Read Pochuri Naga JOB 11 Bible Online

JOB 11 - Pochuri Naga bible

JOB 11

¹Jüti küsa vü Zofar Namatwa nüh kürüle:

²Azhü khielohta küsa tü mürüle nüh teküwa leh ülo? thi nyi küsü nüh azhü aküpro küüza tü kükato vü vimthse naveh ülo?

³Noh küshükhushünyi nüh anyiri saküüzoh mhieveh ülo, thi noh nüh küriesa vü wuori nüh noh samküzükrü tüm naveh ülo?

⁴küpakenühnyunü noh nüh, ‘Eh küsosiezhü thuoüji mütsemü, thi hi tü Saküüwuowa notha vü mütsem’; taküsa kenüh.

⁵Thitü O, Saküüwuowa jüma nüh phrahte naveh, thi noh vü ma pohmie ga naveh,

⁶Jüti sanü küüthi kümtsa noh vü küza naveh! küpakenühnyunü ma tü küthsükümshi khielota pehküveh kenüh. Saküüwuowa nü jüma nyieh vünüh, noh saküümnomna zülaveh ünüh, noh jüma thsüluo.

⁷Noh tü Saküüwuowa küsheh zanyori phahra naveh ülo? Noh tü kükhratsawa kükete phahra naveh ülo?

⁸Jümatü atülü nyiehvü nüh müsie, noh tü mowa sara na lo? Küsürazhie nyiehvü nüh sheh, noh tü mowa thsüra na lo?

⁹Ma küüte tü azhihwa nyiehvü nüh suo, juhküjiwa nyiehvü nüh müza.

¹⁰Mükütüküzü ma nüh kariwa noh vi aküsi sa, thi ashih küsa vü ji thuoüji, thawa nüh ma khetera na lo?

¹¹küpakenühnyunü ma tü anyiri ame mükünyie küthsü kenüh; ma nüh müküju ngu thuoüji, ma tü jüma müthsü tüm naveh ülo?

¹²Thitü küzhehphrori küsü thuoüji thsüra naveh, rawuhküzah atsa nyiri küsü wuo thuoüji.

¹³“Mükütüküzü noh nüh noh luoveh kükato vü sa thuoüji, noh tü ma wuovü noh ke thsuoküze naveh.

¹⁴Mükütüküzü noh ke vü müküju pehveh üji, jüma kületsuovü jaküzem luo, thi khukekümsü noh juhthsüzhehri lovü müküürho tüm.

¹⁵Jütathuoüji noh tü anyiehna müpe nüh noh nyieh tü toke nathuoh; noh tü müzhoranathuoh, kükrüwa nyuthuoh.

¹⁶Noh tü noh luoveh kümnomna kümam nathuoh; ajuh nüh jüma müzhuteküwa kümjie noh tü müshe nathuoh.

¹⁷Thi noh kürho tü arülo rünyiküzeto nyieh vünüh wierake naveh; ma küzowa tü arüne thsem naveh.

¹⁸Jüta thuoüji noh tü küüzhezhü peh naveh, küpakenühnyunü jüla küluozhe pehküveh kenüh; noh tü künyuote thi külohji vünüh noh tü münyie naveh.

¹⁹Noh tü zehtsuo naveh, thi nyi küsü nga nüh noh saküükrüwa nyu, anyiri hozake wienga noh küütso zhieke naveh.

²⁰Thitü khukekümsüra notha thuoüji sazihm naveh; mürie na küsa aleh aveh thuoüji makeri’a nüh kümiem naveh, thi mari küluozhe thuoüji mari rütho küsah sehkhe,” ti rületsü.