Read Pochuri Naga JOB 16 Bible Online

JOB 16 - Pochuri Naga bible

JOB 16

¹Jüti küsa vü Job nüh rüle taji:

²Hi tü jükümjie küsa hozake künarathuoh; nohri aveh tü aluoveh müsükütseri saküürüzihri kheh wie.

³Amürhü zhüri tü ma pohte pehveh ülo? nyutü mowa nüh noh rüsaküshuveh nü noh tü rüleveh lo?

⁴Hi nga noh üta phrahtera naveh, mükütüküzü noh tü hi kümjie vü peh thuoüji; hi tü azhükürü nü nohri sie huo ra naveh, thi nohri vü eh lü küze naveh.

⁵Eh po vi nohri sakükhra ra naveh, thi eh pomieh nüh luoveh sakürüzih tsü naveh, nohri küna sakürüpahtsü naveh.

⁶Mükütüküzü hi nüh phrahte wie ketünga eh küna tü mürüpah wie, thi hi nüh vüte wie ketünga, küzake hi vünüh tewaveh lo?

⁷Saküüwuowa nüh hi saküthasü tsamthuoh; ma nüh eh refü aveh saküüzomthuoh,

⁸Thi ma nüh hi sakütsürümthuoh, jüma nüh eh pohvü küsü; thi eh kütsi nüh sühra hi wuluomthuoh, jüma nüh eh nyiehvü pohvü satsüveh.

⁹Ma rüküshu vünüh ma nüh hi zokhrimthuoh, thi hi mürhümthuoh; ma nüh hi vü ma ha hahrimthuoh; eh kürholuowa tü hi vünüh ma notha küzahmthuoh.

¹⁰Anyiri tü hi vü mari apo kamthuoh, mari tü hi kewu wie taji eh nakieh jetsüthuoh, mari tü mari mpa nüh sezhuh küfike nü hi sie luohsaveh.

¹¹Saküüwuowa nüh hi vi kümsüri vü tsümthuoh, thi hi vi khuhkekümsüra ke vü küliemthuoh.

¹²Hi tü rüzih pehveh ünü ma nüh hi zokhuorie; ma nüh aku vünüh hi shoh nü hi kücherie; ma nüh hi vi ma noshe üta sa,

¹³ma lawih küviri tü hi mükieshe. Ma nüh eh mükehri phie küpie nü müküpeketü nüh samthuoh; ma nüh eh se azhih vü saküürhüriemthuoh.

¹⁴Ma nüh hi tü wulehküzokhuo vünüh hi zokhuorie; arieküsari üta ma tü eh rügivü zhü.

¹⁵Hi tü atsahkie eh sahu rügivü kürüke, thi eh kükhra vi azhitho vü thsem.

¹⁶Hi tü akükrie vünüh eh nyieh müru, thi eh nothaküneh rügivü tü zomthsüthsü;

¹⁷eh ke vü küvürie münyie wie ketünga, thi eh kükhuo tü mütha wie nga.

¹⁸O azhihwa, eh züh müsote tümluo, thi eh küzie tü kümnyiepe müküüngu tümluo.

¹⁹ Khinyi wie nga, halie, eh pohvü tü atülü vü pehveh, thi eh kenüh pohvüküsatüri tü kümsie vü pehveh.

²⁰Eh füri nüh hi vü müküchieküzhü sa; eh notha tü Saküüwuowa vü arüthsü küshozhu vehthuoh,

²¹ma tü Saküüwuowa sie kükato vü peh na küsa kenüh nyi küsü nüh ma zhephruwa siekükato üta,

²²küpakenühnyunü mahvi piketeru thuoüji hi tü shele müküru lehkhuji vü tewa küvehthuoh kenüh.