Read Pochuri Naga KÜREIHIRI 102 Bible Online

KÜREIHIRI 102 - Pochuri Naga bible

KÜREIHIRI 102

¹Eh kükhuo künatüluo, O VÜWA; eh küüzie tü noh vü küüru luo!

²Hi vünüh noh nyieh küthitemwa tümluo eh müshekümnomna rülo vü! Noh khüna hi vü kümrheke luo; hi nüh küji rülo vü pre nü hi rületsüluo!

³küpakenühnyunü eh rülori tü, anyikhu kümjie tewa küveh kenüh, thi eh rüri tü amo kümjie ju veh.

⁴Eh luoveh tü apra kümjie kürhienyahmthuoh, thi wazhümthuoh; hi tü eh lohse tsana küsa kümam.

⁵Hi nüh zie nü külüchi kenüh, eh rüri tü eh sazhü vü küpeketewathuoh.

⁶Hi tü reza vü riesümwa kümjie, jaküm azhievü khujorü küsü kümjie;

⁷Hi tü korhi peh, hi tü zheh rügi vü küüzoküza müwa küsü kümjie.

⁸Rülo aveh nga hi mükünongüri tü hi nyiepeveh, hi riesaküükhriri kütseri tü ehnyo vi nü kümzü satse,

⁹küpakenühnyunü hi tü alohse üta aweji kütsa kenüh, thi arüthsü vi eh küzhu vü wurü,

¹⁰noh arüküshu kenüh; küpakenühnyunü noh nüh, hi kha nü hi vijakümthuoh kenüh.

¹¹Eh rülori tü münüleh rüzhe kümjie; hi tü apra kümjie wazhümthuoh.

¹²Thitü noh tü, O VÜWA, küsuokürho küükajimthuoh; noh nyo tü awuhle aveh vü pehmthuoh.

¹³Noh tü sühra nü Zion nokümze naveh; ma tso na küsa tsothothuoh, küteke küsa tsotho tü rupehvehthuoh,

¹⁴küpakenühnyunü noh sieperi tü, ma lohri kümze nü küjeh veh; thi ma zhitho vü nokümze veh.

¹⁵Akuohjiri tü VÜWA nyo krü naveh, thi azhih vü kajiri aveh noh kütholathovü krü naveh,

¹⁶küpakenühnyunü VÜWA nüh Zion sana küveh kenüh, ma tü ma kütholathovü vünüh küngu naveh;

¹⁷Ma tü therakümra kükhuo chieke naveh, thi mari zhiekekükhuo kümawa nyu.

¹⁸Hamatü wuhle küru küsü kenüh küzhüke luo, jüta küsa vünüh wuo na küsa nyiri tü, VÜWA siakera naveh:

¹⁹Jüti küsa vü ma nüh, ma kümtse azhie kümsiewa vünüh noküturu naveh, atülü vünüh VÜWA nüh azhih no veh,

²⁰aküsiküsari külüchi künana küsa kenüh, Küpoka vünüh süm na küsari sakürüzihtsü na küsa kenüh;

²¹anyiri nüh Zion vünüh VÜWA nyo küzazhu naveh, thi Jerusalem vünüh ma küsiake küzazhu naveh,

²²Anyiri nüh küsezhuh vü, thi kajiperi nüh VÜWA khurü naveh.

²³Ma nüh eh kükhra kürhoküzhila vünüh zokhuom; ma nüh eh rülori sakümlumtü.

²⁴“O! eh Saküüwuowa,” ti küza, hi nüh, “Hala nüh hi vitemwa tüm, eh kürho küzhila vünüh, noh mahviri tü küzhike wuhle aveh vü,” ti küza!

²⁵Noh nüh khana vünüh azhihwa ajupe tü sakemthuoh, thi atülüri tü noh ke nüh küüroh kheh.

²⁶Jümari tü pokahm wie naveh, thitü noh thuoüji pehwie naveh; jümari tü thsünyawa üta aveh sephatewa naveh. Noh nüh jümari tü thsütüjuh üta khaphrütü veh, thi mari tü ratewa naveh;

²⁷thitü noh thuoüji zarike wie, thi noh mahviri tü küpote münyie.

²⁸Noh siepara tsari tü luovehji nü kürho sanaveh; mari kütsarhie tü noh tüvü vishu naveh.