Read Pochuri Naga JOB 15 Bible Online

JOB 15 - Pochuri Naga bible

JOB 15

¹Jüsevü Elifaz Temanwa nüh rüle taji:

²Kümahtsari nyi küsü tü, amürhü zanyoküthsü nüh kürüle leh ülo, thi zhiehshu mürhü nüh ma mpa ma saküüpro leh ülo?

³Ma tü akünyia mükünyie vünüh phra nü, nyutü azhü ma nüh vi nü kümhie müküsara vi nü wuluo nti ülo?

⁴Thitü nohri tü Saküüwuowa kükrü vünüh sa küze na saveh, thi Saküüwuowa tüvü kümshephoke khetem na saveh,

⁵küpakenühnyunü noh künakhie nüh noh po sosie tsüveh, thi noh tü amizhi aküzü rükaveh.

⁶Nohri apo mpa nüh nohri müküchie saveh, hi nüh nyu; nohri pomieh mpa nüh nohri pohvüzhü satsüveh.

⁷Noh tü anyi küwuo khuwa ülo? Nyutü noh tü küzhihori atüvü nüh vizhuteruthuoh ülo?

⁸Noh tü Saküüwuowa nüh zhühphiekütsü künathuoh ülo? Thi noh kümahtsa vi noh mpa küketera sa ülo?

⁹Hiri nü müthsü ta küsa noh tü khiela nüh thsüveh lo? Hiri nüh thsümkümtsetohra, noh tü khiela nüh thsümshiveh lo?

¹⁰Ashehküpruwa nga thi aküzeri nga hiri azhievü pehveh, noh pa nyiehvü kükhruo.

¹¹Noh kenüh Saküüwuowa luoveh saküürüzih tü zah le ülo, nyutü azhü azhüzhüsheh nü noh vü küzaküveh tünoh kenüh zah le ülo?

¹²Mokenüh noh tü noh luoveh nüh viküüzemümti lo, thi mokenüh noh notha tü küphriehphriehti lo,

¹³Jüti sanü noh sietse tü sühle Saküüwuowa sie küürühnyuonyuoti nü, thi jükümjie küsa azhüri tü noh po vünüh küüshuveh lo?

¹⁴Anyiri tü mowa nü ma tü mütsera na lo? Nyutü krevühri küsü nüh ma tü küwuo, ma tü nyitsara naveh ülo?

¹⁵Halie, ma kümtse vü Saküüwuowa tü kütsohtü müthse, thi atülü tü ma notha vü mümtse;

¹⁶akükrewa thi küütsaküsühwa tü küzakele nga momasa lo, ajuh kümjie künakhie zhu nü kütse anyiwa!

¹⁷Hi nüh noh kütsanavehünüh, künaluo; thi hi nüh mowa ngu nüh, hi nüh phrashu naveh ünüh.

¹⁸(Kümahtsa nyiri thawa nüh küza nüh, thi mari apari nüh müküthi nüh sam nüh,

¹⁹thawa vü mpa nüh azhih tsü nüh, thi anyitheri küsü nga mari azhievü kari müwa nüh).

²⁰Anyi khukekümsüwa tü ma rülo aveh vü, aküna nüh kürüte tsetseti, mahvi aveh vü mükünyishi kenüh sazhuhke naveh.

²¹Ma khüna vü kümzhoh jikhiri tü; küzorieri tü kütsarhie vünüh ma rügivü ru naveh.

²²Aküzo vünüh ma tü sühle naveh ta küsa mütsohtü, thi ma tü anyuchuwa kenüh kürühkemthuoh.

²³Ma tü alohse kenüh kületsuo vü tsetewathuoh, ‘Jümatü khiela pehveh lo?’ ta sanü. Ma tü ma ke vü aküzo rülo küsü küche savehthuoh ta küsa thsü;

²⁴müshekümnomna thi asheküsü nüh ma sakümzhoh; mari nüh ma vü kücha sa, kajiri küsü nüh arieküsa küüche üta,

²⁵küpakenühnyunü ma nüh ma ke Saküüwuowa vü küchuoküüze kenüh, thi kükhratsawa vü künyie khuo,

²⁶müzike wiethuoh nüh ma tü aküsa kürütso joh huo küsü vi nü ma vü zhütse;

²⁷küpakenühnyunü ma tü, ma küthü vi ma nyieh hiete kümthuoh kenüh, thi ma keku vü aküthü vizhuhkümthuoh kenüh,

²⁸thi küüzo nyujiri vü rhomthuoh, azheh nyiri nüh mükürho lehvü, jümari tü küche taji zorie kümprohketeru naveh;

²⁹ma tü münyirhie ra, thi ma künyirhie tü aküsuo müpeh ra, nyutü ma tü azhih lovü rüzoh müchatura;

³⁰aküzo vünüh ma tü mürie teküwawanyu, anyihzhu küjuzhuwa tü netewa naveh, thi amürhü nüh ma küwuwa tü chiriejam naveh.

³¹Ma tü kürütsovü müküütsohtü tümluo, ma mpa ma müramizhi nü; küpakenühnyunü kürütso tü ma no shele naküveh kenüh.

³²Ma tsotho atüvü jüma tü thuojutsü wie naveh, thi ma tsuona tü kümzhiwa nyu.

³³Ma rhelivi müküne ma nüh küzhühjam naveh, rhelivirhu üta, thi ma küwu küzhüh küükrem naveh, Olive thsoh üta,

³⁴“küpakenühnyunü nyiaza mükünyie kürefü thuoüji küvükre, thi atheküvira zheh tü anyih nüh tsom naveh.

³⁵Mari tü arokümsü moh nü kümsü vizhutsütsüti, thi mari luoveh tü kürieriekhri küchecheti,” ti rületsü.