Read Pochuri Naga JOB 23 Bible Online

JOB 23 - Pochuri Naga bible

JOB 23

¹Thinü Job nüh rüle taji:

²Nosü nga eh kürü tü khaveh, hi nüh külüchi vünüh ma ke tü hi vü küzhoveh.

³O, hi tü khiela nüh ma phahra naveh ünüh küthsü tüla, hi tü ma pe vü nga ru wie na nü!

⁴Eh zhühnyowa tü ma tüvü thse na nü, thi eh po tü küwuluo nüh pro na nü.

⁵Ma nüh mowa rüle tsü naveh ünüh thsü na nü, thi ma nüh hi vü mowa küza naveh ünüh thsümshi na nü.

⁶Ma tü ma kükhra küji vünüh hi sie küra naveh ülo? Nyu; ma tü hi vü azhüzhü tsü naveh.

⁷Kümshori tü ma sie zanyo müshera naveh, thi hi tü küsuokürho eh shih vünüh müshora naveh.

⁸Halie, hi tü atüvü tsezhuwa thitü ma tü münyie la; thi asevü tsekewa thitü hi tü ma müngu nüh sam;

⁹ake azhu wuovü nüh hi nüh ma phah, thitü hi tü ma müngura nüh sam; hi tü ake azhie wuovü küreke, thitü hi tü ma müngura nüh sam.

¹⁰Thitü hi nüh aleh khie wuovü tsekeveh ünüh ma tü thsü, ma nüh hi kümte vü hi tü suna kümjie shuteru naveh.

¹¹Eh mpha tü ma jinyiperi vü nyi phohke tewawati; hi tü ma leh müzhera, thi nato vü sühle temwa.

¹²Hi tü ma pohmie vünüh azhühnyokütsü vünüh kari temwa; hi tü ma povü azhüri vi nü eh tühso lovü thsesaveh.

¹³Thitü ma thuoüji mükhaphrükhale, thi thawa nüh ma küürelera na lo? Ma nüh mowa münguveh ünüh ma tü jüma sa,

¹⁴küpakenühnyunü ma nüh eh kenüh mowa küteke saveh ünüh ma nüh sakheh wie naveh; thi jükümjie küsa zanyori hozake ma müshe lovü tüveh.

¹⁵Jükenüh hi tü ma küpeh kenüh müzhoh; hi nüh küno vü hi tü ma kenüh kükhrih.

¹⁶Saküüwuowa nüh eh luoveh saküthasü; kükhratsawa nüh hi sakümzhoh;

¹⁷küpakenühnyunü hi tü aküzo nüh hi vi ma lovü küzhuteküm kenüh, thi zomthsüthsü nüh eh nyieh külüwu temtü.