Read Pochuri Naga JOB 9 Bible Online

JOB 9 - Pochuri Naga bible

JOB 9

¹ Jüti küsa vü Job nüh rüle taji:

²Azhütsa jüma tü Jüta taküsa hi nüh thsüveh: Thitü anyiri tü mokümjie Saküüwuowa tüvü müshora na lo?

³Mükütüküzü nyi küsü nüh ma sie küra ngüveh üji, nyi küsü nga, küsükeri vünüh ma vü anyie küsü keri rüle mütsü ra.

⁴Ma tü luoveh lovü nü mütsa, thi akükhra vü müzhom, thawa nü ma mpa ma sakükhom nü küsara sa lo?

⁵thawa nü aküzhiri vijam nü mari tü jüma müthsü nüh saveh lo, ma nüh ma rüküshu vünüh jümari khamleleveh;

⁶thawa nüh azhihwa mape vünüh küzhüzhühti lo, thi ma tohvühri tü saküükhekhe ti lo;

⁷thawa nüh arühnyi vü azhükütsü sasati, thi müküshu nüh sasati lo; thawa nüh awuhtsiri tü feteveh lo;

⁸ma mpa nüh atülüri vü thsuoküüze wie, thi juhküji küüshühri nyiküütsake wie;

⁹thawa nüh wuhtsi wiehkhuhkükhawa thi münüleh küwie wuhtsiri sa lo, küsosa vü münüleh wuhtsiri thi zhieseh awiepari sa lo;

¹⁰thawa nüh küthsükümshi nyiehvü nüh aküji zanyori sa raveh lo, thi mükürüh nüh kükrüküngo zanyori sa raveh lo.

¹¹Halie, ma tü hi kari wawati, thi hi tü ma müngu; ma tü küngahtseveh, thitü ma küngu müsa.

¹²Halie, ma nüh prütewaveh; thawa nüh ma satera na lo? Thawa nüh ma vü, “Noh tü mowa sa lo?” ta müsara.

¹³Saküüwuowa tü ma rüküshu vünüh küürelewa nyu; ma kükhu vü Rahab küükrari küngietsuo.

¹⁴Thinü mokümjie hi tü ma rüle na lo, ma sie eh zhü rüka taji?

¹⁵Hi tü mükhieh wie ketünga, hi tü ma mürüle ra; hi phraküümsüwa vü hi tü külohna müthuo üji mümhie.

¹⁶Mükütüküzü hi nüh ma ji nü ma nüh hi rüle thuoüji, ma tü eh jikhi künaveh ta küsa hi tü kütsotüwa nyu,

¹⁷küpakenühnyunü ma nüh amürhükümsü vi hi küsanyam kenüh, thi mazhühnyo mükünyie vünüh eh khüma saküzhitsü;

¹⁸ma nüh eh rütho küüsahwa nyu, thitü akükha vi hi saküprotsü.

¹⁹Mükütüküzü jüma tü akükhra sakümjie tüla, ma noluo! Mükütüküzü jüma tü kümsho rüleh tüla thawa nüh ma ji na lo?

²⁰Hi tü münakhie wie ketünga eh po mpa nüh hi kümsü naveh; hi tü kümte münyie wie ketünga ma nüh hi kürele ti küsa thsütoh luo.

²¹Hi tü kümte münyie; hi mpa hi chieke müsa; hi tü eh kürho nyakuomthuoh.

²²Jümari aveh zanyo küsü; jükenüh hi nüh küzaveh, ma nüh kümte mükünyiewa nga, thi khukekümsüwa nga masükhürü zorieveh.

²³Kütsasü nüh zhürüluo aküsü viru wie nga ma nüh mükünakhiewa kümsü riesasati.

²⁴Azhihwa tü khukekümsü ake vü thsemthuoh; ma nüh ma lesara nyieh küwuteteti, mükütüküzü ma nüh ngu thuoüji jüma tü thinü thawa nüh lo?

²⁵Eh rülori tü aküzhüri küsü nyieh vünüh kürhü; jüma tü zhütewaveh, jümari tü kümhie müngu.

²⁶Mari tü amüshüh juhieküzahri küthse vünüh waveh, aluomü küsü nüh ma shie vi nta the küturu kümjie.

²⁷Mükütüküzü hi nüh, eh kürüwa kümam thuoüji, eh lokürü nyiehwa tü fojam nathuoh thi alosaküwie nathuoh.

²⁸Eh kümnomna aveh vünüh hi tü krüterum thuoh, küpakenühnyunü noh tü hi mükünakhie vünüh küüjehkewa nyu.

²⁹Hi tü rünathuoh; thinü jüta thuoüji hi tü mokenüh müjuju vünüh akükhrathse nü küroh na lo?

³⁰Hi nüh amüra vi hi phrüh wienga, thi zhiwejuh vi eh ke sakümtse wie nga,

³¹tü noh nüh hi vi ashohku lovü shohjake naveh, thi eh thsümnyi mpa nüh hi kürhorha nathuoh,

³²küpakenühnyunü ma tü hi üta anyiri sanü ma rületsü nti küsa nyu, jüta mükünyutüla hiri kürü müteno wie naveh nüh.

³³Hiri azhievü aleküsatü münyie luo, jüta thuoüji hisü azhievü ma ke thsera naveh nü.

³⁴Ma tü ma zhietsühwa hi vünüh viteküwam luo, thi ma kükrüshikewa vi hi samküümzhoh tümluo.

³⁵Jüta thuoüji hi tü ma kükrü vünüh azhüküüzawa nyuthuoh, küpakenühnyunü hi tü jüma hi vü tü müküveh kenüh.