Read Pochuri Naga JOB 24 Bible Online

JOB 24 - Pochuri Naga bible

JOB 24

¹Kükhratsawa tü mokenüh ashih kenüh atsotho müsa tü lo, thi ma küthsüri tü mokenüh ma rülori müngu wie lo?

²Kümsüküsari tü azhih arühri vijamümti; mari tü anyihnyihri prütewa nü ashiekümrhuorhuoti.

³Mari tü apa mükünyiera rawuh küzahwa zhejamtütüti, küshiete kenüh mari tü tühnyivühra shüvotsa viviti.

⁴Mari tü kümkhuori küjie lehkhuji kükaririti; azhih vü kümkhuori aveh tü mari mpa nüh küthimthuoh.

⁵Halie, shünyiza vü ato rawuhküzahwa üta, mari tü mari küürohkükho vü tewathuoh, mari tsari kenüh reza vü ashie phah tewathuoh.

⁶Mari tü azhuh vünüh mari ashie vizhuhveh, thi mari tü khuke kümsüra rhelivi mürherheti.

⁷Mari tü arüza aveh anyiju zehzehti, thsümnyi müsanüh, thi aküso vü nga kühiete müsa.

⁸Mari tü aküzhira tsoh nüh jie, thi kümnyi küpeh ngü kenüh alokrü vü khephohke.

⁹Jüla tü apa mükünyie tühnü vünüh prüte küwari peh, thi kümkhuo nyinyuote vi küshiete sa.

¹⁰Mari tü anyiju küzhu mükiele, thsümnyi müvü nüh rüma, mari tü akhrü vünüh vi;

¹¹khukekümsüra Olive ato vünüh avüjuh sa vi; mari tü rühtse nü akhah tsüzhu, thitü kürieh wie.

¹²Anyujiwa vünüh sü na saküvehri tü lüchih, thi kürholi müsamna kümri tü küükra kenüh zie; tü Saküüwuowa tü mari kükhuo vü amüshe müthsetü.

¹³Jüvü aküwiewa sie küsaluori peh, ma lehri sie zarike müküsari, thi ma lekhujiri vü müpeh nüh sam.

¹⁴Küfetheri tü aküzo vü sühra, jüti sanü ma tü kümkhuo, thi küthohtsari zothe na küsa kenüh; thi arüza vü ma tü kürühuri kümjie.

¹⁵Nyihvühnyihpa küsara notha nga küzohriehzohrü huoveh, ‘Notha küsü nga hi küüngu wa nyu,’ ta sanü; thi ma tü ma tso saküpamümti.

¹⁶Aküzo vünüh mari tü azheh lovü phie tu; arülo vü thuoüji mari mpa nüh khethuoke peh; mari tü akütho müthsü,

¹⁷küpakenühnyunü makeri nüh thuoüji, aküzo müthsütü arüne küsa kenüh; mari tü aküzo müthsü vü saküükrüra füri küsa kenüh.

¹⁸Noh nüh, ‘Mari tü müküzhike wiethuoh nüh ajuhri nyiehvü vü tewa; mari suope thuoüji azhih vünüh müzümthuo; kürütseri küsü nga mari rhelivizhuh vü shele müru,

¹⁹kümkie thi aküsa nüh amüra juhri zaketewaveh; jükümjie küsürazhie nga khiemuo kümri zaketewaveh.

²⁰Anyuwa nyulari tü mari küma tewaveh; mari anyo tü kümshe müsa le wiethuoh; jükenüh khukekümsü thuoüji athsoh küsü kümjie zokhuo tewaveh,’ ti küza.

²¹“Mari tü küvükre krevühwa vünüh avo saveh, thi tühnyivühri vü kümhie küsü nga müsa.

²²Jüta wie ketünga Saküüwuowa tü ma kükhra vünüh kümzhora kürho saküsuoveh; mari tü akürhowa küluozhe münyie chih ünüh sührarati.

²³Ma nüh mari totetsü thi mari rüzoveh; thi ma nothari tü mari alehri vü pehtüveh.

²⁴Mari tü sütsuo pike sakümsie thi ratewaveh; mari tü apra üta wahzhü thi tsetewaveh; mari tü amütha akre kürhe üta rhetewaveh.

²⁵Mükütüküzü nüh jüüta mükünyu tüla thawa nüh hi tü akürieri ta kütoh na lo, thi hi nüh mowa phrahte nüh jüla zanyoküsü nga nyu ta küsa mükütsa tüm naveh ülo,” ti rületsü.