Read Pochuri Naga JOB 14 Bible Online

JOB 14 - Pochuri Naga bible

JOB 14

¹Anyi nyimzari küsü vünüh küwuoa tü, rülo pike azhi thi kümnomna pro.

²Ma tü aküwu küsü kümjie shuru, thi wahzhü tewawati; ma tü arüzhe küsü üta ratewa, thi pehmwa nüh sasati.

³Thinü noh tü jükümjie küsa küsü vü noh notha no, thi ma sieru nü noh sie ashih vü ruveh ülo?

⁴Mükümtse küsü vünüh thawa nüh kümtse zanyo viru ra na lo? Nyi küsü nga nyu.

⁵Ma rülori tü kütuohke kümthuoh kenüh, thi ma sa küürüh tü noh vü pehkümthuoh kenüh, thi ma tü kari müwara ta noh nüh kükete vü chieke,

⁶ma vünüh noküze luo, thi küpehm luo, akeri küsü kümjie ma rülowa vi ma nyiehra küükhruom luo,

⁷küpakenühnyunü athsoh küsü kenüh küluohzhe pehveh, mükütüküzü jüma shüchiehm ketünga, jüma tü shizhu le naveh, thi ma küshi tü küütuowa nyu.

⁸Ma mpa nüh ma rüzoh tü azhih lovü nüh ze wie ketünga, thi ma totsoh tü azhih vünüh süm wie nga,

⁹jüma tü ajuh rheküüngu vünüh tsotüzhu naveh, thi are kürünyi küshi üta tsuona shu naveh.

¹⁰Thitü anyiri thuoüji sütewaveh, thi alo vü thsemümti; anyiri thuoüji ma rühtho sehkhe samümti, ma tü khievü pehveh lo?

¹¹Asuozü küsü nüh ajuh ngeteküwa üta, thi rühgu küsü nüh ratewa thi küwehte küwa üta,

¹²Jükümjie vünüh anyiri tü tetsuotsuoti, thi müsühra le nüh sasati; atülüri müküra küju ma tü küsührawa nyu, nyutü ma küzeh vünüh aküneküüthewa nyu.

¹³O noh tü küsürazhie vünüh hi küüthira thuoüji, noh rükümthowa müjie kükari küju hi sathesheh thuoüji, noh tü atsotho küsü chie hi tsü nü hi müshe thuoüji!

¹⁴Mükütüküzü nyi küsü nüh süm thuoüji, ma tü rho le naveh ülo? eh küüroh rülo aveh hi tü huo mhieveh, hi kümzhiwa müjie küru küju nü.

¹⁵Noh nüh hi ji naveh, thi hi nüh noh huo naveh; noh tü noh kenüh küürohwa müngu peh naveh.

¹⁶Jüta thuoüji noh tü eh lekha kürüh peh nathuoh, noh tü eh kükhiemuo künotetüwa nyuthuoh;

¹⁷eh küphrürie tü achükhu küsü lovü fetem nathuoh, thi noh tü eh künakhie nyiehvü külüwutem nathuoh.

¹⁸“Thitü aküzhiri tsuohtsaru nü kücherie jam, thi alokrüwa tü ma pe vünüh vijam;

¹⁹ajuhri nüh alohri huthuoveh; ajuh nüh azhithe müzhutewaveh; jükümjie noh nüh anyira küluohzhe zorieveh.

²⁰Noh nüh küsuokürho ma vü chara naveh, thi ma tü küzemümti; noh nüh ma tso khaphrü nü ma teküwamümti.

²¹Ma tsari tü küsiakesiakhri vü ruruti, thi ma tü jüma müthsü nüh sam; mari tü vikütsuom, thi ma tü jüma mümshi nüh sam.

²²Ma tü ma satsa küna mpa nüh küthsü wie; thi ma tü ma mpa ma kenüh küülu wie,” ti rületsü.