Read Pochuri Naga JOB 19 Bible Online

JOB 19 - Pochuri Naga bible

JOB 19

¹Thinü Job nüh rüle taji:

²Küthake noh tü hi sakümnomna nti lo, thi azhü vünüh hi zokhuo kümjehmrie nti lo?

³Noh nüh lekha türakeri eh rügivü küüjo jake vehthuoh; hi samsü na küsa noh tü müzükrü ülo?

⁴Thi mükütüküzü ma mpa nüh hi tü nahphetewa wie ketünga eh küzih tü ha hi vü küpeke wieveh.

⁵Mükütüküzü noh tü hi vünüh noh mpa noh saküjiveh üji; thi hi vü eh müküchieküzhü vi küwuluo saveh üji;

⁶jüta thuoüji Saküüwuowa tü hi vi nü müküleh vü thsemthuoh ti küsa thsüluo, thi ma neh vi hi wu mükielemthuoh.

⁷Halie, hi nüh zie taji, “Züh küthü,” ti sa, thitü hi mürüle; hi nüh zie ji, thitü kümsho münyie nüh sa.

⁸Ma nüh eh leh shote mütü, jükenüh hitü kari müwara nüh sa, thi ma nüh eh lekhujiri vü aküzo thsemtü.

⁹Ma nüh hi vünüh eh kütholathovü fojamtü, thi eh lü rügi vünüh kajilüwewa vitewa.

¹⁰Ma nüh awuowuo vünüh hi zokhuo, thi hi tü münyiethuoh, thi athsoh kümjie eh küluozhe luzhu müthuoh.

¹¹Ma nüh ma rüküshuwa hi vü tsokemthuoh, thi ma kürholuowa ta hi chiekemthuoh.

¹²Ma riekhuori tü kürü tseke küru sa; mari nüh hi vü kümkieshe küürohri vijake, thi kürünape sa eh juhthsüzheh mükielem.

¹³Ma nüh eh jienüri vi kükiehtuo vü samtüthuoh, thi eh kenüh kükatori tü hi vünüh aveh anyithe samthuoh.

¹⁴Eh jünü riehkhuo thi hi küshehnyi afüri tü hi jamthuoh;

¹⁵eh zheh vü küzehri tü hi kümamthuoh; eh siepevühri tü hi anyitheri ta chiekemthuoh; hi tü mari notha vü alieri samthuoh.

¹⁶Hi nüh eh siepewa ji, thitü ma tü hi mükühuthuoh; hi tü eh po vi nü ma vü mükhuo üji mümhiethuoh.

¹⁷Hi tü eh vüvüh vü küzheleri samnathuoh, eh zah atsa atsari vü künyakuo sam nathuoh.

¹⁸Atsa kürünguori tsatsa wienga hi kulemthuoh; hi sühra thuoüji hi vü jahzhizhiti.

¹⁹Eh fü tori tü hi rhorhamthuoh, thi hi nüh külori nga hi vü sie saluomthuoh.

²⁰Eh rüri tü eh sahu vü thi eh sazhü vü küpekemthuoh, thi hi tü eh hara sahu vünüh mürietewathuoh.

²¹Hi nokümzeluo, hi nokümzeluo, O nohri eh füri, küpakenühnyunü Saküüwuowa ake nüh hi pa kümthuoh kenüh!

²²Mokenüh noh, Saküüwuowa kümjie küsa tü hi zheveh lo ti? Noh tü mokenüh eh sazhü vü aloküra müsara nüh sam lo?

²³O eh zhüri tü kürhüke tüla! O jümari tü lasipha küsü lovü kütekera tüla!

²⁴O amürü kürhüvüh thi amürü masü tü, alokrü vü küsuokürho khrüke saraveh nü!

²⁵küpakenühnyunü eh kürhehsawa tü rho küveh hi nüh thsüveh nü, thi asehkhe vü ma tü azhihwa rügivü tsie naveh;

²⁶thi eh sahu tü hakümjie vünüh zoriem wie ketünga, eh sazhü vünüh hi nüh Saküüwuowa ngu naveh,

²⁷ma tü eh nato vü peh küveh ngu naveh, thi eh notha nüh ngu naveh, küpari üta nyu nüh. Eh luoveh tü eh lovü nüh küzhike pehvehthuoh!

²⁸“Mükütüküzü nohri nüh, ‘Hiri tü mokümjie ma zhe na lo!’ ta thuoüji, thi, ‘Arüzoh zhünyowa ma vünüh ngura thuoüji,’ ta sanaveh;

²⁹anyuchuwa krü luo, küpakenühnyunü arükümtho tü anyuchuwa kümnomna viru küveh kenüh, jüta küsa vünüh noh tü ashihküsa pehveh ta küsa thsü naveh,” ti rületsü.