Read Pochuri Naga KÜREIHIRI 10 Bible Online

KÜREIHIRI 10 - Pochuri Naga bible

KÜREIHIRI 10

¹Noh tü mokenüh kületsuo vü tsie veh lo, O VÜWA? Küsühro tsotho vü noh tü mokenüh noh mpa nüh küthi veh lo?

²Kümsüküsawa tü kürhiezarhiechi vünüh sashehke nü kümkhuowa zhe veh; mari tü mari mpa nüh saküüte lovü küüzam luo,

³küpakenühnyunü khukekümsüwa tü makümngu kümsüwa mshelo vünü rhieza peveh, thi amüwiküjiwatü kümzü nyie, thi VÜWA kuleveh.

⁴Ma nyieh kürhiezarhiechi vünüh khukekümsüwa tü ma mphah; ma kümsheri aveh tü, “Saküüwuowa münyieluo,” ta sa veh.

⁵Tsotho aveh vü ma lehri tü tsarhiera veh; noh shihri tü rügivü pehveh, ma nokhie vünüh; ma küümaküshiri aveh kenüh thuoüji, ma nüh mari riesasati.

⁶Ma nüh luoveh nüh müshe taji, “Hi tü küüngahwa nyu; awuhle aveh vü hi tü kürholuo kümtuwa nyu,” ta sa veh.

⁷ Ma po tü kümzü, kürieriekhri thi kümrü nüh pro; ma mizhi kükhu vü mküle thi akükhieh nüh proveh.

⁸Ma tü anyuza aküwu vü shupehpehti; küüthi azhieri vünüh ma tü mükünakheri zothetheti.

⁹Amiewuowa küsü nüh ma küsate vü küpeh üta, ma tü küthi nü liekezizi ti; kümkhuowa nüh ma neh vü shehnyi küru vü ma sisiti.

¹⁰Nyuri nüh küükra mkünyieri tü nehnyamtüveh, thi alo lo retetuveh, thi ma kükhra vünüh külutewaveh.

¹¹Ma tü ma luoveh lovü nüh müshe taji, “Saküüwuowa nüh kümamthuoh, ma tü ma nyieh küthimthuoh, ma jüma piketü künguwa nyuthuoh,” ta sa veh.

¹²Sühraluo, O VÜWA; O Saküüwuowa, noh ke khroke luo; kümnomnawa müküma tümluo.

¹³Mokenüh khukekümsüwa tü Saküüwuowa kuleveh lo, jüti sanü ma luoveh lovü nüh, “Noh tü küürüh vü küjiwa nyu,” ta sa veh lo?

¹⁴Noh nüh ngu veh; ah, noh tü küsühro thi kümnomna thsüveh, jüti küsa vü nüh noh nüh jüma tü noh ke vü vi naküveh kenüh; küükra mkünyiawa tü ma mpa ma vi noh tsü veh; noh tü apa mükünyiera küükrawa saru wie thuoh.

¹⁵Noh nüh khukekümsüra pie, thi kümsüküsara pie kürühshimtüluo; ma khukekümsü müjie phah küürara küju nü phah luo.

¹⁶VÜWA tü küsuokürho thi sehkhe küju kajiwa wiethuoh; akuoküjiri tü ma ke vünüh pokah khewie naveh.

¹⁷O VÜWA, noh nüh lokürüra kümngu künatü wie naveh; noh nüh mari luoveh sakükhra tsü naveh, noh nüh noh khüna kümrheke naveh,

¹⁸apa mükünyieri thi mürükümri vü kümsho sana küsa kenüh, jüti sanü azhih nyiri tü, mükümzhoh nüh sana küsa kenüh.