi Aron vü, “Anyithü vünüh aweji amüshe küsü küpro hu nü Mosa nüh Faroah tüvü nüh rügi wuovü vehküüjake luo.

⁹Jümatü Egypt azhih aveh vü azhitho kümnye jetewa nü Egypt zhih aveh vü anyiri vü nga thi samwari vü nga awule shu nü khüma kheh naveh,” ti küza.

¹⁰ Thinü masü tü amo vünüh aweji hu nü Faroah tüvü tsie nü thajüwu wuovü vehjake, thinü anyiri vü nga thi samwa vü nga awule shu nü khüma kheh.

¹¹Jüti küsa vü kümahtsari vü nga thi Egyptri aveh vü nga kakheh.

¹²Thitü jütawie ketünga Faroah luoveh tü sakükhom nü VÜWA nüh Mosa vü küüza kümjie masü zhü müküna nüh sa.

¹³Jüma sevü nga VÜWA nüh Mosa vü, rüne kümto sühra nü Faroah tüvü tsie nü ma vü, VÜWA, Ebrira Saküüwuowa nüh hakümjie küzaveh, Eh nyiri küze luo, mari tü eh kütsü sanaküveh kenüh,

¹⁴küpakenühnyunü hama tsotho vü eh kümnomna aveh noh luoveh lovü, noh sieperi vü thi noh nyiri vü thse naveh, jüta küsa vünüh azhih hala nyi küsü nga hi kümjie münyie ta thsü naveh.

¹⁵Khinyi hi nüh eh ke thsuo küze nü aküna kükho küze thuoüji noh thi noh nyiri zotheküja sanaveh, jüti sanü azhih hala nüh nohri tü saküümiekheh naveh;

¹⁶ thitü hama zhühnyo thuoüji eh kükhra kütsa nti küsa kenüh nohri kürho küsa wie, thi jüti sanü azhih aveh vü eh nyowa küüthohlatsü naveh.

¹⁷Nohri tü khinyi küju nga eh nyiri vünüh nohri mpa nohri sakümsie nü mari müküze nüh saveh.

¹⁸Halie, thuotü hi nüh tsotho hakümjie küsa vü Egypt azhih küsate vünüh khinyi küju küsükeri nga jükümjie küsa rahzhi müjie kütsa küüzho küütsanaveh.

¹⁹Jükenüh noh nyiri vü azhütsü nü nohri mieshümiesa thi nohri azhuh vü küpehri aveh siewa nü rahzhi nüh müküvehra pe vü sam luo; küpakenühnyunü anyiri nyutü samwa azheh vü sietemküru aveh vü thuoüji rahzhi tsuotsa ru ka wie nathuoh thi sükheh wie nathuoh ünüh, ti küza üti küza.

²⁰Jüti küüza vü Faroah sieperi thari nüh VÜWA zhü krü nüh jümari thuoüji mari mieshümiesa sie azheh vü teru;

²¹thitü thari nüh VÜWA zhü müküchie sanüh mari thuoüji mari tükhari thi mari mieshümiesari azhuh vü küpehm.

²²Jüti küsa vü VÜWA nüh Mosa vü, “Egypt zhih aveh vü rahzhi küütsuotsakena küsa kenüh noh ke thajüwu wuovü thsuoke luo, thi rahzhi tü Egypt zhih aveh nyiri vü, samwari vü thi azhuh vü are aveh vü küütsake naveh,” ti küza.

²³Jüti küsa vü Mosa nüh ma kütsüh atülü wuovü thsuoke ünü VÜWA nüh tsoküshi thi rahzhi küze nü azhih vü tsuotsa küüturu. Thi Egypt zhih vü VÜWA nüh rahzhi rüküüturu;

²⁴mükütuo wiethuoh nüh rahzhi tsuotsa, thi atsorie khieloti rahzhi azhievü küphrieh, Egypt zhih vü anyi rhoküru küsükeri wie nga rahzhi jükümjie küüzho mükütsa sanü tsa.

²⁵Egypt zhih aveh vü momowa azhuh vü pehveh ünüh anyiri thi samwa rahzhi nüh vehküzeh kheh; ato vü are aveh kütsühnya kheh, thi ato vü athsoh aveh vehrie kheh.

²⁶Israel nyiri nüh kürho azhie Goshen vü mpa nüh rahzhi mükütsuotsa wie.

²⁷Jüti küsa vü Faroah nüh Mosa thi Aron ji nü masü vü, “Hi tü khiemuomthuoh, VÜWA thuoüji müküleh münyie luo, hi thi eh nyiri nüh mükülehthuoh.

²⁸VÜWA vü khuo luo, küpakenühnyunü atsohküshi thi rahzhi tü ha walethuoh ünüh; nohri hala küpeh lewa nyuthuoh, hi nüh nohri küze nathuoh,” ti küza.

²⁹Thinü Mosa nüh ma vü, “Hi nüh anyuji hala nüh shuwa thuoüji müküzhikethuoh nüh VÜWA vü eh ke künyi thsuoke naveh, thi atsohküshi tü letewa nü rahzhi mütsanüh sanaveh, thi azhih tü VÜWA zhi ta küsa nohri nüh thsüra naveh.

³⁰Thitü noh thi noh sieperi thuoüji VÜWA Saküüwuowa müjie kükrü hi nüh thsüveh,” ti küza.

³¹Akükhie thi khuozhikürümie tü zorie khehm, küpakenühnyunü hama tsothovü khuozhikürümie thuoüji shuteveh thi akükhie thuoüji tührie khüna saküveh kenüh.

³²Thitü hiemtha thi hiemtha küzahwa thuoüji samümsü, küpakenühnyunü hamasü thuoüji luoshü kümnüwa küsa kenüh.

³³Jüti küsa vü Mosa tü anyujiwa Faroah tüvü nüh shuwa nü VÜWA vü ma ke thsuoke ünü tsohküshi thi rahzhi tü kütuotewa, thi tsohkürü azhih vü küshoküturu tü letewa.

³⁴Thitü tsokürü, razhikütsa thi tsohküshi leteküwa Faroah nüh ngu ünü ma tü khiemuo tewa lehü nü ma thi ma siepera luoveh tü khotewa lehü.

³⁵Jüti sanü Faroah luoveh tü sakükhom thi VÜWA nüh Mosa vü küüza kümjie müsanüh sanü Israel nyiri müküze nüh sam.