Read Pochuri Naga JOB 27 Bible Online

JOB 27 - Pochuri Naga bible

JOB 27

¹Thinü Job tü ma zhü küphrawa vi küza le taji:

²Saküüwuowa nüh rho küveh üta, thawa nüh eh kükato wa vitewa lo, thi kükhratsawa thawa nüh eh kürholi sakükhamtü lo;

³eh rühtho eh lovü kütü küju nü, thi Saküüwuowa sietse eh nyakulovü kütü küju nü,

⁴eh pomieh künyi tü akürie küphrahtewa nyu, thi eh mizhi tü rieriekhri nü küphrashuwa nyu,

⁵Noh katoveh ta küsa küphrahte hi vünüh kükietuom luo; hi müjie küsü küju nü hi tü hi vünüh küjutsawa viküjawa nyu.

⁶Hi tü eh künyitsa küjihphoke pehwieveh, thi hi nüh jüma küüzewa nyu; eh luoveh tü eh rülori küsü nga küüjo müsa.

⁷Hi mükünongüwa tü khukekümsüwa kümjie küsaluo, sühra nü hi sie küsaluowa tü mükünyitsawa kümjie saluo.

⁸Mükütsotüwa tü Saküüwuowa nüh, ma rehthuoküm vü küluohzhe mowa pehveh lo, Saküüwuowa nüh ma kürho viküm tüvü?

⁹Ma küsüro küruvü Saküüwuowa nüh ma küzie künatü naveh ülo?

¹⁰Ma tü kükhratsawa nolo naveh ülo? Tsotho aveh vü ma tü Saküüwuowa ji naveh ülo?

¹¹Hi nüh Saküüwuowa ake zhühnyo noh sosie naveh; hi nüh kükhratsawa vü küzhem na küsa mowa pehveh lo.

¹²Halie, nohri aveh nüh nohri mpa nüh nguthuoh; thinü mokenüh nohri aveh tü müjuju samthuoh lo?

¹³Hama tü Saküüwuowa vü khukekümsüra suope, thi kümrüri nüh Saküüwuowa vünüh aka küvi:

¹⁴Mükütüküzü ma tsari tü saküzhiveh thuoüji jüma tü anyuchuwa kenüh; thi ma tsatori tü akütsa müwale nüh sam.

¹⁵Ma saküürhori thuoüji, sahnakükho nüh chohwuwuti, thi mari tünyivühri tü kürümuo müsa.

¹⁶Ma nüh azhitho kümjie rakasa müjuke sa wie ketünga, thi anyisa kümjie thsümnyi lojuke sa wie ketünga;

¹⁷ma nüh jüma loju sala naveh, thitü kümshori nüh jüma küzhum naveh, thi mükünakhieri nüh rakasa tü küsuom naveh.

¹⁸Azheh ma nüh saküsawa tü sarülie küthse, künoteri nüh ashühzheh küsü küsa küthse.

¹⁹Ma tü nyirhie nü aze vü wa thitü jüüta müsa le ra; ma tü ma notha ko ünü ma künyirhie tü ratewa,

²⁰anyuoküza üta saküükrüri nüh ma shüwutewa; arüza vü nyiazamrhü nüh ma vitewa.

²¹Zhiehshu mürhü nüh arügivü shohke nü ma tü tewa; jüma nüh ma pe vünüh ma ramümti.

²²Mükümze wiethuoh nüh jüma nüh ma kürü; ma tü jüma kükhra vünüh alü küshohke nü prü.

²³Jüma ake tü ma vü khephohke, thi ma pe vünüh ma vü mülo.