Read Pochuri Naga JOB 38 Bible Online

JOB 38 - Pochuri Naga bible

JOB 38

¹Jüti küsa vü nyiazamrhü vünüh VÜWA nüh Job rüle taji:

²Aküthsü müvi nüh azhü vünüh thawa nüh shikekütsü saküzoveh lo?

³Nyimpari kümjie vünüh noh küshih tseke luo, hi nüh noh küna naveh, thi noh nüh hi vü küzazhu naveh.

⁴Hi nüh azhihwa ajupe khake küveh vü noh tü khiela pehveh lo? Hi vü küza luo, noh nüh aküthsü pehveh üji.

⁵Thawa nüh ma küüte amüshe thse nüh noh nüh thsüveh! Nyutü jüma rügivü thawa nüh rhieh nü thsowa lo?

⁶Mowa vünüh ma khujihri toke pehveh lo, nyutü thawa nüh ma jühkelohwa khake lo,

⁷arüne wuhtsiri nüh kürü küriehi vü, thi Saküüwuowa tsari aveh nyierakükhruo kenüh küriehu vü?

⁸Nyutü thawa nüh juhküjiwa vü amükhieri khe lo, ashiekuo vünüh jüma puhzhuküru vü;

⁹hi nüh akülu vi ma thsümnyi sakütsü vü, thi zokümthsüthsü vi ma kho nü kürite küsa vü,

¹⁰thi jüma kenüh kümkiele nü rhieh mükiele, thi arüperi thi amükhieri thsetem,

¹¹jüti sanü, ‘Ha küju noh tü ru naveh, thi hama nyiehvü nyu, hala nüh noh kürhiehza küüshüh pehtewa naveh ülo’? ti küza.

¹²Noh rülori küsate vünüh arünewa vü noh nüh azhükütsü sathuoh ülo, thi küthohriewa vü ma pe saküüthsü thuoh ülo,

¹³jüta küsa vünüh jüma tü azhihwa küpote küju küshohtera sanaveh, thi jümawa vünüh khukekümsüri tü küzhüh müjara ülo?

¹⁴Jümatü feteküsa kükhu vü anyisa kümjie jetewathuoh, thi jüma tü thsümnyi kümjie rekethuoh.

¹⁵Khukekümsü vünüh mari küwie küjehtemthuoh, thi mari apie kükhroke tü zoshi mthuoh.

¹⁶Noh tü juhküji juwiküshu lovü tuthuoh ülo, nyutü aküsheh azhievü tsewa ülo?

¹⁷Aküsü kheriri noh vü kütsakünguthuoh ülo, nyutü noh tü küzomthsüthsü kheriri nguthuoh ülo?

¹⁸Noh tü azhihwa aveh thsüvehthuoh ülo? küzazhu luo, mükütüküzü hamari aveh thsüveh üji.

¹⁹Aküwie kürhope lehkhuji khiela pehveh lo, thi aküzowa azhie khiela pehveh lo,

²⁰jüti küsa vünüh noh nüh jüma vi, ma kükrüküngo vü wa naveh, thi jüti küsa vünüh noh nüh ma zheh lekhuji ngura naveh ülo?

²¹Noh tü thsüveh, küpakenühnyunü noh tü, wuo kümthuoh kenüh, thi noh rülori küürüh tü jim!

²²noh tü amüra küpeh lovü tuthuoh ülo, nyutü noh tü rahzhi küpeh nguthuoh ülo,

²³hi nüh küsühro tsotho vü kenüh müshie küsa asa thi arie rülo vü kenüh müshie küsa ngu ülo?

²⁴Aküwie suo azhie lehkhuji khiemawa lo, nyutü azhih rügivü zhiehshu mürhü kümrhürie khiela lo?

²⁵Atsoh küshoke nü rü na küsa kenüh thawa nüh ajuhle chüh lo, thi tsohküshi nyiazamvü kenüh lehkhuji satsü lo,

²⁶anyi mükünyie zhih vü atsohkürü viru na küsa kenüh anyiri mükünyie shünyiza vü tsohkürü viru na küsa kenüh;

²⁷jaküm thi küüzo azhih saküülora na küsa kenüh, thi azhihwa are saküüshu na küsa kenüh.

²⁸Atsohkürü tü apa pehveh ülo, nyutü aküzo kürütsuori thawa nüh wuo lo?

²⁹Thawa shiekuo vünüh awe tü shuru lo, thi thawa nüh atülü aküzoküwechü wuotsü lo?

³⁰Ajuhri tü aloh kümjie khotewa, thi aküsheh anyieh tü müzhotewa.

³¹Noh tü anyi kümhietsa ariehkhuo, kümhieri phehtera naveh ülo, nyutü kümzhotsara kuli lera naveh ülo?

³²Noh tü awuhtsiri mari zale vü sieküjotsüranaveh ülo, nyutü noh tü awiekhuh kükha wuhtsi, thi ma tsari sie küjotsera naveh ülo?

³³Noh tü atülü zhühkhori thsüveh ülo? Noh tü azhih vü awuleh vizhura naveh ülo?

³⁴Noh tü aküluri vü noh jikhi zieküzera naveh ülo, jüti sanü ajuh anyuoküza nüh noh küülüwute naveh ülo?

³⁵Noh tü atsorieri küzera naveh ülo, jüti sanü mari tü wa nü noh vü, ‘Hiri hala pehveh ünüh,’ ta küüzara naveh ülo?

³⁶Thawa nüh aküluri vü kümtsa thse lo, nyutü thawa nüh amüshe vü küthsükümshi tsü lo?

³⁷Thawa nüh kümtsa vünüh aküluri kürühra na lo? nyutü thawa nüh atülü ajuhsahuri küükera na lo,

³⁸azhitho tü küsie müzho teru lo, thi azhih kürülori küperüluo lo?

³⁹Noh tü amiewuowa kenüh ashie zhetüra naveh ülo, nyutü amiewuori atsa kürüma alosakürara naveh ülo,

⁴⁰mari aku lovü küzhurie vü, nyutü mari küüthipe lovü huo zeh küveh vü?

⁴¹Thawa nüh awuori kenüh ashie totsüveh lo, ma tsari nüh Saküüwuowa vü küzie vü, thi ashie küzüla kenüh tsekütse vü?