Read Pochuri Naga JOB 21 Bible Online

JOB 21 - Pochuri Naga bible

JOB 21

¹Thinü Job nüh rüle taji:

²Kümhieti eh zhüri künaphohke luo, thi hama nüh noh luoveh sakürüzi luo.

³Hi sie küzhike luo, hi nüh noh vü küza naveh ünüh, thi hi nüh phrahteküm sevü nüh riesa wie luo.

⁴Eh kenüh thuoüji, eh kürü tü anyiri saluoveh ülo? Hi tü mokenüh küüzhike münyie nüh sam lo?

⁵Hi noluo, thi anyieh küzüh luo, thi nohri ake vi nohri apo vü saluo.

⁶Hi tü jüma müshekera thuoüji hi tü luovehzah tewawati, thi küüshüh nüh eh sazhü retewawati.

⁷Mokenüh khukekümsüri tü rhoveh lo, kükhruo mahvi ju, thi akükhra vü rho müzhoveh lo?

⁸Ma tsari tü mari tsahtüvü nüh vizhu, thi mari tsatori tü mari notha tüvü nüh vizhuh.

⁹Ma zhehri tü akükrü vünüh lohji, thi Saküüwuowa mürü tü mari vü münyie.

¹⁰Mari shüvotsa zahri tü mükütuo wiethuoh nüh müzah; mari mieshüzahri thi ma tsa zhemja.

¹¹Mari atsa küzahri tü anyihnyih kümjie küzezeti, thi mari tsari tü tsitsihti.

¹²Mari tü siethokhrizah thi topito vünüh azah sake, thi pilechu jikhi vü nyierakhruoke.

¹³Mari tü mari tsotho kütsarhie vünüh küze, thi luovehkürüzih ti küsürazhie vü tetsuo.

¹⁴Mari nüh Saküüwuowa vü, ‘Hiri vünüh tewaluo! Hiri nüh noh lehri küthsü mümngu.

¹⁵Kükhratsawa tü mowa nü hiri tü ma kütsü müsaji mümhieh lo? Thi mükütüküzü ma vü kükhuo sanü hiri tü mowa künyie nguveh lo?’ ti sa.

¹⁶Halie, mari kütsarhie tü mari ke vü peh müveh ülo? khukekümsüra küshike tü hi vünüh letsuomthuoh.

¹⁷Khukekümsüra latiku tü küzakele nga saküne lo? Jümatü mari kümsü tü ma vü teru müveh ülo? Jümatü Saküüwuowa nüh aküna tü ma rüküshu vünüh suo müveh ülo?

¹⁸Jüma mari tü amürhü tüvü amaguo kümjie, thi aguh amürhü arhüji nüh viteküwa üta nyu ülo?

¹⁹Nohri nüh, ‘Saküüwuowa nü mari künakhie ma tsa kenüh vizhuhveh,’ ta küza, ma nüh mari vü küno shelem luo, jüti sanü mari küthsüm luo.

²⁰Mari küzorie tü ma nothari mpa nüh küüngum luo, thi mari tü kükhratsawa arükümtho küzhum luo,

²¹küpakenühnyunü mari asevü ma zhehri kenüh mowa kütsahza pehveh lo, mari sari küürüh juküm vü mowa tsahzaveh lo?

²²Saküüwuowa küthsü küsosie wuori pehveh ülo, kümsie vü küpehra ashih ma nüh saveh ta küsa ngu nü?

²³Kütsarhie küpro vünüh nyi küsüsü rüzih thi kütoh taji,

²⁴ma satsa tü aküthü nüh pro, thi ma rüra arüjoh tü kütemthuoh.

²⁵Küpawa ma kürholi kükha vünüh sü kümhie mümpo wiethuoh nüh.

²⁶Mari tü küsürieh küsü vünüh azhitho vü küchuo tsuo, thi ajienyu nüh mari külüwete.

²⁷Halie, hi nüh nohri kümshe thsüveh, thi nohri kürüzhe nüh hi müküleh küsa nta,

²⁸küpakenühnyunü noh nüh, ‘Kajitsara zheh khiela pehveh lo? khukekümsüri nüh kürhope juhthsüzheh khiela pehveh lo?’ ta küza küveh kenüh.

²⁹Noh tü lehkhuji vü küzehkütseri vü müküna ülo, thi nohri tü mari povüzhü müvi ülo,

³⁰jüti sanü khukekümsüri tü kümsü rülo vü ase müsara ülo, jüti sanü ma tü arükümtho rülo vü küloletsüra ülo?

³¹Thawa nüh ma nyieh vü ma leh lo, phrazhu lo, ma nüh küsawa vünüh thawa nüh ma saküüzole tsü lo?

³²Ma tü arüku vü wuo kütsü vü ma rüku rügivü künote sam.

³³Anyuo vü kümsikeri tü ma kenüh müngem; anyiri aveh tü ma se zhe, thi ma tüvü kuoküwari tü mküürührhüra.

³⁴“Thinü jüta thuoüji nohri tü, mokümjie kürütso zanyoküsü nga mükünyu vi eh luoveh sakürüzih nti lo? Nohri nüh kürüle tü aküriewie küchie nüh zanyo küsü nga nyuthuoh,” ti rüle.