Read Pochuri Naga JOB 18 Bible Online

JOB 18 - Pochuri Naga bible

JOB 18

¹Jüta küüzavü Bildad Shuhitwa nüh rüle taji:

²Noh tü küthakele azhü zheküka nti lo? Nonoluo, jüta thuoüji hiri nüh küza naveh ünüh.

³Hiri tü mokenüh ase-ashuh kümjie chiekeveh lo? Mokenüh hiri tü noh notha vü zhehphroveh lo?

⁴Noh tü noh mpa noh rüküshu vünüh noh zokhri, noh kenüh azhih tü kulem naveh ülo, nyutü alokrü tü ma pe vünüh vijam naveh ülo?

⁵“Ah, khukekümsüwa lati tü zokünemtüthuoh, thi ma nyihzhu tü müwiethuoh.

⁶Ma juhthsüzheh vü lati tü zomthuoh, thi ma latiku ma nyiehvü küpehwa tü zokünemthuoh.

⁷Ma küsuo lekhari tü sakümlumtüthuoh, thi ma kürüzheri mpa nüh ma shoh jamthuoh,

⁸küpakenühnyunü ma tü ma mpha mpa nüh aneh vü ma vehjake kümthuoh kenüh, thi ma tü küphieke küüluke rügivü tseveh.

⁹Apiehjü nüh amütseh vünüh ma tieteveh, küjurü küsü nüh ma tieteveh.

¹⁰Ma kenüh azhih vü ali küsü küthite saveh, ma kenüh lekhuji vü piehjüküsü saveh.

¹¹Saküükrüri nüh awuowuo vünüh ma sakükrü, thi ma mü tseh vi nü ma küka.

¹²Ma kükhra tü kürümamthuoh, thi kümsü tü ma jihkümshü liekeveh.

¹³Aküna nüh ma sahu tsamthuoh, aküsü küwuo khuwa nüh ma jihkeri tsaveh.

¹⁴Ma tü ma nüh tsohtüküveh juhthsüzhehwa vünüh ma zokhrimthuoh, thi saküükrüra kajiwa vü ma viruthuoh.

¹⁵Ma juhthsüzheh vü tü ma zhi mükünyuri rhoveh; ma kürhie rügivü tsoküüjuloh zhuhjakemthuoh.

¹⁶Ma rüzoh tü akükhu vünüh küwehmthuoh, thi ma tsuonari arügivü nüh wazhümthuoh.

¹⁷Ma küsheke tü azhih vünüh pokahmthuoh, thi ale vü ma nyo münyiethuoh.

¹⁸Ma tü aküwie vünüh aküzo vü kharitewathuoh, thi azhih vünüh ma zhezhumthuoh.

¹⁹Ma tü ma nyiri azavü tsatori nyutü küthsoküzhi münyie, thi ma nüh rhorhoti küsa vü kürhora münyiethuoh.

²⁰Mari zhiehturi tü ma rülo vü nosü tewathuoh, thi zhiehshu kükrüküngo nüh mari reteveh.

²¹Jükümjie küsari tü anyi kümsüra kürhope tsari, jükümjie küsari tü Saküüwuowa müküthsüra azhie,” ti rületsü.