Read Pochuri Naga JOB 29 Bible Online

JOB 29 - Pochuri Naga bible

JOB 29

¹Jüsevü Job tü ma zhüküphrawa küza le taji:

²O, hi tü eh sari tü kürüwiwa vü küpehwie tüla, Saküüwuowa nüh hi noküveh rülori vü kümjie küsatüla;

³ma latiwa eh lü rügivü wie küveh vü, thi ma küwie vünüh hi aküzo vü tseküwa vü;

⁴hi tü eh mahrakhu rülori vü kümjie, Saküüwuowa sie afüküsa eh juhthsüzheh rügivü küpeh vü;

⁵Kükhratsawa nüh hi sietse küveh vü eh tsari nüh hi mükieshe küveh vü;

⁶eh lekhari tü tünüjuh nüh phrühküm vü, thi alokrüri nüh eh kenüh akuza vüjuh küshozhuküru vü!

⁷Hi nüh anyujiwa kheri alievü küwa vü hi nüh anyula vü eh pe küüche vü,

⁸vizari nüh hi ngu nü tewa, thi khruoküzeri nüh sühra nü tsie;

⁹kajitsari tü azhüküphra vünüh küzhitewa, thi mari ake vi mari apo küwute;

¹⁰zanyoküthsüra jikhi tü zotapehtewa, thi mari mizhi tü mari luole vü küpeketewa.

¹¹Akhüna nüh küünara vü akütsiawa ta hi ji, thi anotha nüh küngu vü jüma kütohmthuoh;

¹²küpakenühnyunü kümkhuori zieküvehwa hi nüh vizhu, thi apa mükünyie zanyoküsü nga mükünyiewa kükra nti.

¹³Pokahm na küsawa hi vü ru thi tsiatsü, thi tühnyivühwa luoveh tü nyierakükhruo kenüh azah sa küüsa.

¹⁴Hi tü künyitsa vikevü, thi jüma nüh hi kümphie; eh kümshotü kruzhu küühawa, thi külüwephohwa kümjie.

¹⁵Küüjuri kenüh hi tü anotha sa, thi ajihküjiri kenüh ajih sa.

¹⁶Hi tü kümkhuori vü apa küsü sa, thi hi nüh ma müküthsüwa, ma mokümjieveh ünüh ti hi nüh phah.

¹⁷Hi nüh mükünyitsara ha zoshimtü, hi nüh ma ha vünüh ma shie sakütsuotsamtü.

¹⁸Thinü hi nüh, ‘Hi tü eh phra vünüh sü naveh, thi hi nüh eh rülori tü ashünyi kümjie saküzhi naveh,

¹⁹eh rüzohri tü ajuhri vü zhiriewathuoh, eh rüza aveh eh tsuonari vü aküzo peh taji,

²⁰eh kütholathovü tü hi vü rherho, thi eh lawih tü eh kevü rühthe peh huoveh,’ ti müshe.

²¹Anyiri tü eh zhüküna, thi huopeh, thi eh küshike kenüh zohmti peh.

²²Hi nüh küphrahte sevü mari tü müphrahte le, thi eh zhü tü mari rügivü rütsuoke.

²³Atsoh kürü kühuo üta mari tü hi huo, thi thsehthe tsoh üta mari apo ka.

²⁴Mari küüzhezhü mükünyie vü hi nüh mari vü kükhrizü; thi mari tü eh nyieh küwiewa vimja.

²⁵Hi nüh mari aleh rüka, thi levü küsü üti shupeh, thi kajiri küsü nüh ma riekhuo azavü kürho üta hi tü rho, küüluri luoveh saküürüzih üta hi tü sa.