Read Pochuri Naga JOB 8 Bible Online

JOB 8 - Pochuri Naga bible

JOB 8

¹Jüti küsa vü Bildad Shihitwa nüh rüle taji:

²Noh tü küthakele hamari küza peh na lo, thi noh po vü azhüri tü amürhü küji küsü küsana lo?

³Saküüwuowa tü kümshowa kürele naveh ülo? Nyutü kükhratsawa tü kükatowa kürele naveh ülo?

⁴Mükütüküzü noh tsari nüh ma vü khiemuom thuoüji; ma nüh mari küphrürie akükhra vü vizhumthuoh.

⁵Mükütüküzü noh nüh Saküüwuowa phah, thi Kükhratsawa vü zhiekekhuo thuoüji,

⁶mükütüküzü noh nüh latha thi müsho thuoüji, jüüta thuoüji ma nüh ma mpa noh kenüh küthetsa wie naveh, thi kükatosheh arhieri vi noh jisuo satsü naveh.

⁷Thi noh küsatewa tü zahm wie ketünga, noh rülo asevü thuoüji ji sheh naveh.

⁸Hi nüh noh vü khuoveh, teküwa kürhori kürü luo, thi apari nüh küphahrawa müshe noluo;

⁹küpakenühnyunü hiri nga thuoh thitü luonyi nüh, thi zanyoküsü nga müthsü, azhihvü hiri rülori tü arüzhe küsü wie.

¹⁰Mari tü noh müsosiewie ülo, thi müküza ülo, thi mari küthsü vünüh azhü müphrashu nüh sanaveh ülo?

¹¹Azhih azhinyi mükünyi tü atuohrieh shora naveh ülo? Ajuh mükünyi tü amüshüh tü küliera naveh ülo?

¹²Aküwu vü pehküveh vü thi müküzahthuo vünüh, apra küpari tüvü nüh wahzhütewaveh.

¹³Saküüwuowa küümari aveh tü jükümjie küsa lehkhujiri; aküthseküsa nyiwa küluohzhe thuoüji pohkahm naveh.

¹⁴Ma küüzhezhü tü kütehthuo vünüh shutewaveh, thi ma kütsotü tü ajevü sarülie küsü.

¹⁵Ma tü ma zheh vü rüngake naveh, thitü jüma tü küpehsuowa nyu.

¹⁶Ma tü arünyi tüvü jehpuhke naveh, thi ma küshi tü ma phahri vü küphranyuo naveh.

¹⁷Ma rüzohri tü aloh kümprohke vü cha mükieleveh, ma tü alokrü za vü rhoveh.

¹⁸Mükütüküzü ma pe vünüh ma tü zoriem thuoüji, jüta thuoüji jüma tü ma kürüm taji, Hi tü noh müngu rhuo, ta küzam naveh.

¹⁹Halie, hamatü ma lehkhuji loküzhewa; thi azhih vünüh küpari tü shuru naveh.

²⁰“Halie, Saküüwuowa tü kümte mükünyie nyiri kükulewa nyu, nyutü kümsüküsara ke küviwa nyu.

²¹Ma nüh küükhri vi nü noh po saküprotsü naveh, thi noh pohmieri tü aküzie küprotsü naveh.

²²Noh kümrhüri tü küzükrü nüh küüzhutem naveh, thi arokümsüra juhthsüzheh tü küpehwa nyuthuoh.”