Read Pochuri Naga JOB 4 Bible Online

JOB 4 - Pochuri Naga bible

JOB 4

¹Jüti küüza vü Elifaz Temanwa nüh:

²Mükütüküzü nyi küsü nüh azhü vi noh sie jüle nta thuoüji, noh tü noh luoveh sakümsüm naveh ülo? thitü thawa nüh azhü müphra nüh sana lo?

³Halie, noh nüh hozake süphietsüthuoh, thi noh küthasü ake sakükhratsüthuoh.

⁴Ajih müshükümwa noh zhü vünüh shohkütsierathuoh, thi küthachu khori noh nüh sakükhratsüthuoh.

⁵Thitü jüma tü khinyi noh vü ruthuoh, tü noh nüh müküzhike nüh sam; jüma nüh noh pathuoh tü noh nüh luovehzahtewa.

⁶Noh nüh Saküüwuowa kükrü tü noh küüzhezhü, thi noh lehkhujiri küjutsawatü noh kürühluo nyu ülo?

⁷Khinyi müsheluo, mükükhiehwa tü küsuokürho pokahveh ülo? Nyutü kümshori tü khiela tehthuojaveh lo?

⁸Hi nüh nguküm üta, künakhie kükhahuri, thi küsühro zhuh jükümjie küsa wievi.

⁹Saküüwuowa rühtho vünüh mari tü pokah, thi ma rüküshu küwurie vünüh mari tü zoriem.

¹⁰Amiewuowa kükhu, kükrükhre amiewuo jikhi, amiewuo tsara ha tü zoshimthuoh.

¹¹Ashie küzüla kenüh amiewuo kükhrawa tü pohkahmümti, thi amiewuo awiewa tsari tü vohrietewathuoh.

¹²Azhü küsü küüzhe vünüh hi vü viru, eh khüna nüh jüma müchieluo nüh künara.

¹³ Rüza kümohtsari vünüh akükrü moh kümüshe, küzehmophoh anyiri vü teru thuoüji,

¹⁴Kükrüshike hi vü teru nü khekheti küshüh, jüma nüh eh rü aveh küze.

¹⁵Sietse küürieh küsü ru eh nyieh kariwa; eh satsa aküne shütewa.

¹⁶Jümatü tokepeh wie, thitü hi tü jüma tsowa thsü mküpara nüh sam, atso küsü tü eh notha atüvü pehwie; zohmta satewa, thinü hi nüh jikhi küsü thsü.

¹⁷‘Küsüra nyiri tü Saküüwuowa tüvü nyitsara naveh ülo? Nyiri küsü tü ma küsawa tüvü lathara naveh ülo?

¹⁸Ma siepewa vü wie nga ma tü kütsotü müthse, thi ma zhühleri vü nga aküzih vi nü ro;

¹⁹nyisa zhehri vü kürhori nü küzakele nga na lo; ma külojupewa tü azhitho, mari tü mütharü atüvü tohkümnyamthuoh.

²⁰Rüne thi münüleh azhievü mari tü zoriem; küchieke küsü nga münyie nüh mari tü küsuokürho pokahkah ti.

²¹Mükütüküzü mari azhie vünüh mari juhthsüzhehli lezhujam thuoüji, mari tü küsüwa nyu ülo, thi jüma tü kümütsa vünüh nyu ülo?’ ti küza.