Read Pochuri Naga JOB 3 Bible Online

JOB 3 - Pochuri Naga bible

JOB 3

¹Hama sevü Job tü ma po ka nü ma küwuo rülowa müzü.

³Hi küwuo rülowa tü küpokahm luo, thi küza küsa rüzawa, ‘Nyi küsü atsa mohveh ta küsawa nga,’

⁴Rülo jüma tü saküüzomtüluo! Kümsie Saküüwuowa tü jüma müküphah tümluo, nyutü aküwie nga jüma rügi vü müwieketümluo.

⁵Küzohrieh thi zomthsüthsü nüh jüma küülüwutem luo. Aküluri nüh jüma rügivü küüpe luo; rülo vü akünyiawa nüh jüma saküümzhohm luo.

⁶Jüma rüza tü, zomthsüthsü nüh jüma küüshohtem luo! amahviwa rülo vü jüma rülo tü nyieramküükhruo tümluo, asari küürüh vü jüma tü müküüru tümluo.

⁷Ah, jüma rüza tü küüvükrem luo; jüla nüh nyierakükhruo küzie müküünara tümluo;

⁸Jüma kümzüri nüh rülo jüma küümzüm luo, mari tü ajuhmie saküüsühra thsüm.

⁹Atholeh wuhtsiri tü küüzem luo; jüma tü küwie küürühluom luo, tü küsü nga müküüngu tüm, nyutü rüne a nohu müküüngu tümluo;

¹⁰küpakenühnyunü jüma tü eh zah shiekuo mükhiewa müküsote kenüh, nyutü eh notha vünüh küsühro müküthitü;

¹¹Hi tü mokenüh aküwuo vünüh müsü lo, ashiekuo vünüh shuru nü tsotho temwa lo?

¹²Mokenüh akho künyi tü hi vike lo? Nyutü mokenüh atünü tü hi mükünü üji mümhie nüh sa lo?

¹³küpakenühnyunü jüüta thuoüji hi tü küchuo tetsuo nathuohnü; thi küzohm naküvehthuoh kenüh; Hi tü zehteküwaleh; jüta thuoüji hi tü kümnyie vü pehmnathuoh,

¹⁴azhih vü kajiri thi küshikeri samsükümri mari mpa nüh küsaleri nyipeh nathuoh,

¹⁵nyutü kajitsari suna küpehri mari azheh rakasa nüh proküvehri vü nyipeh nathuoh.

¹⁶Nyutü hi tü mokenüh tsotho mükünyu küwuo küüthiri küsü kümjie müsa lo, nyinyuote aküwie piketü mükünguri kümjie müsa lo?

¹⁷Jülatü khukekümsüwa tü küsühro vünüh kheteveh, thi jüla tü münokümri tü münyieveh.

¹⁸Jüla aküsiri tü kürü kürüzih vü pehveh; mari tü küürohvüwa khi mükünara.

¹⁹Küzah nga aküji nga jüla pehveh, thi atükhawa tü ma vüwa vünüh ma sa kürüzihmthuoh.

²⁰Mokenüh khielota kümnomnari vü aküwie tsüveh lo, thi akürho vi kürholi akükha vü küpehwa tsüveh lo,

²¹ma tü sü ngü, thitü jüma tü müru, thi künyirhiekuri küüthi nyieh vünüh jüma chüh;

²²ma tü müküüzara nyierakhruo, thi alowie, mari nüh arüku ngura thuoüji?

²³Nyi küsü ma lehkhuji küthi kümwa vü mokenüh küwie tsüveh lo, Saküüwuowa nüh alovü mürühpeke ülo?

²⁴küpakenühnyunü atüvü nüh eh lohse kümjie eh küsahzhile teruruti küsa kenüh, thi eh külüchi tü ajuh kümjie küshozhu teruruti,

²⁵küpakenühnyunü hi nüh zanyo kükrü tü eh rügivü teküru kenüh, thi hi nüh mowa krüshikeveh ünüh hi vü tsuotsakethuoh.

²⁶Hi tü kürüzih vü pehmvehthuoh, nyutü hi tü küzohmvehthuoh; hi tü kümnyie münyie; thitü akükho peveh.