Read Pochuri Naga JOB 31 Bible Online

JOB 31 - Pochuri Naga bible

JOB 31

¹Hi tü eh notha sie kütsathuo samthuoh, jüta thuoüji hi tü mokümjie mükürüsari küsü no nathuoh lo?

²Arügivü Saküüwuowa vünüh eh suohpe tü mowa na lo, thi kümsie kükhratsawa vünüh eh kaküvi mowa na lo?

³Mükünyitsari vü kümsü mütsuotsake ülo, thi künakhie küürohri vü asheküsü mütsuotsake ülo?

⁴Ma tü eh lehri ngu müveh ülo, thi eh lekhari kürüh müveh ülo?

⁵Mükütüküzü hi müküleh vünüh tseveh üji, thi eh mpha tü kürieriekhri vü ratsahrazhühveh üji;

⁶(Hi tü kümsho küütevüh vünüh küüte luo, thi Saküüwuowa nüh eh kümhieju küüthsüluo!)

⁷Mükütüküzü eh lekha tü alehwa vünüh anato vü sühle tewa thuoüji, thi eh luoveh tü eh notha senyitewa thuoüji, thi mükütüküzü athsopo wuori eh kevü peveh üji;

⁸jüta thuoüji hi nüh küüzhuh nü küpari nüh küütsaluo; thi eh kenüh mowa shoveh ünüh lokümwa saluo.

⁹Mükütüküzü eh luoveh tü nyimzari küsü vü nyieke wie ketünga, thi hi nüh eh zhephruwa lieke huopeh wie ketünga;

¹⁰jüta wie ketünga eh vüvüh nüh küpari kürenyam luo, thi küpari nüh ma rügivü küüngietsuom luo,

¹¹küpakenühnyunü jüma nüh khonyo kürie kükho küsü sanaküveh kenüh; jüma tü lesari nüh kümnomna tsü na küsa künakhie küsü sam nathuoh;

¹²Jümatü anyih nüh küzorie vü tso küwa wiethuoh, thi jüma nüh eh zhi aküzhi rüzoh aveh vü kütso wiethuoh.

¹³Mükükütüzü hi nüh eh siepepawa, nyutü eh siepevühwa kümshe kulem, mari nüh hi vü mari kürü viküru vü;

¹⁴thinü hi tü Saküüwuowa küsühra vü mowa sana lo? ma nüh küürü vü hi tü ma vü mowa rüle na lo?

¹⁵Ashiekuo lovü nüh hi küsawa nüh ma tü müsa ülo? thi anyi küsü nüh ashiekuo lovü nüh hiri kürhie samtsü ülo?

¹⁶Mükütüküzü kümkhuori nüh, kümnguwa küsüküsü nga hi nüh satem thuoüji, nyutü hi nüh tühnyivühra notha küsazih samtü thuoüji,

¹⁷nyutü hi mpa nüh eh kürütha tsamthuoüji, thi apa mkünyiewa nüh jüma mütsanüh sam thuoüji

¹⁸(küpakenühnyunü ma küviza vünüh hi nüh apa kümjie ma küje, thi ma zah shiekuo vünüh hi nüh ma küjosieru);

¹⁹mükütüküzü nyi küsü athsümnyi küzüla vünüh pokah küveh hi nüh ngu thuoüji, nyutü kümkhuori küsü kühiete mükünyie;

²⁰mükütüküzü ma keku nüh tsia hi mütsü thuoüji, thi ma tü eh nyihzhü küneh nüh samküüzhe tüla;

²¹Mükütüküzü hi nüh apa mkünyieri vü thsuoke thuoüji, küpakenühnyunü akheri vü hi nüh küükra küngu kenüh;

²²jüta thuoüji eh safü vünüh eh rhahpie tsuohtsaküm saluo, thi eh pie tü arhatsoh vünüh küüjim luo,

²³küpakenühnyunü Saküüwuowa vünüh hi tü kümsü nüh saküümzhoh kenüh, thi hi tü ma kükhrakümzho vü mütojüra nüh sa.

²⁴Mükütüküzü hi tü suna vi eh kütsotü sam thuoüji, nyutü suna tü eh küüzhezhü ta jim thuoüji;

²⁵mükütüküzü eh künyirhie küji kenüh hi nüh nyierakhruom thuoüji, nyutü eh ke tü ngu shehmthuoh ta sa thuoüji;

²⁶mükütüküzü arünyi wierake küveh vü hi nüh no thuoüji, nyutü asanüh züke nü küngah küveh vü,

²⁷thi eh luoveh tü küüzhe vünüh nyietewa wie nga, thi eh po nüh eh ke küme wienga;

²⁸hama nga künakhie küsü sanü alesari nüh kümnomna tsü naveh, küpakenühnyunü hi tü Saküüwuowa kümsiewa vü müküleh samnathuoh nü.

²⁹Mükütüküzü hi nüh eh kükrewa müsüküm nyierakhruo thuoüji, nyutü kümsüwa nüh ma nyiehvü teküwa riehtsie thuoüji,

³⁰(hi tü eh po kükhiemuo vü müküze wie, kümzü küsü nga vi nü ma kürho khuo nü);

³¹mükütüküzü eh juhthsüzheh lovü anyiri nüh müküüza tüla, ‘Ma sa vi nü ma samküüprowa thawa pehveh lo?’

³²(aküpriri tü ale vü müküüpeh, hi tü eh mükhie sanü küzehri tsü);

³³Mükütüküzü hi nüh eh küphrürie anyiri vünüh, küzhühwumthuoüji eh tühso vünüh eh künakhie küthim thuoüji,

³⁴küpakenühnyunü hi tü thopahiri krü nü tsieküveh kenüh, thi momakütalo tharuori nüh hi saküümzhoh, jükenüh hi tü zoti peh thi alehpie mükari.

³⁵O, nyi küsü nga nüh eh zhü küüna küpeh tüla! (Eh kütsüke hala pehveh! Kükhratsawa nüh hi küürüle luo!) O, eh kürholiwa nüh phrakümsü kürhü hi tü küngutüla!

³⁶Hi nüh jüma tü eh safü vünüh kha tsa wie naveh nü; hi nüh jüma tü kajilüwe üta eh rügivü phehkevü naveh nü;

³⁷hi nüh eh lekha aveh kürüh nü ma tsü naveh; kajitsari küsü üta hi nüh ma shenyiru naveh.

³⁸“Mükütüküzü eh zhih nüh hi vü zie thuoüji, thi ma khahu küsari nüh kürü krie thuoüji;

³⁹mükütüküzü ma viküpewa ame mütsü nüh hi nüh tsam thuoüji, thi ma vüri aküsü küsam thuoüji;

⁴⁰hiemtha müthoh vünüh arüzhüri küüsho luo, thi khuozhikürümieh müthoh vünüh amawuh küpri küsho luo,” ti rületsü. Job azhüri tü asehkhethuoh