Read Pochuri Naga JOB 32 Bible Online

JOB 32 - Pochuri Naga bible

JOB 32

¹Jükenüh anyi hamari küche tü Job kürüle lem, küpakenühnyunü ma tü ma mpa ma notha vü nyitsaküm kenüh.

²Jüti küsa vü Buzwa Barakhel Ram tharuowa atsa Elihu tü arüshuteru. Ma tü Job vü arüshu, küpakenühnyunü Saküüwuowa nyiehvünüh ma mpa nüh ma saküümsho kenüh;

³ma tü Job fü küche vü nga arüshu, küpakenühnyunü mari küchenüh Job tü kürüle müküngu kenüh.

⁴Jüti küsa vü mari tü Elihu nyiehvü nüh khruoküm kenüh Job vü azhüküza nti huo.

⁵Thi anyi hamari küche apo vü kürüle küsü nga müküngu vü matü arüshutewa.

⁶Thinü Buzwa Barakhel atsa, Elihu nüh rüle taji: Amahvi vü hi tü rünguoveh, thi nohri nü khruoze vehthuoh; jükenüh hi tü eh kümshe nohri vü phrazhu na küsa eh luoveh müze thi krü.

⁷Hi nüh, Arülori nüh küüza luo, thi mahvi hozake nga kümahtsa sosie, ti küza.

⁸Thitü jüma tü nyi küsü lovü kütü sietsewa, kükhratsawa rühtho jüma nüh ma saküthsükümshi.

⁹Jümatü kükhruori nüh mümtsa, nyutü mowa nü müsho nüh kükhruoküzewa nüh küthsükümshi müsa.

¹⁰Jükenüh hi nüh, eh zhü künaluo; hi nga eh kümshe küphrahzhu luo, ti küza.

¹¹Halie, hi nüh noh zhüri huoruthuoh, nohri nüh kümahtsa küphrahte künarathuoh, nohri nüh mowa küza naveh ünüh phahküveh vü.

¹²Hi nüh eh luoveh küthse nohri vü tsüthuoh, thi halie, nyi küsü nga Job kümshe lovü mütu, nyutü nohri azhievü ma zhü kürüle nyi küsü nga münyie.

¹³Noh tü, ‘hiri tü kümahtsa ngurathuoh anyiri nyu nüh, Saküüwuowa nüh ma saküsaji naveh,’ ta küza üsü nüh azhüzhüluo.

¹⁴Ma tü ma zhü külesho vi hi müwuluo, thi hi tü nohri azhü vi nü ma kürülewa nyu.

¹⁵Mari tü amüshemsara nüh sam, mari tü mürüle le wiethuoh, mari tü phrahte na küsa azhü küsü nga münyie nüh sam.

¹⁶Thi hi tü huo naveh ülo, mari nüh müküphrahte kenüh mari nüh tsie wie ketünga mükürüle wiethuoh kenüh?

¹⁷Hi nga eh kürüle tsü naveh; hi nga eh kümshe phrahzhu naveh,

¹⁸küpakenühnyunü hi nü azhü pro küveh kenüh sietse eh lovü tüküvehwa nüh hi küchü küveh kenüh.

¹⁹Halie, eh luoveh tü akhah leh huo thsopo mükünyie üta wiethuoh; akhah leh huo kürüthe üta pu nta lieke pehveh.

²⁰Hi tü müphra üji mümhie, jüta küsa vünüh hi tü eh müshe kürüzi ngura naveh; hi tü eh pomieh ga nü mürüle üji mümhie.

²¹Hi tü nyi küsü vü nga kümrhümze küütsawa nyu, nyutü nyi küsü vü nga athuoüjih küsawa nyu,

²²küpakenühnyunü hi tü athuoüjih sana küsa müküthsü kenüh, jüüta thuoüji hi küsawa nüh kümto hi vi asehkhe samtü naveh.