Read Pochuri Naga JOB 10 Bible Online

JOB 10 - Pochuri Naga bible

JOB 10

¹Eh kürho nyakuomthuoh; hi nüh eh kürü vü phrahshu mülie wienathuoh; hi nüh eh kürholi kenüh akükha vünüh küza wie nathuoh.

²Hi nüh Saküüwuowa vü küza naveh, hi rümja tüm üta; noh tü mokenüh hi vü akükhra thse nü ruohluoveh ünüh hi küthsüluo.

³Kümrü tü noh kenüh kümhie ti ülo, noh kenüh küüroh mam, thi khukekümsüra küüteh kütso ti sanaveh ülo?

⁴Noh tü asatsa notha pehveh ülo, Noh tü anyiri nüh küngu kümjie nguveh ülo?

⁵Noh rülori tü anyiri rülo kümjüh ülo, nyutü noh mahviri tü anyira mahvi kümjüh ülo?

⁶jüti sanü noh tü eh künakhie phah, thi eh kükhiemuo phahveh ülo,

⁷hi tü münamuo wie ta küsa noh nüh thsüwie ketünga, thi nyi küsü wie nga nüh noh ke vünüh küvizhu münyie wie thuoh ülo?

⁸Noh kenüh hi saküje taji hi sa; thi khinyi thuoüji noh tü sühle tewa nü hi zorieveh.

⁹Noh tü anyisa nüh visa ti küsa müsheluo; thinü noh tü hi azhitho saküje le nti ülo?

¹⁰Noh tü hi tünüjuh kümjie alievü küshomja ülo, thi aküthü kümjie hi samkümkho ülo?

¹¹Noh nüh asazhü thi sahu vi hi küzhu, arüri thi anyohnyie masü vi hi torüluo tsü.

¹²Noh nüh akürho thi mükükhaphrükhale küümze vi hi satsü; thi noh küümze nüh eh sietse müshiesa.

¹³Tü zanyo hamari tü noh nüh noh luoveh lovü küthim; hamatü noh kümshe ta küsa hi nüh thsü.

¹⁴Mükütüküzü hi khiemuo thuoüji, ta no tü hi nopehpehti, thi eh künakhie kenüh hi nomja nta.

¹⁵Mükütüküzü hi tü khuke msümthuoüji, hi vü zhühkha ru luo, küpakenühnyunü hi tü saküüzükrü nüh pro, thi eh kümnomna rügivü küno kenüh.

¹⁶Thi mükütüküzü hi nüh hi mpa hi vi kümsie ünü noh nüh amiewuo küsü kümjie hi küka, thi hi vü aküngori küroh;

¹⁷noh tü hi vü noh pohvü sakürü thetheti, thi noh tü hi wuovü noh rüküshu saküzhizhiti; noh nüh asürho riehkhuo hi vü viruruti.

¹⁸“Mokenüh noh tü ashiekuo lovü nüh hi vizhuru lo? notha küsü nga nüh hi müjie küngu vünüh hi müküsü nüh,

¹⁹thi hi tü müshu nüh sanü ashiekuo lovü nüh rüku lovü vüteküwa müsanüh.

²⁰Eh kürho rülori tü müzüla ülo? Hi mpa jam luo, jüta küsa vünüh hi tü luovehkürüzih pike ngura naveh ünüh,

²¹hi tü küsie tewa naveh ünüh sheleküruwa nyuthuoh, aküzo thi aküsü rüzhe azhihwa vü,

²²aküzo thi kürüza azhihwa vü, alati tü aküzo kümjie küsa vü,” ti rületsü.