Read Pochuri Naga JOB 7 Bible Online

JOB 7 - Pochuri Naga bible

JOB 7

¹Azhih vü tü anyiri kenüh kükho küüroh pehveh, thi ma rülori tü akeri küsü rülori üta nyu ülo?

²Tükha küsü nüh akükhe kümngu üta, thi akeri küsü nüh ma kümlie huoküveh üta,

³jükenüh hi tü kürütso asari vi hi totsüthuoh, thi kümnomna rüza vü suohpe sa hi tsü.

⁴Hi tsuo küzeh vü hi nüh, ‘Hi tü küsie sühra na lo?’ ti sa. Thitü arüza tü suo, thi athohsü küju hi tü küüngu nüh pro.

⁵Eh sazhü tü arüri thi kümne nüh küzhute; eh sahu tü sakümzhom, thi kürüthe shizhule.

⁶Eh rülori tü athsükütora tsoji nyiehvü nüh kürhü, thi küluohzhe münyie nüh mari asehkhe vü teru.

⁷Eh kürho tü rülo küsü wie ti küsa müsheluo; eh notha tü piketü kümhie küngu lewa nyuthuoh.

⁸Thawa notha nüh hi ngu nüh hi küngu sewa nyuthuoh; noh notha hi vü pehküveh vü, hi tü tewa nathuoh.

⁹Akülu nüh wa nü rateküwa üta, Jüta küsüpe vü teküwawatü shumruthuoh,

¹⁰ma tü ma zheh vü shele müru lerathuoh, nyutü ma pe nga ma müthsü lera wiethuoh.

¹¹Jükenüh hi tü eh po küüzhiwa nyu; hi tü eh sietse küürohküpre vünüh phrahte naveh; hi tü eh kürholi kükha vünüh rü naveh.

¹²“Hi tü juhküjiwa, nyutü ajuhküji rü, noh tü eh nyiehvü arieh huo saveh ülo?

¹³Hi nüh, ‘Ehze nüh eh lo saküra ra naveh, eh küjinyiezewa nüh eh kürü sakürüzihtsü naveh,’ ta küüza vü,

¹⁴jüta thuoüji noh tü amohri vi hi sakükrü, thi kümohtsari vi hi sakümzhoh naveh,

¹⁵jüta thuoüji hi tü küünyithe rüka naveh, thi eh rüri nyiehvü nüh aküsü nüh küülo.

¹⁶Eh kürho tü nyakuomthuoh; hi tü küsuokürho mürhothuoh. Hi mpa küüpehmüluo, küpakenühnyunü eh rülori tü arütho küsü mpa küsa kenüh.

¹⁷Anyiri tü mowa nüh noh tü ma vü sa shehtsü lo, thi noh tü noh luoveh ma vü thse tsü ülo,

¹⁸rüne kürüzhu ma no lo, thi tsotho kürüzhu ma müte ülo?

¹⁹Küthake nga noh tü hi vünüh no müthorieh nüh sana lo, nyutü eh mütse hi nüh müjie kümzhuküju hi mpa müküsa ülo?

²⁰Mükütüküzü hi khiemuom thuoüji, hi tü noh vü mowa sa lo, noh nyiri künotewa? Mokenüh noh tü hi vi noh nüh noke küpeh huowa sam lo? Mokenüh hi tü noh khuo samtü lo?

²¹Mokenüh noh tü hi nüh küphrürie nomjatü lo, thi eh künakhie vi müjatü lo? küpakenühnyunü hi tü khinyi thuoüji, azhitho vü zehtewa nathuoh nü; noh tü hi phah naveh, thitü hi tü küpehwa nyuthuoh,” ti rületsü.