Read Pochuri Naga JOB 26 Bible Online

JOB 26 - Pochuri Naga bible

JOB 26

¹Thinü Job nüh rüle taji:

²Noh tü mokümjie ma akükhra mükünyiawa kükrathuoh lo! Noh tü mokümjie akükhra mükünyiewa apie küloletsü lo!

³Noh tü mokümjie sanü kümahtsa mükünyiewa vü shiketsü lo, thi küsara küthsü khielota phraketsü lo!

⁴Thawa küükra vi nü noh tü azhü jüri phrashuveh lo, thi thawa sietse noh vünüh shu tse lo?

⁵“Akükhu vü arüzheri tü khekhe ta saveh, ajuhri thi mari kürhieri.

⁶Saküüwuowa tüvü küsürazhie tü külielie wie, thi küzorie tü kükhete münyie luo.

⁷Ma nüh thajüwu nyiehvü zhiehtü küchuoküze, thi azhihwa tü zanyoküsü nga mükünyu rügivü thuosa.

⁸Ma nüh ajuhri tü ma külu küsa vü kürite saveh, thi akülu tü jümari kükhu vünüh müpuzhu nüh sasati.

⁹Ma nüh asa anyieh tiehteveh, thi jüma nyiehvü ma külu nüh küphranyuoh tüveh.

¹⁰Ma nüh ajuhri nyieh vü aküwie küsü vizhutsü, thi aküzo masü azhievü arüh sa.

¹¹Atülü tovühtovühri tü khekheta sasati, thi ma nüh küshüke vü toke pehpehti.

¹²Ma kükhra nüh juhküji tü saküüzohveh; ma küthsükümshi vünüh ma nüh Rahab kürhie.

¹³Ma rütho nüh atülüri tü sakümtse tsü, ma kenüh kuozhüteküwa arehsü shüphie.

¹⁴Halie, hamari nga thuoh, thitü ma lehri poteposhu wie; thi hiri tü küzakele ma küzhüwe küüza künaraveh lo! Thitü ma kükhra tsohküshi tü thawa nüh thsümshira na lo?” ti rületsü.