Read Pochuri Naga JOB 28 Bible Online

JOB 28 - Pochuri Naga bible

JOB 28

¹Rakasa kenüh ape küsü pehtsa wieveh, thi suna kenüh küzüüa azhie küsü pehveh.

²Amürü tü azhih lovü nüh vizhuveh, thi asahwuo tü aloh vünüh tsorieveh.

³Anyiri tü asehkhe sanü aküze lovü thse mümti; thi apohte kületsuotsawa phahphahti, aküzomthsü vü aloh thi aküzo aküsheh phahphahti.

⁴Mari tü anyiri nüh kürho pe anyuo lehkhuji vü kümthsori saphieveh; küzehkütseri nüh mari tü kümamtüthuoh, anyiri kükiehtuo vünüh mari tü huthuomthuoh, mari tü küthuo sapehveh.

⁵Azhihwa kenüh thuoüji ma vünüh arüthoküsah shuveh, thitü akükhu vü thuoüji anyih jetewaveh.

⁶Jüma lohri tü khemlohri ape, jüma tü suna müchuh pe.

⁷Jüma lekhuji tü amüwa ashieküphah kenüh müthsü, thi küluoluohtsa notha tü jüma müjie ngu.

⁸Kürhiehza samwari tü jüma müjie nyike; amiewuowa tü jüma müjie kariwa.

⁹Anyiri tü ma ke vi alokhie lokrü vü sasati; thi aküzhira rüzohri vünüh luhumümti.

¹⁰Ma tü alokrüri vünüh ajuhle chühchühti, thi ma notha tü akürhe zanyori ngunguti.

¹¹Ma nüh akuzari phehtem, thi zanyo küthi küsari tü ma nüh aküwie vü vizhuruveh.

¹²Thitü kümahtsa tü khiela nüh phahra na lo? Thi küthsükümshira zhie khiela pehveh lo?

¹³Anyiri tü aleh jüla wa na küsa müthsü, thi jüma tü rhoküveh azhih vü mphahra.

¹⁴Aküshehwa nüh, ‘Jüma tü hi vü pehmveh,’ ta, thi juhküjiwa nüh, ‘Jümatü hi vü pehmveh,’ ta.

¹⁵Jümatü suna vünüh müngura, thi rakasa nüh ma me kümjie vünüh mükütera.

¹⁶Jümatü Ofir suna vünüh ame mükütera, akürhe kükhrüpuo nyutü khemloh nüh.

¹⁷Suna thi aloh küüzih nüh jüma vi zarike msara, nyutü jüma tü suna sithelohri nüh vi mümzhira,

¹⁸amekükhraloh nyutü aloh küüzih tü moma vi phrahte sa; kümahtsa ame tü asihthe nyiehvü nüh wie.

¹⁹Ethiopiari kürhelo tü jüma sie mümtera, nyutü jüma vi suna latha sie ame zarike müsara.

²⁰Thinü kümahtsa tü khiela nüh ruveh lo? Thi küthsükümshi azhie nü khiela pehveh lo?

²¹Jümatü rhoküvehri aveh notha vünüh küthimthuoh, thi amürhü vü prükütse müwari vünüh küthimthuoh.

²²Küzorie thi aküsü nüh, ‘Hiri tü hiri khüna vünüh jüma akürie küphrahte küsü künara,’ ti küza.

²³Jümawa vü küwa leh Saküüwuowa nüh thsümshiveh, thi ma nüh jüma ape thsüveh,

²⁴küpakenühnyunü ma tü azhih küpohteri vü no küzeveh, thi ma tü atülüri kükhu vü zanyo aveh nguveh.

²⁵Ma nüh amürhü vü ma küüte kütsü vü, thi küüto vünüh ajuhwa küsuozhuküwa;

²⁶Ma nüh atsoh kenüh küphrake küsü küsa vü, thi atsohküshi küürieh kenüh aleh küsü küsa vü;

²⁷ma nüh jüma ngu nü phrazhu; ma nüh jüma vizhu, thi jüma phahzhura.

²⁸“Thi ma nüh anyiri vü ‘Halie, VÜWA kükrü thuoüji kümahtsa; thi kümsüwa vünüh kükari thuoüji aküthsükümshi,’” ti rület