Read Pochuri Naga JOB 30 Bible Online

JOB 30 - Pochuri Naga bible

JOB 30

¹Thitü khinyi thuoüji mari tü hi vi saküzhieveh, eh kükhu vünüh kürünguori ma pari tü hi nüh müküchie sara naveh, eh nyihnyih shuhri vü thsera naveh.

²Hi tü mari ake vünüh mowa nyiera na lo, anyiri kükhra teküwari vünüh?

³Küvingü thi rüma sheh küvehri vünüh, mari tü azhih küüweh thi jakümri mükrehkrehti;

⁴mari tü apra thi areküjehpuke nyawari, thi mari saküzhe nta aluofü rüzohri vi.

⁵Mari tü anyira aza vünüh zhejamthuoh; kürühuri küsü vü küzie üta mari nüh mari sevü zie.

⁶Mari tü ajuh küülo peri vü mürho üji mümhiethuoh, azhih thi alopierivü.

⁷Mari tü küjehpuke aza vü tohkümnya; akhushuri kükhu vü mari tü zhezhuh savehthuoh.

⁸Asemküsa küsü, Küsiake mükünyie tsari mari tü azhihwa vünüh kürhiezhumthuoh.

⁹Thi khinyi nü hi tü mari azah samthuoh, hi tü mari vü küüzhühnyuori samthuoh.

¹⁰Mari tü hi rhorhamthuoh, mari tü hi vünüh letsuotewathuoh; mari tü eh notha vü amütse müshüke na küsa mümkrü,

¹¹küpakenühnyunü Saküüwuowa nüh eh kuli letü nü hi sakürünyie kütsü kenüh mari nüh kükhete vi eh tüvü jaketü.

¹²Eh ke azhiewuovü vizari küze, mari nüh atüvü hi zhezhu, mari nüh mari lehkhujiri küzorie vi hi vü jake.

¹³Mari nüh eh leri zokhuomtü, mari nüh eh tü küsü saküzhake tsü; nyi küsü nga mari mükhete.

¹⁴Mari tü küpurie kümjie vünüh ru; azhila vü kütsühke nü mari tü küpritewa.

¹⁵Saküükrüri tü hi vü sühle ke; eh küsiakesiakhri tü amürhü kümjie zhe, thi eh kütsarhie tü akülu küsü üta ratewa.

¹⁶Thi khinyi thuoüji eh kürholi tü, eh lo vünüh küshozhu vehthuoh; kümnomna rülori nüh hi küjehtem.

¹⁷Arüza nüh eh rüri shohte, thi aküna hi mükreh küpeh huowa tü mümnyie wie.

¹⁸Jüma nüh eh thsümnyi wurie shohte; eh thsümnyi nüh hi küriphoh.

¹⁹Saküüwuowa nüh hi vi asüpri lovü vehjakemthuoh, thi hi tü azhitho thi aweji kümjie samthuoh,

²⁰hi nüh noh vü zie tü noh tü hi mükühu; hi nüh tsie peh tü noh nüh hi vü amüshe müthse.

²¹Noh tü khukemsü nü hi vü küprüke; noh ke akükhra vi nü hi sakümnomna.

²²Noh nüh hi vi amürhü rügivü kümsieke, noh nüh jüma rügivü hi küütse, thi noh nüh hi vi nü atsoh küshi vü shohküze.

²³Ah, noh nüh aküsü vü hi sieru nata küsa hi nüh thsüveh, thi akürhori aveh kenüh azheh chiekeküsawa vü sieruthuoh.

²⁴Jüta wie ketünga, kümsüri müprohke küveh küsü nga, ma ke thsuo müküze thi küükra kenüh ma sheküsü vünüh zie ülo?

²⁵Ma rülo kükho kenüh hi nüh ma kenüh mükrie ülo? kümkhuori kenüh eh kürholi tü alomrüthuoke ülo?

²⁶Thitü hi nüh kümhie noküze tü kümsüwa ru, thi hi nüh aküwie huo tü aküzowa teru.

²⁷Eh luoveh tü küüruohküra vü pehmthuoh, thi zota müpehthuoh; amüshekümnomna rülori tü hi mütu nta ru.

²⁸Hi tü künyise ti küzhu thitü arünyi nüh nyu; hi tü küsezhuh vü tsie thi küükra kenüh zie.

²⁹Hi tü rezanyihnyihri ajie küsü thi müwakürajiri refü küsü.

³⁰Eh sahu tü nyitewaveh thi hi vünüh kretewaveh, thi eh rüri tü aküsa nüh tsoveh.

³¹Eh topito tü khaphrü nü rümuomthuoh, thi eh pilechu tü akükriera jikhi vü tewathuoh.