Read Pochuri Naga JOB 6 Bible Online

JOB 6 - Pochuri Naga bible

JOB 6

¹Thinü Job nüh:

²O eh luoveh kümsü jüma tü kütethuoh, thi eh lokürü aveh tü küütoku vü thsemthuoh!

³Jüta thuoüji jüma tü juhküji shünyi nyiehvü nüh küzhom nathuoh; jükenüh eh zhü tü küriemthuoh,

⁴küpakenühnyunü kükhratsawa shüchu tü eh lovü tü kümthuoh kenüh; eh sietse tü jümara kümzhi zhuveh; Saküüwuowa saküükrüphakewa lieke nü hi sie wuluo vehthuoh.

⁵Kükrükhre rawuhküzahwa tü ma nüh apra peh küveh vü khukhuti ülo, nyutü shüvotsa tü ma shie rügivü khukhuti ülo?

⁶Aküpawa tü amütsü müthse nüh tsa mhieveh ülo, nyutü wirüji lovü kümjiwa tü tsakümhie pehveh ülo?

⁷Eh po kümhie nüh jümari müpo nta; jümari tü eh kenüh künyakuo ashie üta sam.

⁸O, eh küzhieke jüma pehranchiekele, thi Saküüwuowa nüh jüma sakütsü nthe.

⁹Hi tohnyaküm nüh Saküüwuowa küülo naveh, jüti sanü ma ke thsuoküze nü hi rehthuo naveh!

¹⁰Hama nüh eh luoveh sakürüzi naveh; hi tü aküna vü wienga nüh mümshie nüh rietsi naveh; küpakenühnyunü hi tü kümtsewa zhüri mükürüwiethuoh nüh küsa kenüh.

¹¹Hi tü huopeh na küsa eh kükhra tü mowa lo? thi eh sehkhe tü mowa nü hi tü müküzhike üji mümhie ülo?

¹²Eh kükhra tü aloh kükhra ülo, nyutü eh sazhü tü asahwuo ülo?

¹³Küzhütsa vünüh hi tü hi vü eh küükra münyie, thi hi vünüh küükra wuori zhejam ülo?

¹⁴Thawa nüh afü küsü vünüh külohnyi küjehkeveh ünüh, Kükhratsawa kükrü kuleveh.

¹⁵Eh jienüri tü kuza rehzü üta müroküüzehri, akuzari liteküwa kümjie,

¹⁶Jümari tü awe nüh sakümom, thi amüra nüh jüla nüh ma mpa küthiveh;

¹⁷Aküzhe tsotho vü mari tü ratewaveh; jüma tü samthuoüji mari ape vünüh müngu nüh satewaveh.

¹⁸Aküzehkütseri tü mari letse vünüh khaphrümthuoh; mükünyu vü tewa nü pokahmthuoh.

¹⁹Tema aküzehkütseri tü phah, Sheba küzehkütseri tü luohzhe.

²⁰Mari nüh küüzhe kenüh mari tü lokhutewa; mari jüla ru nü rüzam.

²¹Nohri tü khinyi thuoüji hi vü jükümjie; nohri tü eh lokürü ngu nü krümthuoh.

²²Hi nüh, ‘Aküte küsü hi vü saluo,’ ti hi nüh küza ülo? Nyutü, ‘Nohri künyirhie vünüh athe hi tsü üti küza ülo?’

²³Nyutü, ‘Küwuluora ke vünüh hi vizhu ülo?’ Nyutü, ‘Kütera ke vünüh hi thuotsü ülo?’

²⁴Hi sosieluo, hi tü zota peh naveh ünüh; hi tü mokümjie nahphe tetsethuoh ünüh hi saküthsüluo.

²⁵Küzhütsa zhüri tü küzakelenga khra lo? Thitü noh vünüh phraküümsü mowa sakümshora lo?

²⁶Nohri tü eh zhü sakümshora naveh ti müsheveh ülo, akükrieri nyi küsü nüh azhüküphra tü amürhü nyu ülo?

²⁷Nohri tü apa mükünyieri vü nga aküze sana nü, thi nohri füwa vü she na nü.

²⁸Thitü khinyi thuoüji, hi vü küno lozheluo; küpakenühnyunü nohri nyiehvü küriewa nyu.

²⁹Sühle luo, hi nüh khuoveh, müküsa tümluo, khinyi sühle luo, eh küütoh tü toke pehwieveh.

³⁰Eh mizhi vü müküleh wuori pehveh ülo? Eh kü mpo tü kümsü thsü mküpara ülo?