Read Pochuri Naga JOB 22 Bible Online

JOB 22 - Pochuri Naga bible

JOB 22

¹Elifaz Temanwa nüh Kürüle Jüsevü Elifaz Temanwa nü rüle taji:

²Anyiri küsü Saküüwuowa vü künyie pehveh ülo? Azhütsa, thawa nüh mütsaveh ünüh ma mpa ma kenüh nyieveh.

³Mükütüküzü noh nüh nyitsa thuoüji, kükhratsawa vü loküzhe wuori pehveh ünü nyu lo, nyutü mükütüküzü noh nüh, noh lehri vü kümte müsa thuoüji, ma vü nyieveh ünü nyu lo?

⁴Jüma tü noh nüh ma kükrü kenüh ma nüh noh müchieke ülo, thi noh sie ashih vü tuveh ülo?

⁵Noh khukekümsü tü ji müveh ülo? Noh künakhieri tü küpohte münyie luo,

⁶küpakenühnyunü azhühnyo mükünyie vünüh noh nüh noh jienüra küshieteri vi kümthuoh kenüh, thi mari thsümnyi foja nü anyiju samtüthuoh.

⁷Noh tü ajuh vi münokütseri müküzhu, thi noh tü kürümari vünüh lohse küjehketewa.

⁸Anyi akükhra küpehri nüh azhih mükaveh, thi küütso nyiri nüh jüma lovü rhoveh.

⁹Noh nüh tünyivühri kürütso küzem, thi apa mükünyira apie nehnyamtüthuoh.

¹⁰Jükenüh küjurü tü noh mükieshemthuoh, thi zhürüluo saküükrü tü noh külüwutemthuoh;

¹¹Noh küwie tü saküzomthuoh, jükenüh noh tü müngu, thi ajuh anyuoküza küsü nüh noh müzhiewuveh.

¹²Saküüwuowa tü kümsie atülüri vü peh müveh ülo? kümsietsa wutsiri noluo, mari tü küzakele nga müsie lo!

¹³Jükenüh noh nüh Saküüwuowa tü mowa thsüveh lo? Ma tü zomthsüthsü nü küsa vünüh ashih sara naveh ülo?

¹⁴Aküsa küluri nüh ma küzhutem, jükenüh ma tü müngu, thi ma tü atülü kuruo vü tsewawati saveh, ta küzaveh.

¹⁵Noh tü aleh kürüwiwa müzhe wie nti ülo, Khukekümsüri nüh nyiphoh kümwa?

¹⁶Mari tsotho atüvü nüh mari tü prütewathuoh; mari külojupewa tü hutewathuo.

¹⁷Mari nüh Saküüwuowa vü, Hiri vünüh karitewaluo, ta küza, thi ‘Kükhratsawa tü hiri vü mowa sara na lo?’ ta küza.

¹⁸Jütawie ketünga ma nüh mari zhehri zanyo kümhie nüh saküprotsü, thitü khukekümsüra zanyoküthsü tü hi vünüh kietuomthuoh.

¹⁹Künyitsari tü jüma ngu nü alowie vehthuoh; mükünakhieri nüh mari riesa thi mchiemzhüthuoh,

²⁰nohri nüh, ‘Hiri kürholuori tü zoriemthuoh, thi mari nüh kükheküsari thuoüji anyih nüh tsomthuoh,’ ta küza.

²¹“Saküüwuowa sie azhühka saluo, thi luoveh rüzih luo; jüta küsa vünüh kümhiewa noh vü ru naveh.

²²Ma po vünüh süphiekütsü vi luo, thi ma zhüwa noh luoveh lovü kütüluo.

²³Mükütüküzü noh nüh kükhratsawa vü sheleru, thi noh mpa noh sakürünyie thuoüji mükütüküzü noh nüh mükünyitsa noh juhthsüzhehri vünüh vija kükiehtuom thuoüji,

²⁴mükütüküzü noh nüh azhitho vü suna sa thuoüji, thi Ofir suna vi alohri azavü achalo vü thse thuoüji,

²⁵thi mükütüküzü Kükhratsawa tü noh suna thuoüji, thi noh kürhe rakasa thuoüji;

²⁶jüta thuoüji noh tü noh mpa nüh, kükhratsawa vü nolo naveh, thi noh nyieh tü Saküüwuowa vü toke naveh.

²⁷Noh nüh noh kükhuo ma vü sa küze, thi ma nüh noh künatsü naveh; thi noh nüh noh küüshieküphrahzhuri tsü naveh.

²⁸Noh nüh azhühnyo küsü kürathuo naveh, thi jüma tü noh kenüh sazhura naveh, thi noh lehri vü aküwie nüh wieketü naveh,

²⁹küpakenühnyunü Saküüwuowa nüh kürhiehzawa sakürünyietüveh, thi küsajiwa külole tsüveh,

³⁰ma nüh mükünakhiewa vizhu naveh; noh tü noh ke kümtse vünüh vizhunaveh,” ti rületsü.