Read Pochuri Naga JOB 12 Bible Online

JOB 12 - Pochuri Naga bible

JOB 12

¹Thinü Job nüh kürüle:

²Küthsüzih münyie noh tü anyiri, thi kümtsa tü nohri sie sü naveh.

³Thitü hi nüh noh kümjie mükümshera pehm wiethuoh; hi tü noh nyieh vünüh müsaji. Thawa nüh hakümjie küsa zanyori müthsü nüh pehveh ülo?

⁴Hi tü eh füri vü küükhringü zanyo küsü samthuoh; Hi, Saküüwuowa küjiwa thi hi kürülewa, kümsho thi kümtemkünyie nyi küsü, hi tü küükhringü zanyo küsü samthuoh.

⁵Rüzih küvehwa kümshe lovü angu kümsü müküchie pehveh; thari ajih nyichoveh ünüh jümari kenüh liekeveh.

⁶Kürühura juhthsüzheh thuoüji luovehkürüzih vünüh pehveh, thi Saküüwuowa arüsaküümthori thuoüji, küsara mari ake vü mari nyiaza viteruveh.

⁷Thitü samwari künaluo, jüüta thuoüji mari nüh nohri sosie naveh ünüh; amürhü vü prükütse müwari künaluo, mari nüh nohri vü küza naveh ünüh;

⁸nyutü azhih vü aprari künaluo, mari nüh nohri sosie naveh ünüh; thi juhküji angari nüh nohri vü phrahzhutsü naveh ünüh.

⁹Hamari aveh azhievü VÜWA kenüh müsa ta küsa thawa nüh thsüveh ülo?

¹⁰Ma ke vü rhoküveh zanyo küsüküsü nga pehveh, thi anyiri aveh arütho pehveh.

¹¹Amizhi nüh ashie kümpo üta akhüna tü azhüri mümte ülo?

¹²Kümahtsa thuoüji kükhruoküzeri vü pehveh, thi küthsükümshi thuoüji rülo küsuo vünüh pehteruthuoh.

¹³Kümahtsa thi akükhra thuoüji Saküüwuowa vü pehveh; ma tü shikekütsü thi küthsükümshi pehveh.

¹⁴Mükütüküzü ma nüh zochiem thuoüji nyi küsü nga müsalera; mükütüküzü ma nüh nyi küsü alovü khethuokem thuoüji, nyi küsü nga nüh müsa ra.

¹⁵Mükütüküzü ma nüh ajuhri küjehtem thuoüji, jümari tü küwehtewaveh; mükütüküzü ma nüh jümari liküze thuoüji, jümari nüh azhihwa külüwute tewaveh.

¹⁶Ma vü akükhra thi kümahtsa pehveh; mürakümwa thi kümrawa tü ma zhi.

¹⁷Ma nüh zhühphie kütsüri künetemümti, thi alesari zanyosamküthsü nüh sasati.

¹⁸Ma nüh kajira küphehteri lejatsüveh, thi mari küshih vü kütsekevüh tseketüveh.

¹⁹Ma nüh anavüri künetemümti, thi akükhrari khajamümti.

²⁰Ma nüh tsotükümra zhüküphra khete mümti, thi kükhruora küthsükümshi vija mümti.

²¹Ma nüh kajitsari vü momakütalo küshoketsüveh, thi kümzhora kütsekevüh lejamümti.

²²Ma nüh aküshehwa tü aküzowa vünüh foja tüveh, thi küzo kümthsüthsüwa tü aküwie vü viruveh.

²³Ma nüh akuoküjiri saküji, thi ma nüh zorieveh: ma nüh akuoküjiri sakümza, thi jümari zoriemümti.

²⁴Ma nüh küthsükümshiwa azhihvü anyira levüri vünüh vijamümti, thi jaküm lehkhuji mükünyu vü mari tse küzemümti.

²⁵Mari tü anyih müvi nüh aküzovü rüpa tsetseti; thi ma nüh mari tü kümsheri küsü üta puolepuozaz