Read Pochuri Naga JOB 2 Bible Online

JOB 2 - Pochuri Naga bible

JOB 2

¹Jüma sevü nga rülo küsü Saküüwuowa tsa nyimpari tü mari mpa mari vi nü VÜWA tüvü mütu nti ru, thi Saküüwuowa nga VÜWA tüvü mütu nti mari azhievü nyiru.

²Thinü VÜWA nüh Saküüwuowa vü, “Noh tü khievü nüh ru lo?” ti küna. Saküüwuowa nüh VÜWA vü, “Azhih rügivü tsewa tseru, thi jüma rügivü tsekhru tsetsuo ti küsa vünüh,” ti rületsü.

³Jüta kürüle vü VÜWA nüh Saküüwuowa vü, “Noh tü eh siepewa Job tü azhih vü ma kümjie münyie ta küsa, kümte küsü nga münyie thi kümsho anyi küsü, ma tü Saküüwuowa krü thi kümsüwa vünüh sühle teküwawa ta küsa noh tü ma müshenonothuoh ülo? Ma tü khinyi nga ma küjutsawa küjeh phoke wieveh,” ti küza.

⁴Jüti küüza vü Saküüwuowa nüh VÜWA vü, “Sahu kenüh sahu! Nyiri küsü nüh pehküveh aveh tü ma kürho kenüh tsü naveh.

⁵Thitü khinyi noh ke thsuozhu nü ma rü thi ma sazhü pa luo, ma nüh noh nyiehvü müzüke naveh,” ti küza.

⁶Thinü VÜWA nüh Saküüwuowa vü, “Halie, ma thuoüji noh kükhra vü pehveh; ma kürholi mpa nüh küükhe satsüluo,” ti küza.

⁷Thinü Saküüwuowa tü VÜWA tsahtü vünüh tsezhutewa nü Job mpha vünüh ma lokrieh küju akümatsatsa khüma vi ma sakümnomna tsü.

⁸Thi ma tü ma küsi nti aküfükükuo küsü vi nü aweji za vü shupeh.

⁹Jüti küsa vü ma vüvüh nüh ma vü, “Noh tü khinyi nga noh küjutsawa küjeh phoke wieveh ülo? Saküüwuowa müzüm nü süm luo,” ti küza.

¹⁰Thitü ma nüh ma vü, “Noh tü küzhevühri küsü nüh küphrahte kümjie vünüh phrahteveh. Hiri tü Saküüwuowa ke vünüh kümhie vira naveh ülo, thi hiri tü kümsü küvira wa nyu ülo?” ti küza. Hamari aveh vü Job tü ma pohmieh vi mükhiemuo wie.

¹¹Jüti küsa vü ma fü küche tü ma vü kümsü küru aveh küüna ra vü, mari tü papa zhie vünüh ru, Elifaz tü Teman vünüh ru, Bildad tü Shuri vünüh ru, thi Zofar tü Namat vünüh ru. Mari küche tü ma sie kürü alorü nti thi ma luoveh sakürüzih nti kürü tsotho küteke küsü sa.

¹²Mari nüh kületsuo vünüh ma küngu vü mari tü ma mümjüra nüh sanü mari jikhi zie taji krietewa; thi mari kruzhuri müzükhrih nü azhitho vi atülü küto vünüh mari lüri mülo.

¹³Jüti sanü mari tü ma sie azhih vü rülo türü thi rüza türü shupeh, thi nyi küsü nga ma vü zhü küsü nga müphra, küpakenühnyunü ma kümnomnawa tü ji sheh küm küngu kenüh.