Read Pochuri Naga JOB 36 Bible Online

JOB 36 - Pochuri Naga bible

JOB 36

¹Jüti küsa vü Elihu tü mükütuo wie thuoh nüh:

²Pike hi sie küzhike luo, hi nüh noh kütsanaveh ünüh, küpakenühnyunü Saküüwuowa müthoh vünüh, azanyo wuori peh hü küveh kenüh.

³Hi nüh eh küthsü kületsuo vünüh viru naveh, thi hi küsawa vü künyitsa phrahte naveh,

⁴küpakenühnyunü eh zhüri tü müküzhüjah kenüh aküthsü vü aküjuwa tü noh sie pehveh.

⁵Halie, Saküüwuowa tü khram, thitü ma tü nyi küsü nga müma; ma tü küthsükümshi kükhra vü müzhom.

⁶Ma tü khukekümsüri tü kürho müsa, thitü kümnomnawa vü mari kümsho tsütsüti.

⁷Künyitsawa vünüh ma notha vishele temwa, thitü kükajipe rügivü kajiri sie mari küsuokürho sasati, thi mari tü saküji tsüveh.

⁸Thi mükütüküzü mari tü akürü krukru vünüh mari phehtem, thi kümnomna kuliri nüh tietem,

⁹Jüti sanü ma nüh mari küüroh mari vü küzazhu, thi mari küphrürie, jüti küsa vünüh mari tü kükuoti amüke sam.

¹⁰Ma nüh mari khüna süphiekütsü vü saphietsü, thi mari tü künakhie vünüh küsühle azhütsütsüti.

¹¹Mükütüküzü mari nüh ma zhüküna nü ma kütsü sa thuoüji, mari rülo tü kütsarhie vünüh ju thuoüji, mari rülo mahviri tü akülo vünüh jura naveh.

¹²Thitü mari nüh müküna thuoüji, mari tü anyuchuwa vünüh pokahm naveh, thi aküthsü münyie nüh süm naveh.

¹³Mükünyitsawa thuoüji, luoveh lovü rüküshu müsa; makükhra nüh küphehte vü mari tü küükra mükhuo.

¹⁴Mari tü küviza vünüh sütewaveh, thi mari kürho tü küzükrü nüh asehkhe sasati.

¹⁵Ma nüh amüshekümnomnari tü mari kümnomna vünüh vizhuzhuti, thi ma khünari tü müküchie saküveh vünüh satsütsüti.

¹⁶Ma nüh müshekümnomna vü nga nüh noh vizhu nü luoveh küüraküpre mükünyie, azhie kümza küsü vü thse, thi noh toküsape rügivü mowa saveh ünüh aküthü mpa nüh pro.

¹⁷Thitü khukekümsüwa vü thuoüji noh tü ashih nüh pro; ashih thi kümsho nüh noh rete.

¹⁸Arükümtho nüh noh kümsamnyiwa vü nyieketewa üsü nüh azhüzhüluo, thi thuokütsü küjiwa nüh noh nato vü samküürele tümluo.

¹⁹Noh küzie tü müshekümnomna kükrara naveh ülo, nyutü noh kükhra shuküru aveh kükrara naveh ülo?

²⁰Arüza kenüh mümngu tüm, anyiri tü mari ape vünüh tehthuomümti.

²¹Azhüazhü luo, künakhie vü müsühleke tümluo, hama kenüh noh tü kümnomna nyieh vünüh rüka saveh.

²²Halie, Saküüwuowa tü ma kümzho vünüh saküji mthuoh; küsosie ma küthse thawa pehveh lo?

²³Thawa nüh ma kenüh ma leh küzatsüra na lo; nyutü thawa nüh, ‘Noh tü müküleh samthuoh lo,’ taküzara na lo?

²⁴Ma küüroh siake kümsie na küsa müsheluo, jüma tü anyiri nüh reihithuoh.

²⁵Nyiri aveh nüh jüma tü nothuoh; anyiri nüh kületsuo vünüh jüma noküze.

²⁶Halie, Saküüwuowa tü jim thitü hiri tü ma müthsü nüh sam; ma mahvi küürüh tü mphahra,

²⁷küpakenühnyunü ma nüh ajuh kürütsuori tietieti, ma tü tsorüjuh vünüh atso saküürürüti,

²⁸jüma tü arügivü nüh küshoküzezeti, thi anyiri rügivü kütseke.

²⁹Aküluri kuoshohrie küwa wuori nüh thsümshira naveh ülo, ma atsohküshi ape thsümshira naveh ülo?

³⁰Halie, ma tü ma tsorieh zhuh mükieleleti, thi juhküji rüzohri külüwuteteti,

³¹küpakenühnyunü hamari vünüh ma tü anyira shih sasati küsa kenüh; ma nüh ashie küsheküsha vünüh tsütsüti.

³²Ma tü atsorie vi ma ke küzhuteteti, thi jüma khetem üta azhütsütsüti.

³³Ma kenüh nehnyaküm küzazhuzhu ti, ma tü künakhie vü arüshu nü nokürüpapati.